އަންގާރަ ދުވަހުގެ ރޭ އިސްރާއީލުން ބޮން އަޅާ ފަލަސްތީނުގެ 7 މީހުން ޝަހީދު ކޮށްލައިފި
އިސްރާއީލުން ހުސްވި އަހަރުގެ އޮކްޓޯބަރު 7 ން ފެށިގެން ޣައްޒާ އަށް ދެމުންދާ ހަމަލާތަކުގައި މަދުވެގެން 44,786 ފަލަސްތީނު މީހުން މިހާތަނަށް ވަނީ ޝަހީދު ކޮށްލާފައެވެ. އިސްރާއީލުގެ ހަމަލާތަކުގައި ޒަޚަމްވި މީހުންގެ އަދަދު މިހާރު ވަނީ މަދުވެގެން 106,188 ށް އަރާފައެވެ.
ޣައްޒާގައި އިސްރާއީލުން ބޮން އަޅާ ހަލާކުކޮށްލާފައިވާ އިމާރާތެއް
އަންގާރަ ދުވަހުގެ ރޭ އިސްރާއީލުގެ ވައިގެ ހަމަލާއަކުން ޣައްޒާ ސްޓްރިޕްގެ މެދުތެރޭގައި ހުންނަ ނުސީރާތު ރެފިއުޖީ ކޭމްޕުގައި 7 ފަލަސްތީނު މީހުން ޝަހީދުވެ އެތައް ބަޔަކު ޒަޚަމްވެއްޖެއެވެ.
ވަފާ ނިއުސް އިން ބުނިގޮތުގައި އިސްރާއީލުގެ ހަނގުރާމަމަތީ މަތިންދާބޯޓުތަކުން ހަމަލާ ދީފައިވަނީ އެ ރެފިއުޖީ ކޭމްޕުގައި ހުރި އާންމުން ދިރިއުޅޭ ގެއަކަށެވެ.
އަދި އިތުރަށް ބުނެފައިވަނީ އިސްރާއީލުގެ ހަނގުރާމަމަތީ މަތިންދާބޯޓުތަކުން ޣައްޒާ ސިޓީގެ ޝެއިޚް ރަދްވާން ސަރަހައްދުގައި އާއިލާ އެއް ދިރިއުޅޭ 6 ބުރީގެ އިމާރާތަކަށް ބޮން އަޅާފައިވާ ކަމަށެވެ.
މީހުން ސަލާމަތްކުރުމުގެ މަސައްކަތް ކުރާ ޓީމުތައް އެ ސަރަހައްދަށް ގޮސް ފުނޑުވެފައިވާ އިމާރާތުގެ ދަށުން މީހުންގެ ހަށިތައް ހޯދުމުގެ މަސައްކަތް ކުރަމުންދާ ކަމަށް ރިޕޯޓުތައް ބުނެއެވެ.
އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން ރަފަހް ގައި ހިންގަމުންދާ ހަނގުރާމަވެރި ހަރަކާތްތައް ހުއްޓާލުމަށް ޤާނޫނީ ގޮތުން ލާޒިމްކުރާ އަމުރެއް ނެރުނު ނަމަވެސް، އިސްރާއީލުން އެ އަމުރަށް އެއްވެސް ފަރުވާލެއް ނުބަހައްޓައި، ހަނގުރާމައިގެ ސަބަބުން ވީރާނާވެފައިވާ ޣައްޒާ ސްޓްރިޕްގައި ނަސްލު ނައްތާލުމުގެ ހަމަލާތައް ގެންދަނީ ކުރިއަށެވެ.
އިސްރާއީލުން ހުސްވި އަހަރުގެ އޮކްޓޯބަރު 7 ން ފެށިގެން ޣައްޒާ އަށް ދެމުންދާ ހަމަލާތަކުގައި މަދުވެގެން 44,786 ފަލަސްތީނު މީހުން މިހާތަނަށް ވަނީ ޝަހީދު ކޮށްލާފައެވެ. އިސްރާއީލުގެ ހަމަލާތަކުގައި ޒަޚަމްވި މީހުންގެ އަދަދު މިހާރު ވަނީ މަދުވެގެން 106,188 ށް އަރާފައެވެ.
މީގެ އިތުރުން، މަދުވެގެން 10,000 މީހުން ވަނީ ގެއްލިފައެވެ. ބެލެވޭ ގޮތުން އެމީހުން ވަނީ ހަމަލާތަކުގައި ފުނޑުވި އިމާރާތްތަކުގެ ދަށުވެ މަރުވެފައެވެ.
ފަލަސްތީނުގެ ރަސްމީ އިދާރާތަކުން ބުނާގޮތުގައި މަރުވެފައިވާ އަދި އަނިޔާވެފައިވާ މީހުންގެ ގިނަ އަދަދަކީ އަންހެނުންނާއި ކުޑަކުދިންނެވެ.
އިސްރާއީލުގެ އަނިޔާވެރި ހަމަލާތަކުގެ ސަބަބުން ޣައްޒާ ސްޓްރިޕްގެ އެކި ސަރަހައްދުތަކުން ގާތްގަނޑަކަށް ދެ މިލިއަނެއްހާ މީހުން ވަނީ މަޖުބޫރުން ދިރިއުޅޭ ތަން ދޫކޮށް އެހެން ސަރަހައްދުތަކަށް ހިޖުރަކޮށްފައެވެ. ގިނަ ބަޔަކު ވަގުތީ ހިޔާވަހިކަން ހޯދަން ޖަމާވެފައިވަނީ މިސްރުގެ ބޯޑަރާ ކައިރީގައި އޮންނަ ރަފަހް ސިޓީއަށެވެ.
