ސީރިއާ އަށް 2.5 ބިލިއަން ޔޫރޯގެ އެހީ ދިނުމަށް އީޔޫ އިން ނިންމައިފި

ޔޫރަޕިއަން ޔޫނިއަން އިން، ސީރިއާ އަށް ބޮޑު އެހީތެރިކަމެއް ދިނުމަށް ނިންމައިފި އެވެ.

ބެލްޖިއަމްގެ ވެރި ރަށް، ބްރަސެލްސް ގައި ބޭއްވުނު ބައިނަލްއަޤުވާމީ އެހީގެ ޖަލްސާ ގައި ނިންމާފައި ވަނީ، ސީރިއާ އަށް 2.5 ބިލިއަން ޔޫރޯގެ އެހީތެރިކަން ދިނުމަށެވެ. 

އެހެން ނަމަވެސް، އެމެރިކާގެ އެހީތެރިކަން މަދުވުމާ އެކު، މިއަހަރުގެ ޖުމްލަ އެހީގެ އަދަދު މިދިޔަ އަހަރަށް ވުރެ ދަށް ވެދާނެ ކަމަށް ބެލެވެ އެވެ.

ޔޫރަޕިއަން ކޮމިޝަންގެ އިސްވެރިޔާ އުރުސުލާ ވޮން ޑީ ލެޔެން ވިދާޅުވީ، ސީރިއާ ގައި ދިރިއުޅޭ މީހުންނާއި، އަވައްޓެރި ޤައުމުތަކުގައި ތިބި ސިރިއާގެ ރެފިއުޖީންނަށް އެހީތެރި ވުމަށް ޔޫރަޕިއަން ޔޫނިއަނުން އިތުރު އެހީތެރިކަން ފޯރުކޮށްދޭން ނިންމާފައިވާ ކަމަށެވެ.

މީގެ އިތުރުން، ޖަރުމަނުވިލާތުން 330 މިލިއަން ޑޮލަރު އަދި އިނގިރޭސިވިލާތުން 210 މިލިއަން ޑޮލަރުގެ އެހީ ހުށަހަޅާފައިވެ އެވެ.

މިއީ ސީރިއާގެ ކުރީގެ ރައީސް ބައްޝާރް އަލް-އަސަދުގެ ވެރިކަން ވައްޓާލި ފަހުން، ސީރިއާގެ އައު ވެރިކަމުގެ ބައިވެރިވުމާ އެކު ބޭއްވުނު ފުރަތަމަ އެހީ ހޯދުމުގެ ބައްދަލުވުމެވެ.

ސީރިއާގެ ބަންޑާރަ ނައިބު އަސްއަދު އަލް-ޝައިބާނީ ވިދާޅުވީ، ޔޫރަޕިއަން ޔޫނިއަނުން ދޭ އެހީތެރި ކަމަށް ޝުކުރުވެރިވާ ކަމަށާއި، ނަމަވެސް އިތުރު އެހީތެރިކަން ބޭނުންވާ ކަމަށެވެ.

14 އަހަރުގެ ހަނގުރާމައިގެ ސަބަބުން ބޮޑެތި ގެއްލުންތަކާ ކުރިމަތިލާން ޖެހިފައިވާ ސީރިއާ ގައި މިވަގުތު 16.7 މިލިއަން މީހުން އެހީ އަށް ބޭނުން ވެފައިވެ އެވެ.

އދ. އިން ބުނާ ގޮތުގައި މިހާރުގެ އިޤްތިޞާދީ ކުރިއެރުމުގެ މިންވަރުން، ހަނގުރާމަ ފެށުމުގެ ކުރީގެ އިޤްތިޞާދީ ފެންވަރަށް އާދެވޭނީ 50 އަހަރަށް ވުރެ ގިނަ ދުވަހުންނެވެ.

އިންޓަނޭޝަނަލް ކޮމިޓީ އޮފް ދަ ރެޑް ކްރޮސްގެ ރައީސް މިރްޖާނާ ސްޕޮލްޖަރިކް ވިދާޅުވީ، މިވަގުތު ސީރިއާ އަށް އެހީތެރިކަން މަދު ކުރުމަކީ ބޮޑު ގޯހެއް ކަމަށާއި، މިލިއަނުން ގުނާ އަދަދަކަށް ސީރިއާގެ ރައްޔިތުން އިންސާނީ އެހީތެރިކަމަށް ބަރޯސާ ވެފައިވާ ކަމަށެވެ.