އެއް އަހަރު ތެރޭ ކުރަން ބުނި އެއްވެސްކަމެއް މި ސަރުކާރަށް ނުކުރެވޭ
ކުރީގެ އެންވަޔަންރަމަންޓް މިނިސްޓަރު އައިމިނަތު ޝައުނާ
ހުދުމުހުތާރު ވެރިކަމެއްގައި ހަދާ ދޮގުތައް ރައްޔިތުން ބަލައިނުގަންނަން ފެށީމާ ދެން ފެންނާނީ ގާނޫނުތަކަށް ބަދަލު ގެންނަތަން ކަމަށް ކުރީގެ އެންބަވަޔަރަމަންޓް މިނިސްޓަރު އައިމިނަތު ޝައުނާ ވިދާޅުވެއްޖެއެވެ.
"ގާނޫނު އަސާސީގެ ދިފާއުގައި ރައްޔިތުން" ޖަލްސާފައި ވާހަކަ ދައްކަވަމުން ޝައުނާ ވިދާޅުވީ ރައްޔިތުން މި ސަރުކާރަށް ބޯކޮށް ވޯޓު ދީފަ އެ ވޯޓު ދިނީ ރައީސް މުއިއްޒު ދެއްކެވި ވާހަކަތަކެއްގެ މައްޗަށް ބިނާކޮށް ވައުދުތަކެއް ވެވަޑައިގަތީމަ އެ ވަޢުދުތައް ފުއްދަވާނެ ކަމުގެ އުންމީދުގައި ކަމަށެވެ. އަދި އެއް އަހަރު ތެރޭގައިއެނގުނީ އެ ހުރިހާ އެއްޗެއް ބޮލާލާ ޖައްސަވާ ދޮގު ހަދަމުން ދޮގު ގެންދަވާކަން ކަމަށާއި، އެއް އަހަރު ތެރޭ ކުރަން ބުނި އެއްވެސްކަމެއް މި ސަރުކާރަށް ނުކުރެވޭ ކަމަށެވެ.
ޝައުނާ ވިދާޅުވީ އަހަރެއް ވާއިރު ވެސް ކުރީ ސަރުކާރު ނޫން ވާހަކައެއް ނުދައްކަވާ ކަމީ ނާގާބިލު ސަރުކާރެއް ވީމަ ދައްކަވާނެ އިތުރު ވާހަކައެއް ނެތުމުން، ދައްކަވާނެ އިތުރު ސިޔާސަތެއް ނެތުމުން ދައްކަވާ ވާހަކައެއް ކަމަށެވެ.
ޝައުނާ ވިދާޅުވީ 10 ޑިސެމްބަރު އައިއިރުގައި އެއްވެސް ކުލައެއް ތިލަވެފައެއް ނެތް ކަމަށެވެ. އަހަރެއް ނިމި ދާއިރުގައި 700 ސިޔާސީ މުވައްޒަފުން ހިފަހައްޓަވާނެ ކަމަށް ވިދާޅުވި އިރު، 3000ށް ވުރެ ގިނަ ސިޔާސީ މުވައްޒަފުން އެބަތިބި ކަމަށެވެ.
ޝައުނާ ވިދާޅުވީ އެކަމާއި ބަސް ބުނާނެ ކަމަށާއި، އެކަމާއި އިހްތިޖާޖު ކުރާނެ ކަމަށެވެ. ދިވެހިންނަށް ލިބިފައިވާ މިނިވަންކަމާއި، ހައްގުތައް ސަރުކާރުން ދަނީ ފޭރެމުން ކަމަށާއި، އެކަމާއި ދެކޮޅަށް ބަސް ނުބުނެ މަޑުން ނުތިބެވޭނެކަމަށް ޝައުނާ ވިދާޅުވިއެވެ.
