ބުރާސްފަތި ދުވަހުގެ ހަވީރު ޣައްޒާ ސްޓްރިޕްގެ މެދުތެރޭގައި އޮންނަ ނުސީރާތު ރެފިއުޖީ ކޭމްޕްގައި ހުރި އިމާރާތަކާއި ގިނަ އަދަދެއްގެ ގެތަކަކަށް އިސްރާއީލުގެ ހަނގުރާމަވެރި މަތިންދާބޯޓުތަކުން ބޮން އަޅައި، މަދުވެގެން 21 ފަލަސްތީނު މީހުން ޝަހީދުކޮށްލައި، އެތައް ބަޔަކު ޒަޚަމްކޮށްފިއެވެ.

އިސްރާއީލުން އެތައް ތަނަކަށް ބޮން އެޅި މި ހާދިސާގައި ޝަހީދުވި މީހުންގެ ތެރޭގައި ގިނައީ އަންހެނުންނާއި ކުޑަކުދިންނެވެ.

ސިއްހީ އޮފިޝަލުން ކަށަވަރުކޮށްދިން ގޮތުގައި، ބުރާސްފަތި ދުވަހުގެ ފަތިހުން ފެށިގެން ޣައްޒާގެ އެކި ސަރަޙައްދުތަކަށް އިސްރާއީލުން ދިން ވައިގެ ހަމަލާތަކުގައި 70 މީހުން ޝަހީދުވެފައިވެއެވެ. މީގެ ތެރެއިން 57 މީހުން ޝަހީދުވެފައިވަނީ ޣައްޒާގެ މެދު އަދި ދެކުނު ސަރަޙައްދުތަކުގައެވެ.

2023 ވަނަ އަހަރުގެ އޮކްޓޯބަރު މަހުން ފެށިގެން ޣައްޒާ އަށް އިސްރާއީލުން ދެމުންދާ އަނިޔާވެރި ހަމަލާތަކުގައި މިހާތަނަށް މަދުވެގެން 44،835 ފަލަސްތީނު މީހުން މަރުވެފައިވާކަން ރެކޯޑުތަކުން އެނގެއެވެ. އަދި 106،356 އަށްވުރެ ގިނަ މީހުން އިސްރާއީލުގެ ހަމަލާތަކުގައި ޒަޚަމްވެފައިވެއެވެ.

އިސްރާއީލުގެ ހަމަލާތަކާ ގުޅިގެން، ގެއްލުންވި އެތައް ހާސް ބަޔަކު ވަނީ ފުނޑުފުނޑުވެފައިވާ އިމާރާތްތަކުގެ ތެރޭގައި ތާށިވެފައެވެ. އިސްރާއީލުގެ ހަމަލާތަކުގެ ސަބަބުން، ކުއްލި ނުރައްކަލުގެ އަދި ސިވިލް ޑިފެންސް ޓީމުތަކަށް މި މީހުންނާ ހަމައަށް ވާސިލުވުމަށް ވަނީ ދަތިވެފައެވެ.

އދ. ގެ ސެކިއުރިޓީ ކައުންސިލުން ވަގުތުން ހަނގުރާމަ ހުއްޓާލުމަށް ގޮވާލުމާއި، އިންޓަރނޭޝަނަލް ކޯޓު އޮފް ޖަސްޓިސްއިން ނަސްލު ނައްތާލުން ހުއްޓުވުމަށާއި ޣައްޒާ ގައި ދިމާވެފައިވާ ނާޒުކު އިންސާނީ ހާލަތު ރަނގަޅުކުރުމަށް އަޅަންޖެހޭ ފިޔަވަޅުތައް އެޅުމަށް އަންގާފައިވީ ނަމަވެސް، އިސްރާއީލުން ދެމުންދާ ނަސްލު ނައްތާލުމުގެ ހަމަލާތައް މަޑުޖެހުމެއްނެތި ކުރިއަށްދެއެވެ.