ޓްރަމްޕް ސީރިއާ ގެ ރައީސް ޝަރާއާ ބައްދަލު ކުރައްވައިފި
ސައުދީ އަރަބިއްޔާގެ ވަލީ އަހްދު މުޙައްމަދު ބިން ސަލްމާންގެ އެދިވަޑައިގަތުމުގެ މަތިން، ސީރިއާ އަށް އެމެރިކާ އިން އަޅާފައިވާ ދަތިކުރުމުގެ ހުރިހާ ފިޔަވަޅުތަކެއް ނައްތާލުމަށް އަމުރުކުރައްވާނެ ކަމަށް، ސައުދީ އަށް ކުރައްވާ ރަސްމީ ދަތުރުފުޅެއްގައި އުޅުއްވަމުން ޓްރަމްޕް އަންގާރަ ދުވަހު ވަނީ ވިދާޅުވެފައި.
ސައުދީ އަރަބިއްޔާގެ ރިޔާޟް ގައި އެމެރިކާގެ ރައީސް ޑޮނަލްޑް ޓްރަމްޕް ސީރިއާ ގެ ރައީސް އަހުމަދު އަލް ޝަރާ އާ ބައްދަލުކުރައްވަނީ.. ބައްދަލު ކުރެއްވުމުގައި ސައުދީ ވަލީ އަހުދު މުހައްމަދު ބިން ސަލްމާން ބައިވެރިވެވަޑައިގެންނެވި، 14 މެއި 2025
އެމެރިކާގެ ރައީސް ޑޮނަލްޑް ޓްރަމްޕް، ސީރިއާގެ ރައީސް އަޙްމަދު އަލް-ޝަރާ އާ ސައުދީ އަރަބިއްޔާގެ ވެރިރަށް ރިޔާޟް ގައި ބައްދަލު ކުރައްވައިފިއެވެ.
ސައުދީ އަރަބިއްޔާގެ ވަލީ އަހްދު މުޙައްމަދު ބިން ސަލްމާންގެ އެދިވަޑައިގަތުމުގެ މަތިން، ސީރިއާ އަށް އެމެރިކާ އިން އަޅާފައިވާ ދަތިކުރުމުގެ ހުރިހާ ފިޔަވަޅުތަކެއް ނައްތާލުމަށް އަމުރުކުރައްވާނެ ކަމަށް، ސައުދީ އަށް ކުރައްވާ ރަސްމީ ދަތުރުފުޅެއްގައި އުޅުއްވަމުން ޓްރަމްޕް އަންގާރަ ދުވަހު ވަނީ ވިދާޅުވެފައެވެ.
މިއީ ހަނގުރާމައިން ވީރާނާވެފައިވާ ސީރިއާ ހަމައަކަށް އެޅުވުމަށް އަލް-ޝަރާ އަށް ލިބިވަޑައިގަތް ވަރަށް ބޮޑު ކުރިއެރުމެއް ކަމަށް ރިޕޯޓުތައް ބުނެއެވެ.
ސީރިއާގެ މައްޗަށް އަޅާފައިވާ ދަތިކުރުމުގެ ފިޔަވަޅުތައް ނައްތާލުމަށް ޓްރަމްޕް ނިންމެވި ނިންމެވުމަކީ އެ ޤައުމަށް "މުހިންމު ބަދަލެއް އަންނާނެ ކަމެއް" ކަމަށް ސީރިއާގެ ޚާރިޖީ ވަޒީރު ވިދާޅުވިއެވެ.
ސީރިއާގެ ސަރުކާރުގެ ނޫސް އޭޖެންސީ ސަނާ އަށް ވާހަކަފުޅު ދައްކަވަމުން، ޚާރިޖީ ވަޒީރު އަސަދު އަލް-ޝައިބާނީ ވިދާޅުވީ ޓްރަމްޕްގެ އިއުލާނަށް މަރުޙަބާ ކިޔާ ކަމަށާއި، "އަހަރުތަކެއް ވަންދެން ހިނގި ވީރާނާކުރުވަނިވި ހަނގުރާމައަކަށްފަހު، ހަމަޖެހުމާއި، އަމިއްލަ ފުދުންތެރިކަމާއި، ޙަޤީޤީ އާރާސްތުކުރުމުގެ މުސްތަޤުބަލަކާ ދިމާ އަށް ދާއިރު، މިއީ ސީރިއާގެ ރައްޔިތުންނަށް މުހިންމު ބަދަލެއް އަންނާނެ ހިސާބެއް" ކަމަށެވެ.
ވައިޓް ހައުސްގެ އިސް ވެރިއަކު އަލް އަރަބިއްޔާ އަށް ވިދާޅުވި ގޮތުގައި، ބުދަ ދުވަހު ސައުދީ އަރަބިއްޔާގައި އަލް-ޝަރާ އަށް "ހެލޯ" ވިދާޅުވުމަށް ޓްރަމްޕް އެއްބަސްވެވަޑައިގެންފައިވެއެވެ. ސީރިއާގެ ރިޔާސަތުގެ ދެ މަސްދަރަކުން ބުނި ގޮތުގައި، ޓްރަމްޕްއާ ބައްދަލުކުރެއްވުމަށް އަލް-ޝަރާ ރިޔާޟަށް ވަނީ ވަޑައިގެންފައެވެ.
ބައްދަލުވުމަށް ފަހު އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައިވަނީ ސީރިއާ އާއެކު ގުޅުން އާންމު ހާލަތަކަށް ގެނައުމަށް "ދިރާސާކުރަމުން" ގެންދާ ކަމަށެވެ.
"އަޅުގަނޑުމެން މިހާރު ދިރާސާ ކުރަމުން މި ގެންދަނީ ސީރިއާ ގެ އައު ސަރުކާރާއެކު ގުޅުން އާންމު ހާލަތަކަށް ގެނައުމަށް... މިކަން ފެށިގެން އައީ އަޅުގަނޑު ރައީސް އަޙްމަދު އަލް-ޝަރާއާ ބައްދަލުކުރުމާ އެކުގައި،" ޖީ.ސީ.ސީ-ޔޫ.އެސް ސަމިޓުގައި ގަލްފު ލީޑަރުންނާ މުޚާތަބު ކުރައްވަމުން ޓްރަމްޕް ވިދާޅުވިއެވެ.
އޭނާ ފާހަގަކުރެއްވި ގޮތުގައި ސެކްރެޓަރީ އޮފް ސްޓޭޓް މާކޯ ރޫބިއޯ، މި ހަފްތާގެ ފަހުކޮޅު ތުރުކީގައި ސީރިއާގެ ފޮރިން މިނިސްޓަރ އަސާދު އަލް-ޝައިބާނީ އާ ބައްދަލުކުރައްވާނެއެވެ.
ސަމިޓު ފެށުމުގެ ކުރިން ޓްރަމްޕް އަދި އަލް-ޝަރާ ބައްދަލުކުރެއްވީ ނޫސްވެރިންނަށް ދައުވަތު ނުދެއްވާސައޫދީ ވަލީއަހުދު މުޙައްމަދު ބިން ސަލްމާންގެ ހާޒިރުގައެވެ. އަދި ތުރުކީގެ ރައީސް ރަޖަބް ތައްޔިބް އުރުދުޣާން ވީޑިއޯ ކޮންފަރެންސިންގ މެދުވެރިކޮށް ބައިައިވެރިވެވަޑައިގަތެވެ.
އެމެރިކާއިން ސީރިއާގެ މައްޗަށް ހަރުކަށި ދަތިކުރުމުގެ ފިޔަވަޅުތަކެއް އަޅާފައިވަނީ ބައްޝާރު އަލް-އަސަދުގެ ވެރިކަމުގައެވެ. އަދި 13 އަހަރަށްވުރެ ދިގު މުއްދަތަކަށް ހިނގި ހަނގުރާމައަށްފަހު 2022 ގެ ޑިސެމްބަރުގައި އޭނާ ވެރިކަމުން ވައްޓާލެވުނު ފަހުންވެސް މި ފިޔަވަޅުތައް ދެމެހެއްޓިފައިވެއެވެ.
