ޔުއެފާ ޗެމްޕިއަންސް ލީގުގައި ޔުވެންޓަސްއާ ދެކޮޅަށް ކުޅުނު މެޗުން ބަލިވެ، މެންޗެސްޓަރ ސިޓީ އަށް ޕްރެޝަރު ބޮޑުވެއްޖެ އެވެ.

ޔުވެންޓަސްގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗުން ސިޓީ ބަލިވީ 2-0 އިންނެވެ. މެޗުގައި ޔުވެންޓަސް އިން އެ ޓީމުގެ ދެ ލަނޑު ވެސް ޖެހީ ފުރަތަމަ ހާފުގަ އެވެ.

މެޗުގެ ދެ ވަނަ ހާފު ފަށައިގެން އަށް ވަނަ މިނެޓުގައި ސިޓީ ކޮޅަށް ލަނޑު ޖަހައި ޔުވެންޓަސް އަށް ކުރި ހޯދައިދިނީ ޑޫސާން ވްލަހޯވިޗް އެވެ. އޭނާ އެ ލަނޑު ޖެހީ ކެނާން ޔިލްޑިޒް ތަނަވަސްކޮށްދިން ފުރުސަތެއްގަ އެވެ. މެޗުގައި ލަނޑު ޖަހައި ނަތީޖާ ހަމަހަމަ ކުރުމަށް ސިޓީން މަސައްކަތް ކުރަމުން ދަނިކޮށް، 75 ވަނަ މިނެޓުގައި ޔުވެންޓަސް އިން ވަނީ ދެ ވަނަ ލަނޑެއް ވެސް ޖަހައިފަ އެވެ. އެ ލަނޑު އެ ޓީމަށް ޖަހައިދިނީ ވެސްޓާން މެކްނީ އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ.

މެޗުން މޮޅުވެ ޔުވެންޓަސް އޮތީ 14 ވަނައިގަ އެވެ. އެއީ މިހާތަނަށް އެ ޓީމު ކުޅެފައިވާ ހަ މެޗުން 11 ޕޮއިންޓާ އެކު އެވެ. ޔުވެންޓަސް އަތުން ބަލިވެ ސިޓީ އޮތީ 22 ވަނައިގަ އެވެ. ހަ މެޗުން އެ ޓީމަށް ލިބެނީ އަށް ޕޮއިންޓެވެ. ދެ މެޗުން ސިޓީ މޮޅުވެފައިވާއިރު، ދެ މެޗުން ބަލިވެ، އަނެއް ދެ މެޗުން ވަނީ އެއްވަރުވެފަ އެވެ.