ސީރިއާގެ ރައީސް އަލް ޝަރާ ރަޝިޔާގައި، އައްސަދު ހަވާލު ކުރުމަށް އެދެނީ

ސީރިއާގެ ރައީސް އަޙުމަދު އަލް ޝަރާ، ރަސްމީ ދަތުރުފުޅެއްގައި ރަޝިޔާ އަށް ވަޑައިގެންފި އެވެ.

ސީރިއާގެ ސަރުކާރުގެ ނޫސް އެޖެންސީ ސަނާ އިން ހާމަ ކޮށްފައިވާ ގޮތުގައި، އަލް ޝަރާ ރަޝިޔާ އަށް ވަޑައިގެންނެވީ ބުދަ ދުވަހުގެ ވަގުތެއްގަ އެވެ.

މިއީ މިދިޔަ އަހަރުގެ ޑިސެމްބަރު މަހުގެ ތެރޭގައި ސީރިއާގެ ރައީސް ކަމުގެ މަގާމުގައި ހުންނެވި ބައްޝާރު އަލް އައްސަދު ވެރި ކަމުން ވައްޓާލުމަށް ފަހު ވެރިކަމާ ހަވާލުވި ފަހުން، އަލް ޝަރާ ރަޝިޔާ އަށް ވަޑައިގެންނެވި ފުރަތަމަ ފަހަރެވެ.

ވެރިކަމުން ވައްޓާލުމާ އެކު، އަލް އައްސަދު ވަނީ ސީރިއާ ދޫކޮށް ވަޑައިގެންފަ އެވެ. އެއަށް ފަހު އޭނާ ދިރި އުޅުއްވަމުން އަންނަނީ ރަޝިޔާގަ އެވެ. އޭގެ ފަހުން ގާތް ގަނޑަކަށް އެއް އަހަރު ވާން ކައިިރިވެފައި ވާއިރު، މި ފާއިތުވި މުއްދަތުގައި އަލް އައްސަދު އަމިއްލަ ޤައުމަށް ވަޑައިގެންފަ އެއް ނުވެ އެވެ.

ރަޝިޔާ ގެ ވެރިރަށް މޮސްކޯ އަށް އަލް ޝަރާ ވަޑައިގެންފައި ވާއިރު، މި ދަތުރުފުޅުގައި ރަޝިޔާގެ ރައީސް ވްލަޑިމިއަރ ޕުޓިންއާ ބައްދަލު ކުރައްވާނެ ކަަމަށް ވަނީ ބުނެފަ އެވެ. އަދި އެ ބައްދަލުވުމުގައި ދެ ގައުމުގެ ގުޅުން ވަރުގަދަ ކުރުމާއި، ދެ ގައުމަށް ވެސް މުހިންމު ސަރަހައްދީ އަދި ބައިނަލްއަޤުވާމީ ކަންކަމާ ގުޅޭ ގޮތުން މަޝްވަރާ ކުރައްވާނެ ކަމަށް ވެސް ވަނީ ބުނެފަ އެވެ.

ސީރިއާ ސަރުކާރުގެ އިސް އޮފިޝަލަކު ހާމަ ކޮށްފައިވާ ގޮތުގައި، މި ދަތުރުފުޅުގައި ސީރިއާގެ ކުރީގެ ރައީސް އަލް އައްސަދު އެ ގައުމާ ހަވާލު ކުރެއްވުމަށް ވެސް، އަލް ޝަރާ ރަޝިޔާގެ ކިބައިން އެދޭނެ އެވެ. ނަމަވެސް، އޮފިޝަލު ވަނީ އޭނާގެ ނަން ހާމަ ނުކުރުމަށް އެދިފަ އެވެ.

އޭއެފްޕީ އަށް މައުލޫމާތު ދެމުން އޭނާ ބުނެފައި ވަނީ، އަލް އައްސަދު އަނބުރާ ހަވާލު ކުރެއްވުމަށް އަލް ޝަރާ އެދިވަޑައިގަންނަވާނީ ސީދާ ރަޝިޔާގެ ރައީސް ޕުޓިންގެ އަރިހުންނެވެ. ޚާއްސަކޮށް އަލް އައްސަދަކީ ހަނގުރާމައިގެ ކުށްތަކެއް ކޮށްފައިވާ މީހެއް ކަމަށް ތުހުމަތު ކުރެވިފައި ވާއިރު، އޭނާ އާއި ރަޝިޔާ ގައި ތިބި އަލް އައްސަދާ ގުޅުން އޮންނަ އެހެން މީހުން ވެސް ހަވާލު ކުރުމަށް އަލް ޝަރާ އެދިވަޑައިގަންނަވާނެ ކަމަށް ވަނީ ހާމަ ކޮށްފަ އެވެ.

ރަޝިޔާގެ ހިމާޔަތް ހޯއްދަވައިގެން އަލް އައްސަދު އުޅުއްވަމުން އަންނައިރު، އޭނާ ހައްޔަރު ކުރުމާއި، ޝަރީއަތުގެ ކުރި މައްޗަށް ގެނައުމަށް އަލް ޝަރާގެ ސަރުކާރުން ވަނީ ގިނަ މަސައްކަތް ތަކެއް ކޮށްފަ އެވެ.