އިސްރާއީލާ ދެކޮޅަށް ދެކުނު އެފްރިކާއިން އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) ގައި އުފުލާފައިވާ ޣައްޒާގެ ނަސްލު ނައްތާލުމުގެ ދައުވާގައި އަޔަރލެންޑުން ބައިވެރިވާނެކަމަށް އިޢުލާނުކުރުމުން ފަލަސްޠީނުން މަރުޙަބާކިޔައިފިއެވެ.
ބުދަ ދުވަހުގެ ރޭ ފަލަސްތީނުގެ ފޮރިން އެފެއާޒް އެންޑް އެކްސްޕެޓްރިއޭޓްސް މިނިސްޓްރީން ވަނީ މިކަމަށް މަރުޙަބާ ކިޔާ ބަޔާނެއް ނެރެފައެވެ.
އެ ނޫސްބަޔާނެއްގައި ބުނެފައިވަނީ އައަރލެންޑުގެ މި ނިންމުމަކީ ޢަދުލު އިންސާފާއި ބައިނަލްއަޤްވާމީ ޤާނޫނުތައް ނެގެހެއްޓުމަށް އަޔަރލެންޑުން ސަމާލުކަން ދޭ މިންވަރު ދޭހަކޮށްދޭ ކަމެއް ކަމުގައެވެ.
މިނިސްޓްރީން ގޮވާލާފައިވަނީ ނަސްލު ނައްތާލުމުގެ ޖަރީމާ ހުއްޓުވުމަށް އެކުލަވާލާފައިވާ ބައިނަލް އަގްވާމީ މުއާހަދާގެ ހުރިހާ ބައިވެރިން އައިސީޖޭ ގައި އިސްރާއީލާ ދެކޮޅަށް ދެކުނު އެފްރިކާއިން އުފުލާފައިވާ މައްސަލައިގެ ތެރެއަށް ތަދައްހުލްވެ، ކޯޓުގެ އިޖުރާއާތުތަކުގައި އަމަލީގޮތުން ބައިވެރިވުމަށެވެ.
ޚާއްޞަކޮށް ފަލަސްޠީނު ރައްޔިތުންނާ ދެކޮޅަށް ހިނގަމުންދާ ނަސްލު ނައްތާލުމުގެ ޢަމަލުތައް ހުއްޓުވުމާއި، އިސްރާއީލަށް ލިބެން ޖެހޭ ހައްގު އަދަބުން ރެކުމުން ސަލާމަތްވިޔަ ނުދިނުމަކީ އިންސާނިއްޔަތު ކަމުގެ ގޮތުންނާއި، ޤާނޫނުގެ މަޞްލަޙަތަށްޓަކައި އެކުގައި އުފުލަންޖެހޭ ޒިންމާއެއްކަމަށް ބަޔާންކޮށްފައިވެއެވެ.
