"އަލިފާނުގެ ހާދިސާގައި ސަރވަރ އަށް ވަނީ ގެއްލުންވެފައި، ލިޔެކިޔުންތައް ގެއްލިއްޖެ ނަމަ ހޯދޭނެ ގޮތެއް ނެތް"
ބުރާސްފަތި ދުވަހު މިނިސްޓްރީގެ އިތުރުން، ކޮންސްޓްރަކްޝަން މިނިސްޓްރީ އަދި އެންވަޔަރަމަންޓް މިނިސްޓްރީ ހިންގަމުން އަންނަ އިމާރާތުގައި އަލިފާން ރޯވެ ވަނީ އަނދާފަ
ަހައުސިން މިނިސްޓްރީ ހިންގަމުން އަންނަ އިމާރާތުގައި ރޯވި އަލިފާންގަނޑު
ހައުސިންގ މިނިސްޓްރީގެ ހުރިހާ މަޝްރޫއުތަކެއްގެ މައުލޫމާތު ހުރި ސަރވަރ އަށް އަސަރުކޮށްފައިވާ ކަމަށާއި ލިޔެކިޔުންތައް ގެއްލިއްޖެ ނަމަ ހޯދޭނެ ގޮތެއް ނެތް ކަމަށް ހައުސިންގ މިނިސްޓަރު، ޑރ. އަލީ ހައިދަރު ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވީ ޕީއެސްއެމްއަށް ދެއްވި ބަސްތީގަތުމެއްގައެވެ. މިނިސްޓަރ ވަނީ ހައުސިންގ މިނިސްޓްރީގެ މުވައްޒަފުންގެ މައުލޫމާތާއި މަޝްރޫޢުތަކުގެ މައުލޫމާތު ހިމެނޭ ސަރވަރ އަށް އަސަރުކޮށްފައިވާކަން ހާމަކުރައްވާފައެވެ. އެކަމާއި ގުޅޭ އިތުރު މައުލޫމާތު ރާއްޖެއެމްވީ އަށް ހިއްސާކުރައްވަމުން އަލިފާނުގައި އެ މިނިސްޓްރީގައި ހުރި ހުރިހާ ލިޔެކިޔުމަކާއި ޑޭޓާއެއް ވަނީ އަނދާފައި ކަމަށް މިނިސްޓަރ ފާހަގަކުރެއްވިއެވެ.
އެހެންނަމަވެސް ގެއްލުނީ ކޮން މައުލޫމާތެއްކަން އެނގޭނީ ފުލް ރިކަވަރީ އެސެސްމެންޓަކަށް ފަހުގައި ކަމަށް ހައިދަރު ވަނީ ވިދާޅުވެފައެވެ. މިނިސްޓަރ އެފަދައިން ވިދާޅުވި ނަމަވެސް ޕީއެސްއެމްއަށް ދެއްވި ބަސްތީގަތުމުގައި އެމަނިކުފާނު ވިދާޅުވީ އަނދައިގެންދިޔަ ސާވާގައި ހުރި މައުލޫމާތު ސަލާމަތް ކުރެވޭނެ ކަމަށް ނުބެލެވޭ ކަމަށެވެ. މިނިސްޓަރ ވަނީ އެއީ ވަރަށް ބޮޑު ގެއްލުމެއް ކަމަށް ވިދާޅުވެފައެވެ. އެ ހިސާބުން ހައުސިން މިނިސްޓްރީގެ ހުރިހާ މައުލޫމާތެއް ގެއްލުމުގެ ފުރުސަތު އޮތްކަމަށް ދޭހަވާ މޭރުމަކުން އެމަނިކުފާނު ވަނީ އެ ބަސްތީގަތުމުގައި ވާހަކަދައްކަވާފައެވެ.
ހައުސިން މިނިސްޓްރީ އާއި އިންފްރާސްޓަރަކްޗާ މިނިސްޓްރީގައި ހިނގި އަލިފާނުގެ ހާދިސާއާ ގުޅިގެން ގެދޮރުވެރިޔާ ސްކީމާ ގުޅޭ އެއްވެސް މައުލޫމާތަކަށް އަސަރެއް ނުކުރާނެ ކަމަށް ހައުސިންގ މިނިސްޓްރީން ވަނީ މީގެ ކުރިން ބުނެފައެވެ.
ބުރާސްފަތި ދުވަހު މިނިސްޓްރީގެ އިތުރުން، ކޮންސްޓްރަކްޝަން މިނިސްޓްރީ އަދި އެންވަޔަރަމަންޓް މިނިސްޓްރީ ހިންގަމުން އަންނަ އިމާރާތުގައި އަލިފާން ރޯވެ ވަނީ އަނދާފައެވެ. މިނިސްޓްރީން ބުނީ މިހާދިސާއާ ގުޅިގެން މިނިސްޓްރީން ކުރަމުންގެންދާ ގެދޮރުވެރިޔާ ސްކީމާ ގުޅޭ ހުރިހާ މައުލޫމާތާއި، ލިޔުންތަކަކީ މިނިސްޓްރީގެ ކްލައުޑް ހޯސްޓިންގައި ޑިޖިޓަލްކޮށް ބަލަހައްޓާ މައުލޫމާތު ކަމަށެވެ. އަދި މިހާދިސާގެ ސަބަބުން އެ މައުލޫމާތުތަކަށް އެއްވެސް އަސަރެއް ނުކުރާނެ ކަމަށް މިނިސްޓްރީން ބުނެއެވެ.
