ޖަރުމަނުން ސީރިއާ އަށް 300 މިލިއަން ޔޫރޯގެ އެހީ ހަދިޔާކުރަނީ

ސީރިއާ އަށް 300 މިލިއަން ޔޫރޯ (326 މިލިއަން ޑޮލަރު)ގެ އެހީތެރިކަން ފޯރުކޮށްދޭން ނިންމާފައިވާ ކަމަށް، ޖަރުމަނުގެ ފޮރިންގ މިނިސްޓަރު އަނަލެނާ ބެއާބޮކް ވިދާޅުވެއްޖެ އެވެ.

ބެލްޖިއަމްގެ ވެރި ރަށް، ބްރަސެލްސް ގައި ބޭއްވުމަށް ހަމަޖެހިފައިވާ ބައިނަލްއަޤުވާމީ އެހީގެ ޖަލްސާގެ ކުރިން، ޖަރުމަނުގެ ފޮރިން މިނިސްޓްރީން ބުނީ އެހީގެ ބޮޑު ބައެއް ބޭނުން ކުރާނީ ސޫރިއާގެ ރައްޔިތުންނަށް ކާބޯތަކެތީގެ އިތުރުން، ޞިއްޙީ ޚިދުމަތްތައް އަދި ކުއްލި ޙާލަތުގެ ހިޔާވަހިކަން ފޯރުކޮށްދިނުމަށް ކަމަށެވެ.

މީގެ އިތުރުން، ޚާއްސަ ރައްކާތެރިކަން ބޭނުންވާ ފަރާތްތަކަށް ހިމާޔަތް ދިނުމަށް ވެސް މި ފައިސާ ބޭނުން ކުރެވޭނެ އެވެ. އަދި ޖޯޑަން، ލުބުނާން، އިރާގު އަދި ތުރުކީ ގައި ތިބި ސީރިއާގެ ރެފިއުޖީންނަށާއި، އެ ގައުމުތަކުގެ މުޖުތަމައުތަކަށް ވެސް މި އެހީގެ ދަށުން އެހީތެރިކަން ލިބިގެން ދާނެ ކަމަށް ޖަރުމަނުގެ ފޮރިން މިނިސްޓަރު ވިދާޅުވި އެވެ.

އޭނާ ވިދާޅުވީ ޔޫރަޕުގެ ޤައުމުމެއްގެ ހައިސިއްޔަތުން ޖަރުމަނު އޮތީ ސޫރިއާގެ ރައްޔިތުންނާ އެކު ކަމަށެވެ. އދަި މިނިވަން، ސުލްހަވެރި ސީރިއާއެއް ބޭނުންވާ ކަމަށް ވެސް ވިދާޅުވެފައިވެ އެވެ. 

މީގެ އިތުރުން އޭނާ ވަނީ ސޫރިއާގައި މި ފަހުން ހިނގައި ދިޔަ ހަމަނުޖެހުންތަކާއި،އެތައް ރައްޔިތުންނެއް މަރާލި މައްސަލަ ތަހުގީގުކޮށް، ޒިންމާދާރުވާން ޖެހޭ ފަރާތްތައް ޖަވާބުދާރީ ކުރުވުމަށް ވަގުތީ ސަރުކާރަށް ގޮވާލައްވާފައި އެވެ.

ފާއިތުވި ދުވަސް ތަކުގައި ސީރިއާގެ ކަނޑު އައްސޭރި ސަރަހައްދުގައި ކުރީގެ ރައީސް ބައްޝާރު އަލް-އަސަދުގެ ވަފާތެރިންނާއި، އައު ވެރިކަމުގެ މެދުގައި ހިނގި އަނިޔާވެރި ހަމަނުޖެހުން ތަކުގައި 1000 އަށްވުރެ ގިނަ މީހުން މަރުވެފައިވާ ކަމަށް ހަނގުރާމައިގެ ހާލަތު ބަލަހައްޓާ ޖަމާއަތަކުން ބުނެފައިވެ އެވެ.