ސޫރިޔާ ގައި 2012 ވަނަ އަހަރު އިދިކޮޅު ފަރާތްތަކުގެ ބާރުގެ ދަށުގައި އޮތް ސިޓީ އެއް ގައި ދެ ނޫސްވެރިން މަރާލި ހާދިސާ އާ ގުޅިގެން، ވެރިކަމުން ވައްޓާލި ސޫރިއާގެ ރައީސް ބައްޝާރު އަލް-އަސަދާއި އިތުރު 6 އިސް އޮފިޝަލުން ހައްޔަރު ކުރުމުގެ އަމުރެއް ފަރަންސޭސި ވިލާތުގެ ކޯޓަކުން ނެރެފި ކަމަށް ވަކީލުން އަންގާރަ ދުވަހު ބުނެފިއެވެ.

އިނގިރޭސިވިލާތުގެ ނޫހެއް ކަމަށްވާ ދަ ސަންޑޭ ޓައިމްސް އަށް މަސައްކަތް ކުރި 56 އަހަރުގެ އެމެރިކާ ނޫސްވެރިޔާ މެރީ ކޮލްވިން އާއި 28 އަހަރުގެ ފްރާންސް ފޮޓޯގްރާފަރު ރެމީ އޮޗްލިކް، 2012 ފެބްރުއަރީ 22 ވަނަ ދުވަހު އިރުމަތީ ސިޓީ ހޮމްސް ގައި ބޮމެއް ގޮއްވާލައިގެން ވަނީ މަރުވެފައެވެ. މިއީ އިންސާނިއްޔަތާ ދެކޮޅު ކުށެއްގެ ގޮތުގައި އަދި ހަނގުރާމައިގެ ކުށެއްގެ ގޮތުގައި ފްރާންސްގެ ޝަރުޢީ ނިޒާމުން ތަޙުޤީޤު ކުރަމުންދާ މައްސަލައެކެވެ.

އެ ދެ ނޫސްވެރިން މަސައްކަތް ކުރަމުން ދިޔަ މަރުކަޒަށް ދިން ހަމަލާގައި އިނގިރޭސި ފޮޓޯގްރާފަރު ޕޯލް ކޮންރޯއި، ފްރާންސް ރިޕޯޓަރު އެޑިތް ބޫވިއަރ އަދި ސީރިއާގެ ތަރުޖަމާނު ވާއިލް އުމަރު ޒަޚަމްވިއެވެ.

2024 ވަނަ އަހަރުގެ ފަހުކޮޅު އިދިކޮޅު ފަރާތްތަކުން ވެރިކަން ވައްޓާލުމަށްފަހު އަލް-އަސަދު އޭނާގެ އާއިލާއާއެކު ފިއްލަވައިގެން ރަޝިޔާ އަށް ވަނީ ވަޑައިގެންފައެވެ. ނަމަވެސް އޭނާ ހުންނެވި ތަނެއް ކަށަވަރު ކުރެވިފައެއް ނުވެއެވެ.

އަލް-އަސަދުގެ އިތުރުން، މި އަމުރު ޚާއްޞަކޮށް އަމާޒު ކުރެވިފައި ވަނީ އެ ދުވަސްވަރު ސޫރިއާގެ 4 ވަނަ އާމަރޑް ޑިވިޜަންގެ ޑީ ފެކްޓޯ އިސްވެރިޔާގެ ގޮތުގައި ހުރި ކުރީގެ ރައީސް ގެ ކޮއްކޮ މާހިރު އަލް-އަސަދު، އިންޓެލިޖެންސް ވެރިޔާ އަލީ މަމްލޫކް، އަދި އޭރުގެ އާމީ ޗީފް އޮފް ސްޓާފް އަލީ އައްޔޫބް އަށެވެ.