އާދިއްތަ ދުވަހު ޣައްޒާގައި އިސްރާއީލުން އެތައް ބަޔަކު ޝަހީދު ކޮށްލައިފި

އާދީއްތަ ދުވަހުގެ ރޭ، ޣައްޒާ ސިޓީއަށާއި މެދުތެރޭ ޣައްޒާގައި ހުރި އަލް-ބުރެއިޖް ރެފިއުޖީ ކޭމްޕަށް އިސްރާއީލުން ދިން ބޮމުގެ ހަމަލާއެއްގައި، ކުޑަކުދިންނާއި އަންހެނުން ހިމެނޭ ގޮތަށް މަދުވެގެން 25 ފަލަސްޠީނު މީހުން ޝަހީދުވެ އަދި އެތައް ބަޔަކު ޒަޚަމްވެއްޖެއެވެ.

ވަފާގެ ނޫސްވެރިންނާ ހަވާލާ ދީ އެ ނޫހުގައި ރިޕޯޓުކުރި ގޮތުގައި، ޣައްޒާ ސިޓީގެ މުނިސިޕަލް ޕާކު ކައިރީގައި މަގެއްގެ މަތީގައި ތިބި ބަޔަކަށް އިސްރާއީލުން ބޮން އަޅާ 10 މީހުން ޝަހީދުވެ، އިތުރު ބަޔަކަށް އަނިޔާވިއެވެ.

މީގެ އިތުރުން، އަލް-ބުރެއިޖް ކޭމްޕުގެ ކައިރީގައިވާ ގެއަކަށް އިސްރާއީލުން ދިން ބޮމް ހަމަލާއެއްގައި، ކުޑަކުދިންނާއި އަންހެނުން ހިމެނޭ ގޮތަށް 11 މީހުން ޝަހީދުވެ، އިތުރު ބަޔަކު ޒަޚަމްވިއެވެ.

އެހެން ހާދިސާއެއްގައި ދެކުނު ޣައްޒާގެ ރަފަހްގެ އާންމުންގެ ބަޔަކަށް އަމާޒުކޮށް އިސްރާއީލުން ދިން ހަމަލާއެއްގައި 5 މީހުން ޝަހީދުވިއެވެ.

މީގެ އިތުރުން ޣައްޒާ ސްޓްރިޕްގެ އުތުރުގައި ހުންނަ އިންޑޮނީޝިއާ ހޮސްޕިޓަލަށް އިސްރާއީލުން ދިން ބޮމުގެ ހަމަލާއެއްގައި 6 ބަލިމީހުން ޒަޚަމްވިއެވެ. އޭގެ ތެރެއިން އެކަކުގެ ހާލަތު ނުރައްކައުތެރި ކަމަށް އޮފިޝަލުން ވަނީ ބުނެފައެވެ.

މީގެ އިތުރުން، ޣައްޒާ ސްޓްރިޕްގެ ދެކުނުގައިވާ ރަފާ ސިޓީގެ އިރުމަތީގައިވާ އަލް-ޖަނީނާ ސަރަޙައްދުގައި ހުރި ގިނަ އަދަދެއްގެ އާންމުންގެ އިމާރާތްތަކެއް އިޒްރާއީލުގެ ބާރުތަކުން ވަނީ ގޮއްވާލާފައެވެ.

ސިއްޙީ އިދާރާތަކުން ކަށަވަރުކޮށްދީފައިވާ ގޮތުގައި، 2023 ވަނަ އަހަރުގެ އޮކްޓޯބަރު 7 އިން ފެށިގެން އިޒްރާއީލުގެ ހަމަލާތަކުގައި މަރުވި ފަލަސްޠީނުންގެ އަދަދު ވަނީ 44،708 އަށް އަރާފައެވެ. އަދި 106،050 މީހުން ވަނީ ޒަޚަމްވެފައެވެ. މީގެ ތެރޭގައި ގިނަ އަދަދެއް އަންހެނުންނާއި ކުޑަކުދިން ހިމެނެއެވެ.

އިސްރާއީލުގެ ބާރުތަކުން އެމްބިއުލާންސްތަކާއި ސިވިލް ޑިފެންސް ޓީމުތަކުގެ ދަތުރުފަތުރަށް ހުރަސްއަޅަމުންދާތީ، ހަނގުރާމައިގެ ސަބަބުން ހަލާކުވެފައިވާ މި ސަރަޙައްދުގެ މަގުތަކުގައި އެކި ތަންތަނަށް އުކާލެވިފައިވާ މަރުވެފައިވާ މީހުންގެ ހަށިތަކާއި އިމާރާތްތަކުގެ ދަށުވެ ގެއްލިފައިވާ މީހުންނާ ހަމައަށް ކުއްލި ނުރައްކަލުގެ ޚިދުމަތްތަކަށް ދެވޭގޮތެއް ނުވެއެވެ.

އދ. ގެ ސެކިއުރިޓީ ކައުންސިލުން ވަގުތުން ހަނގުރާމަ ހުއްޓާލުމަށް ގޮވާލައި، ޣައްޒާގައި ހިންގަމުންދާ ނަސްލު ނައްތާލުމުގެ ހަނގުރާމަ ހުއްޓުވުމަށާއި ޣައްޒާގައި ދިމާވެފައިވާ އިންސާނީ ހާލަތު ރަނގަޅުކުރުމަށް ފިޔަވަޅު އެޅުމަށް އިންޓަރނޭޝަނަލް ކޯޓް އޮފް ޖަސްޓިސްއިން އަންގާފައިވީ ނަމަވެސް، އިޒްރާއީލުން ނަސްލު ނައްތާލުމުގެ ހަމަލާތައް ދަނީ މެދުކެނޑުމެއްނެތި ކުރިއަށެވެ.