ތިން މިނިސްޓްރީގައި އަލިފާން ރޯވުމުގެ ކުރިން ވެސް ކަރަންޓުގެ މައްސަލަ އުޅޭކަން އެނގޭ: ފުލުހުން
24 ސެޕްޓެމްބަރު 2026 | ބުރާސްފަތި 10:14ފުލުހުންގެ ފަރާތުން ބޭއްވި ނޫސްވެރިންގެ ބައްދަލުވުމުގައި ސުޕްރިންޓެންޑެންޓް އަބްދުﷲ ރަޝީދު ވިދާޅުވީ، ތިން މިނިސްޓްރީގައި އަލިފާާން ރޯވީ ކަރަންޓުގެ މައްސަލައެއް ދިމާވެ، ނަރުތަކެއްގައި ޝޯޓުވެގެންކަން ފުލުހުންގެ ތަހުގީގަށް ސާބިތުވެފައިވާ ކަމަށް
ހައުސިންގ މިނިސްޓްރީގައި އަލިފާން ރޯވި އިރު އެ ސަރަހައްދުގައި ރައީސް މުއިއްޒު ހުއްޓިވަޑައިގެން | ރައީސް އޮފީސް
ސަރުކާރުގެ ތިން މިނިސްޓްރީއެއް ހިންގަމުން އައި އިމާރާތުގައި އަލިފާން ރޯވެ، ތިން މިނިސްޓްރީ އެއްކޮށް އަނދައި އަޅިއަށް ވެގެން ދިޔަ ހާދިސާގެ ކުރިން ވެސް، އެ އިމާރާާތުގައި ކަރަންޓުގެ މައްސަލަ އުޅޭކަން އެނގޭ ކަމަށް ދިވެހި ފުލުހުންގެ ޚިދުމަތުގެ ފަރާތުން ބުނެފި އެވެ.
ބުރާސްފަތި ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ވަނީ، ތިން މިނިސްޓްރީގައި އަލިފާން ރޯވި ހާދިސާގެ ވީޑިއޯ ފުޓޭޖު އާންމުކޮށްފަ އެވެ. އެގޮތުން އެ ދުވަހުގެ ހެނދުނު އެ ތަނަށް ދިޔަ ފުލުހުންގެ ގައިގައި ހަރުކޮށްފައި ހުރި ބޮޑީކެމްގެ ވީޑިއޯ ވަނީ އާންމުކޮށްފަ އެވެ.
ފުލުހުންގެ ފަރާތުން ބޭއްވި ނޫސްވެރިންގެ ބައްދަލުވުމުގައި ސުޕްރިންޓެންޑެންޓް އަބްދުﷲ ރަޝީދު ވިދާޅުވީ، ތިން މިނިސްޓްރީގައި އަލިފާާން ރޯވީ ކަރަންޓުގެ މައްސަލައެއް ދިމާވެ، ނަރުތަކެއްގައި ޝޯޓުވެގެންކަން ފުލުހުންގެ ތަހުގީގަށް ސާބިތުވެފައިވާ ކަމަށެވެ. މީގެ ކުރިން ރައްޔިތުންގެ މަޖިލީހުގައި ވާހަކަ ދައްކަވަމުން ހޯމް މިނިސްޓަރު އަލީ އިހުސާން ވެސް ވަނީ މިހެން ވިދާޅުވެފަ އެވެ.
ޢަބްދުﷲ ރަޝީދު ވިދާޅުވީ، ރޯވެފައިވާ ކަރަންޓު ނަރުތަކަކީ އެ އިމާރާތުގެ ދަތި ދޭތެރެތަކުގައި ހުރި ނަރުތަކެއް ކަމަށްވާތީ، އަލިފާން ނިއްވުމުގައި ދަތިތަކެއް ދިމާވި ކަމަށާއި، އެކަމުގެ ސަބަބުން ކޮންޓްރޯލް ނުވެގެން ގޮސް އަލިފާން ހިފައިގެން ފެތުރިގެން ދިޔައީ ކަމަށެވެ. އަލިފާާން އެންމެ ފުރަތަމަ ރޯވެފައި ހުއްޓޭ ފެނުނު ޖިއޮމެޓްރިކްސް ޑިޕާޓްމަންޓުގައި ކަރަންޓުގެ މައްސަލަ އުޅޭކަން މީގެ ކުރިން ވެސް ފާހަގަކުރެވިފައިވާ ކަމަށް އޭނާ ހާމަކުރެއްވި އެވެ.
މީގެ އިތުރުން އަލިފާން ރޯވެގެން ފުލުހުންނާއި ސިފައިން، އަލިފާން ރޯވެފައި ހުރި ތަންތަން ހޯދުމުގެ މަސައްކަތް ކުރިއަށް ގެންދިޔައިރު ވެސް، އެ އިމާރާތުގެ ބައެއް ތަންތަނުގައި ކަަރަންޓު ހުރި ކަމަށް ފާހަގަކުރެވުނު ކަމަށް އަބްދުﷲ ރަޝީދު ވިދާޅުވި އެވެ.
ސަރުކާާރުގެ ތިން މިނިސްޓްރީ ހިންގަމުން ދިޔަ މި އިމާާރާތުގައި އަލިފާާން ރޯވެފައި ވަނީ 2024 ވަނަ އަހަރުގެ ޑިސެމްބަރު މަހުގެ 12 ވަނަ ދުވަހު އެވެ. އެ ދުވަހުގެ އަލިފާނުގެ ހާާދިސާ ކޮންޓްރޯލް ކުރެވުނީ މެންދުރުވީ ފަހުންނެވެ. މި ހާދިސާގައި ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އަދި އެންވަޔަރަމަންޓް މިނިސްޓްރީ ހިންގަމުން އައި އިމާރާތް ވަނީ އަނދައި، އަޅިއަށްވެފަ އެވެ.
