ހޮނިހިރު ދުވަހުގެ ރޭ، ދީރުލްބަލާޙުގެ މެދުތެރޭގައި ހުރި ފަލަސްތީނުގެ ރެފިއުޖީން ދިރިއުޅޭ ޓެންޓަކަށް އިސްރާއީލުގެ ހަނގުރާމަ މަތިންދާބޯޓުތަކުން ބޮންއެޅުމުގެ ސަބަބުން ކުޑަކުއްޖަކާއެކު އެތައް ފަލަސްޠީނު މީހުން ޝަހީދު ވެއްޖެއެވެ.
ވަފާގެ ނޫސްވެރިޔާ ރިޕޯޓުކުރި ގޮތުގައި، އިސްރާއީލުގެ ބޯޓުތަކުން ބޮން އެޅީ ދީރުލްބަލާޙުގެ ދެކުނުގައިވާ އަލްއަސަރު މިސްކިތާ ކައިރީގައި ހުރި ޓެންޓްތަކަކަށެވެ. ހަމަލާގައި ގިނަ ބަޔަކު ވަނީ ޒަޚަމް ވެފައެވެ.
މީގެ އިތުރުން، ޣައްޒާގެ އުތުރުގައިވާ ބައިތު ލަހިޔާ އަވަށުގައި ހުރި އާންމުންގެ އެތައް އިމާރާތްތަކެއް އިސްރާއީލުގެ ބާރުތަކުން ވަނީ ތަޅާ ސުންނާފަތި ކޮށްފައެވެ.
2023 ވަނަ އަހަރުގެ އޮކްޓޯބަރު މަހުން ފެށިގެން ޣައްޒާއަށް އިސްރާއީލުން ދެމުންދާ އަނިޔާވެރި ހަމަލާތަކުގެ ސަބަބުން މިހާތަނަށް މަދުވެގެން 44,930 ފަލަސްޠީނު މީހުން ޝަހީދުވެފައިވާކަން ރެކޯޑުތަކުން ހާމަވެފައިވެއެވެ. އަދި 106,624 އަށްވުރެ ގިނަ މީހުން ވަނީ ޒަޚަމްވެފައެވެ.
އިސްރާއީލުގެ ހަމަލާތަކުގެ ސަބަބުން ކުއްލި ނުރައްކަލުގެ އަދި ސިވިލް ޑިފެންސް ޓީމުތަކަށް ވާސިލުނުވެވޭ ގޮތަށް، އެތައް ހާސް މީހުންނެއް ވަނީ ފުނޑުވެފައިވާ އިމާރާތްތަކުގެ ދަށުވެފައެވެ.
އދ. ގެ ސަލާމަތީ މަޖިލީހުން ވަގުތުން ހަނގުރާމަ ހުއްޓާލުމަށް ގޮވާލައި، އަދި ބައިނަލްއަޤްވާމީ އިންސާފުގެ ކޯޓުން ޣައްޒާގައި ނަސްލު ނައްތާލުން ހުއްޓުވުމަށާއި އިންސާނީ ހާލަތު ރަނގަޅުކުރުމަށް އަޅަންޖެހޭ ފިޔަވަޅުތައް އެޅުމަށް އަންގާފައިވީނަމަވެސް، އިސްރާއީލުން ހިންގާ ނަސްލު ނައްތާލުމުގެ ހަމަލާތައް ދަނީ ހުއްޓުމެއްނެތި ކުރިއަށެވެ.
