ބުރާސްފަތި ދުވަހު އެރި އިރާއެކު މާލޭގައި ބޮޑު އަލިފާނުގެ ހާދިސާއެއް ހިނގައިފިއެވެ. އަލިފާން ރޯވީ ހައުސިންގ މިނިސްޓްރީއާއި ކޮންސްޓްރަކްޝަން މިނިސްޓްރީ ހިންގަމުންދާ އިމާރާތުގައެވެ. އެއާއި އެކު މުޅި މާލެތެރެއަށް މި އަލިފާނުގެ ދުންގަނޑު ފެތުރި ޚަބަރުތައްވެސް ރަށުތެރޭގައި ފެތުރިގެންފިއެވެ. ޓީވީތަކުން މި މަންޒަރުތައް ލައިވް ވެސް ކުރަން ފަށައިފިއެވެ. އެއާއި އެކު އެންމެންގެ ސަމާލުކަން އަލިފާނުގެ މި ހާދިސާއަށް ހުއްޓިއްޖެއެވެ. އަލިފާނުގެ ބޮޑު ހާދިސާއަކަށް ވީތީ އެކަންޏެއް ނޫނެވެ. ރޯވީ ހައުސިންގ މިނިސްޓްރީގައި ކަމަށްވުމުން ވެސް މެއެވެ. ސަބަބަކީ މި ސަރުކާރު ވެރިކަމަށް އައީސުރެ ނުދީ ހިފަހައްޓައިގެން އުޅޭ ފްލެޓްތަކާ ގޯތިތަކުގެ ހުރިހާ ލިޔެކިއުމަކާ އެކަމާ ގުޅޭ ސަރވާތައް ވެސް ހުންނަނީ ހައުސިންގ މިނިސްޓްރީގައި ކަމަށް ވާތިއެވެ.

އިސާހިތަކު އެ ސަރަހައްދަށް ރައީސް މުއިއްޒުވެސް ވަޑައިގެންފިއެވެ. އޭރު ހުޅުގަނޑު ފަޅައިގެން ބޭރަށް ނުކުމެ މުޅިތަން އަދަނީއެވެ. އަލިފާން ނިއްވާ މީހުން ހަރަކާތްތެރިވަމުން ދެއެވެ. ހައުސިންގ މިނިސްޓްރީ ހުންނަ ކޮށީގެ ދެކުނު ފަރާތުންހުންނަނީ އެމްއެންޑީއެފުން އަލިފާން ނިއްވުމަށް ބޭނުންކުރުމަށް، ބޭނުން ކުރާ ފަޔަރ ސްޓޭޝަނެވެ. ފަޔަރ ސްޓޭޝަނުގެ، ދެކުނު ފަރާތުން މާލޭގެ ފަޅުތެރެއެވެ. ފެން ހޮޅި ގުޅަން ވިއަސް، ލޮރީ ފޮނުވަން ވިއަސް މިއަށްވުރެ ކައިރި އެހެން ތަނެއް ނުހުންނާނެއެވެ.

އަލިފާން ރޯވި އިމާރާތުގެ އެއްފަރާތަކީ އަމީނީ މަގެވެ. އަނެއް ފަރާތުން އޮތީވެސް ފުޅާ މަގެކެވެ. އަލިފާނެއް ނިއްވާލަން ބޭނުންވާނެ ހުރިހާ ވަސީލަތަކާ ފަސޭހަ ހުރިހާ ގޮތެއް ވަށައިގެން ހުރި އިމާރާތެއްގައި ރޯވެ އަދަމުން ދެއެވެ. އެހާ ހިސާބުން ރަށުތެރޭގައި މިކަން ފެށުނު ގޮތާމެދު ވާހަކަ ދެކެވެން ފަށައިފިއެވެ. ބައެއް މީހުން ބުނާ ގޮތުގައި ހެނދުނު 6 އެއް ޖެހި އިރު އެމީހުން ޓެކްސީގައި އެމަގުން ދަތުރު ކުރި އިރުވެސް މިނިސްޓްރީ ކައިރީގައި ފަޔަރ ލޮރީ އޮތެވެ. މިނިސްޓްރީގައި މަސައްކަތް ކުރާ ބައެއް ކުދިން ބުނާ ގޮތުން 6:15 ގައި މިނިސްޓްރީގެ ބައެއް ވެރިން އެމީހުން އޮފީހަށް ނުނިކުތުމަށް އަންގައިފިއެވެ.

އެ ސަރަހައްދުގެ 6:30 ގެ މަންޒަރުތައް ކަމަށް ބުނާ ބައެއް މަންޒަރުތަކުން ފެންނަ ގޮތުން އަލިފާން ނިންވާ ލޮރީ މިނިސްޓްރީ ކައިރީ އޮތެވެ. މިނިސްޓްރީ ދޮރުން މީހުން ވަދެ ނުކުމެ ވެސް އުޅެއެވެ. ވަޒީރެއްގެ ކާރުކޮޅުވެސް އެހެންދާތީ ފެނެއެވެ. ތަން އޮތީ އާއްމު ހާލަތުގައެވެ. ދުންތަކެއް ނުކުންނާތިއެއްވެސް ނުފެނެއެވެ. އެމްއެންޑީއެފުން ބުނާ ގޮތުން އަލިފާން ރޯވިކަމުގެ ރިޕޯޓް އެމީހުންނަށް ލިބުނީ 6:27 ގައެވެ. އެތަނަށް އެމީހުން އެޓެންޑްވީ 6:30 ގައެވެ. އެހެން މީހަކު ކިޔައިދިން ގޮތުން 7:15 ގައި އޭނާގެ އަންހެނުން ގޮވައިގެން ސައިކަލުގައި އެހެން ދިއަ އިރު، އެ އިމާރާތުން ކޮންމެވެސް ވަރަކަށް ދުން ނުކުމެވެ. އޭރު ފަޔަރ ލޮރީ އެތާ ކައިރީގައި އޮތެވެ. ލޮރީ މަތީގައި ފަޔަރ މަނުން ފެންބޯން ތިއްބެވެ. ފެންޖަހާކަށް ނޫޅެއެވެ.

އެ ސަރަހައްދުގައި ހުރި ކޮންމެވެސް އޮފީހެއްގެ ތެރެއިން ނަގާފައިވާ ވީޑިއޯ ކޮޅެއް ސޯޝަލް މީޑިއާގައި ދައުރުވަމުން ދެއެވެ. އެ ވީޑިއޯއިން އެ އިމާރާތް ރޯވެ އަނދާތަނާ ފާރެއް ވެއްޓޭތަން ފެނެއެވެ. ވީޑިއޯ ކުރި މީހުން ދައްކަމުންދާ ވާހަކައިގެ އަޑު ވީޑިއޯއިން އިވެމުން ދެއެވެ. އެމީހުން ކިޔަނީ ތަންއަދާ ހުލިވަނީ ކަމަށެވެ. އަލިފާން ނިއްވާ މީހުން ނިންވަން ނޫޅެ އެތިބީ ކީއްވެގެންތޯ އެކަކު އަނެކަކާ ސުވާލުކުރަމުން ދެއެވެ.

ކޮންމެއަކަސް ރަށުތެރޭގައި އެކި ވާހަކަތައް އެކި ގޮތައް ފެތުރެމުން ދެއެވެ. ބައެއް މީހުން ބުނަނީ ގަސްތުގައި އެތަން އަންދާލީ ކަމަށެވެ. ރޯވެ އަނދާ ހުލިވަންދެން ތިބީ ކަމަށެވެ. ކޮންސްޓްރަކްޝަން މިނިސްޓަރަށް އެ ޚަބަރު ލިބުނީ 7އާއި 7:15 އާއި ދޭތެރޭގައި ކަމަށް ވެއެވެ. ރައީސަށް ރިޕޯޓް ކުރީ ވެސް ވަޒީރުކަމަށް ވެއެވެ. ރައީސުލްޖުމްހޫރިއްޔާ އާއި ވަޒީރުންނާ ދައުލަތުގެ އެހެނިހެން އިސްވެރިން ވެސް އެ ސަރައްދުން ފެންނަމުން ދިއައެވެ. ރޯވެފައިވާ އިމާރާތް ވަރުގަދަ އަށް އަނދަމުން ދެއެވެ. އިމާރާތް ރޯވެ އަދަމުން ގޮސް ދެން އަނދާނެ އެހެން އެއްޗެއް ނެތި ހުސްވެއްޖެއެވެ. އޭރު ޖެހިގެން ހުރި އެންވަޔަރަންމަންޓް މިނިސްޓްރީގެ އޮފީހުގައި ރޯވެ އަނދަން ފަށައިފިއެވެ. ސިޓީ ކައުންސިލްގެ އިމާރާތަކަށް ވެސް އެކަމުގެ އަސަރު ކޮށްފިއެވެ.

ގާތް ގަނޑަކަށް މުޅި އެ ކޮށި އަނދާހުލިވެއްޖެއެވެ. މެންދުރު 12 ވެސް ޖަހައިފިއެވެ. ދެން ފެނުނީ މާލޭ ޑެޕިއުޓީ މޭޔަރ ދިން އިންޓަރވިއުއެކެވެ. މާލޭގެ ގޯތި ގެދޮރުގެ ރަޖިސްޓްރީތަކާ ތަރިކަ މުދަލާ ބެހޭ ލިޔުންތަކާ ރަށްވެހި ކަމާ ގުޅޭ ލިޔުންތައް ގެއްލިގެން ހިނގައިދާނެ ކަމުގެ ބިރުވެރި ވާހަކަތަކެވެ. އޭރު ހައުސިންގ މިނިސްޓްރީގައި އޮތް 4،000 ޑޮލަރު ނޫން ހުރިހާ އެއްޗެއް އަނދައިފިއެވެ. ސަރވަރ ތައް ވެސް އަނދާ ބޮލި ކައިފިއެވެ. ފެށުނު ގަޑި ކަށަވަރު ނުވި ނަމަވެސް ގާތްގަނޑަކަށް އެރި އިރާއެކު ރޯވި މި އަލިފާން ކޮންޓްރޯލް ކުރެވުނު ކަމަށްވީ 12 ޖަހާ ދިއަ ފަހުންނެވެ. އޭރު ހުރީ މުޅިތަން އަނދާ ހުލިވެގެން ގޮސް ވެއްޓި ކޮޅަށް ހުރި ކޮންކްރީޓް ސްޓްރަކްޗަރ ކޮޅެއް އެކަންޏެވެ. ދެން ފެނުނީ ރައީސް މުއިއްޒުއާއި ކެބިނެޓް އެކްޝަން އަށް ނުކުތް ތަނެވެ. ރައީސްގެ ތަފާތު ވީޑިއޯތައް ސޯޝަލް މީޑިއާގައި އާއްމު ކުރަމުން ދިއައެވެ. ކެބިނެޓާއި ބައްދަލުކުރައްވާ ތަނެވެ. މީސް މީހުންނަށް ލަފައާއި އިރުޝާދު ދެއްވާތަނެވެ. ކޮޅު ކޮޅުމައްޗަށް ހިންގަވާ އަތްޕުޅުން ހަނަ އަޅުއްވާ ތަނެވެ.

އަމިއްލަފުޅު ސަރުކާރުގެ ތިން ވުޒާރާއެއްގައި އަލިފާން ރޯވެ 6 ގަޑި އިރުވަންދެއް އަނދާ ހުލިވެ ދައުލަތުގެ އެތައް މުދަލެއް އަޅިއަށްވެ އެތައް އަރުށީފެއް ދުމަށްވެ، ވެއްޔަށްވެ ނެތިދިއުމުން ފެއިލްވެވަޑައިގެންނެވި ކަމުގެ އަސަރެއް ވެސް ދެރަފުޅު ވުމެއްވެސް ފެންނާކަށް ނެތެވެ. އެ މައްސަލައެއްގައި އެމަނިކުފާނުގެ މައްޗަށް ބޮޑެތި ތުހުމަތުތަކެއް ކުރެވިފައިވާ ނޫމަޑި މައްސަލައިގެ ލިޔެކިޔުންތައް ވެސް އަނދައިގެން ދިއަ ކަމުގެ ކަންބޮޑުވުމެއް ވެސް ފެންނާކަށް ނެތެވެ. އަލިފާނުގެ އެއް ދުވަސްފަހުން ހައުސިންގ މިނިސްޓަރު ވާހަކަފުޅު ދައްކަވައިފިއެވެ. ހުރިހާ އެއްޗެއް އަނދައިފި ކަމަށާއި، ސަރވާތައް ވެސް އަނދާ ހުލިވެއްޖެ ކަމަށާއި، ފްލެޓް ލިސްޓު ނެރެން މިކަމާ ގުޅިގެން ލަސްވެދާނެ ކަމަށް ވިދާޅުވެއްޖެއެވެ.

ޖެހިގެން އައި ހޮނިހިރު ދުވަހު މިކަމާ ގުޅޭ ޕްރެސް އެއް ބާއްވައިފިއެވެ. އެމްއެންޑީއެފުން ބުނީ ބޮޑަށް އިސްކަންދިނީ މީހަކަށް ގެއްލުމެއް ނުވެ، ވާނެ ގޮތެއް ހޯދާށެވެ. އަލިފާންގަނޑު އެހެން އިމާރާތްތަކަށް ނުފެތުރޭނެ ގޮތެއް ހޯދުމުގެ މަސައްކަތް ކުރާށެވެ. ދައުލަތުގެ މުދަލަށް ލިބޭ ގެއްލުންތައް ކުޑަކުރާށެވެ. އެކަމަކު ދެކި ބަލާށެވެ. އެމްއެންޑީއެފުން މިހެން ބުނި އިރު، އެކޮށި މިހާރު ހީވަނީ ބަޔަކު އުވަދަވަން އަންދާފައި އޮތް އުވަ ވަޅެއް ހެންނެވެ. ކޮންސްޓްރަކްޝަން މިނިސްޓަރު ވިދާޅުވީ އެއްވެސް މީހަކު އަމިއްލައަށް ސްޕެކިއުލޭޝަން ނުހެދުމަށެވެ. ތަހުގީގު ކުރާ ފަރާތްތަކަށް އެކަން ދޫކޮށްލުމަށެވެ. ދެ ބަހެއް ވިދާޅުވެފައި ތަނަކަށް ފުރަން ޖެހިގެން ނައްޓާލީއެވެ. ޕްރެސްގައި ކުރެވުނީ 3 ސުވާލެވެ. އެހެން ނޫސްވެރިން ސުވާލުތައް ހިފައިގެން އަނގަނައިގެން ތިބީއެވެ.

ސްޕެކިއުލޭޓް ނުކުރަން ވިދާޅުވެ މީހުންގެ އަނގަމަތީގައި މިޒަމާނުގައި އަތްއަޅަން އުޅުމަކީ ބުއްދިވެރި ކަމެއް ނޫނެވެ. އަނދާހުލިވީ ރައްޔިތުންގެ މުދަލެވެ. ނެތި ދިޔައީ ރައްޔިތުންގެ މުހިންމު ލިޔެކިޔުންތަކެވެ. ގެއްލުންވީ ދިވެހި ރައްޔިތުންނަށެވެ. ދައުލަތުގެ ވަސީލަތްތައް ރައްކައުތެރިކޮށް ބެލެހެއްޓުމުގެ ޒިންމާ ހަވާލު ކުރި ފަރާތްތަކުގެ އިހުމާލުގެ ވާހަކަ ރައްޔިތުން ދައްކާނެއެވެ. އެކަން ހުއްޓުވަން ނޫޅުއްވާށެވެ.

ކޮންމެ އަކަސް އަހަން ބޭނުންވެފައި ހުރި ސުވާލުތައް ހުއްޓާ ޕްރެސް ނިމުނީ އެވެ. އެކަމަކު ރޯވިތަނުން ދުން އެރުމެއް އަދިވެސް ނުހުއްޓެއެވެ. އެކަމަކު ކާމިޔާބު ކަމާއެކު އަލިފާން ނިއްވާލެވިއްޖެއެވެ. ރައީސުލްޖުމްހޫރިއްޔާގެ ބެއްލެވުމާ ޚާއްސަ އިސްނެންގެވުމާއި ފުރިހަމަ އިރުޝާދުފުޅު މަތިންނެވެ. މުހާވަރާއެއްގައި އޮވެއެވެ. އޮޕަރޭޝަން ކާމިޔާބެވެ. އެކަމަކު ބަލި މީހާ ވީ މަރެވެ.