އިސްރާއީލުން އުތުރު ޣައްޒާ އަށް ގިނަ ހަމަލާތަކެއްދީ މަދުވެގެން 20 އާންމުން ޝަހީދުކޮށްލައިފި
10 ޑިސެމްބަރު 2024 | އަންގާރަ 04:397 އޮކްޓޯބަރު 2023 އިން ފެށިގެން މިހާތަނަށް ޣައްޒާގައި އިސްރާއީލުން އެއްގަމާއި، ކަނޑާއި، ވައިގެ މަގުން ދެމުންދާ ހަމަލާތަކުގައި 44،758 ފަލަސްތީނު މީހުންގެ ފުރާނަ ގެއްލި، 106،134 މީހުން ވަނީ ޒަޚަމްވެފައެވެ.
އިސްރާއީލުގެ ހަމަލާއެއްގައި ޒަޚަމްވި ކުޑަ ދެ ކުދިންނަށް ފަރުވާ ދެނީ
އިސްރާއީލުގެ އަނިޔާވެރި ބާރުތަކުން ހޯމަ ދުވަހުގެ ރޭ ހަނގުރާމައިގެ ތެރޭގައިވާ ޣައްޒާގައި އަނެއްކާވެސް އާ ގަތލުއާންމު ތަކެއް ހިންގައިފިއެވެ. އުތުރު ޣައްޒާގެ އިޒްބަތު ބައިތުލް ހަނޫންގައި ހުރި އާންމުންގެ ގެތަކަށް ބޮންއަޅާ، އެތައް އާންމުންނެއް ޝަހީދުކޮށް، އެތައް ބަޔަކު ވަނީ އެ ހަމަލާތަކުގައި ޝަހީދުވެފައެވެ.
ސަރަޙައްދުގެ މަޞްދަރުތަކުން ބުނާ ގޮތުގައި ޔަހޫދީ ސިފައިންގެ ބާރުތަކުގެ ވައިގެ ހަމަލާތަކުގައި މަދުވެގެން 20 އާންމުން ޝަހީދުވެ، އެތައް ބަޔަކަށް އަނިޔާވެފައިވެއެވެ. އަނެއްކޮޅުން ހަމަލާ ދިން ސަރަހައްދަކީ ޔަހޫދީ ސިފައިން ހިސޯރުކޮށްފައި އޮތް ސަރަހައްދަކަށް ވުމާއެކު އެ ސަރަޙައްދު ވަށައިލާފައިވާތީ، އެމްބިއުލާންސްތަކާއި ސަލާމަތްކުރާ ޓީމުތަކަށް އެ ސަރަޙައްދަށް ވަދެވޭގޮތް ނުވެއެވެ.
އެހެން ހާދިސާއެއް ގައި އިސްރާއީލުގެ މަތިންދާބޯޓުތަކުން ޣައްޒާގެ މެދުތެރޭގައި ހުރި އަލް-މަޣާޒީ އަދި ނުސީރާތު ރެފިއުޖީ ކޭމްޕްތަކަށް އެތައް ހަމަލާއެއް ދީފައިވެއެވެ. އިސްރާއީލީ ބާރުތަކުން ނުސީރާތުގެ އުތުރުގައި ހުރި ގެތަކެއްވެސް ގޮއްވާލައިފިއެވެ.
އޭގެ ކުރިން، ސިއްހީ މަޞްދަރުތަކުން ބުނެފައިވަނީ އުތުރު ޣައްޒާގެ ބައިތުލް ލަހިޔާ އަވަށުގައި ތިބި ބަޔަކަށް އިސްރާއީލުން ހަމަލާ ދިނުމުން އާންމުންގެ ހަ މީހުން ޝަހީދުވެ، އެތައް ބަޔަކަށް އަނިޔާވެފައިވާ ކަމަށެވެ. މިއާއެކު އެ އަވަށުގައި ހުރި އެތައް ގެއަކަށާއި ތަންތަނަށް އިސްރާއީލުން ބޮން އަޅައިފައިވެއެވެ.
ދެކުނު ޣައްޒާގެ ޚާން ޔޫނިސްގެ އިރުމަތީގައި އިސްރާއީލުން ދިން ޑްރޯން ހަމަލާ އެއް ގައި އާންމުންގެ މީހަކު ވަނީ ޝަހީދު ކޮށްލާފައެވެ. އަދި އަލް-މަޣާޒީ ކޭމްޕަށް އިސްރާއީލުގެ ބާރުތަކުން ދިން ހަމަލާއެއްގައި މަދުވެގެން ދެ ކުޑަކުދިންގެ ފުރާނަ ގެއްލި، އިތުރު ބަޔަކަށް އަނިޔާވެފައިވެއެވެ.
ޖަބާލިޔާ ރެފިއުޖީ ކޭމްޕްގައި ހުރި، ގެދޮރު ގެއްލުނު މީހުން ތިބި ސްކޫލަކަށް އިސްރާއީލުން ދިން ހަމަލާއެއްގައި އެތައް އާންމުންނެއް ޝަހީދުވެ އެތައް ބަޔަކު ޒަޚަމްވިއެވެ.
އުތުރު ޣައްޒާގެ ކަމާލް އަދްވާން ހޮސްޕިޓަލް ކައިރީގައި ހުރި ރެސިޑެންޝަލް ބްލޮކަކަށް އިސްރާއީލުގެ ބާރުތަކުގެ ހަނގުރާމަމަތީ މަތިންދާބޯޓުތަކުން ބޮން އެޅުމުން އެތައް އާންމުންނެއް ޝަހީދުވެ، އެތައް ބަޔަކަށް އަނިޔާވެފައިވެއެވެ.
7 އޮކްޓޯބަރު 2023 އިން ފެށިގެން މިހާތަނަށް ޣައްޒާގައި އިސްރާއީލުން އެއްގަމާއި، ކަނޑާއި، ވައިގެ މަގުން ދެމުންދާ ހަމަލާތަކުގައި 44،758 ފަލަސްތީނު މީހުންގެ ފުރާނަ ގެއްލި، 106،134 މީހުން ވަނީ ޒަޚަމްވެފައެވެ.
