ޖިރޯނާ ބަލިކޮށް، ރެއާލް އިން ފަރަގު ކުޑަ ކޮށްފި

ސްޕެނިޝް ލީގުގައި ޖިރޯނާއާ ދެކޮޅަށް ކުޅުނު މެޗުން މޮޅުވެ، ރެއާލް މެޑްރިޑުން އެއް ވަަނައިގައި އޮތް ބާސެލޯނާއާ ދެމެދު އޮތް ފަރަގު ކުޑަ ކޮށްފި އެވެ.

ޖިރޯނާގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު ރެއާލް އިން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ރެއާލް އިން ވަނީ އެއް ލަނޑު ޖަހައި ލީޑު ހޯދައިފަ އެވެ. އަދި ދެ ވަނަ ހާފުގައި އެ ޓީމުން ވަނީ އިތުރު ދެ ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ 36 ވަނަ މިނެޓުގައި ރެއާލް އަށް ލީޑު ނަގައިދިނީ އިންގްލެންޑުގެ ޖޫޑް ބެލިންހަމް އެވެ. ދެ ވަނަ ހާފު ފަށައިގެން ދިހަ ވަނަ މިނެޓުގައި ރެއާލްގެ ދެ ވަނަ ލަނޑު ޖެހީ އާޑާ ގުލާ އެވެ. އެ ލަނޑު ޖަހަން ގުލާ އަށް ފުރުސަތު ތަނަވަސްކޮށްދިނީ ބެލިންހަމް އެވެ. ދެ ވަނަ ލަނޑު ޖެހިތާ ހަތް މިނެޓު ފަހުން ރެއާލްގެ ތިން ވަނަ ލަނޑު ޖެހީ ފްރާންސްގެ ކެޕްޓަން ކީލިއަން އެމްބާޕޭ އެވެ. އެ ލަނޑު އޭނާ ޖެހީ ލޫކާ މޮޑްރިޗް ތަނަވަސްކޮށްދިން ފުރުސަތެއްގަ އެވެ.

މޮޅާއެކު ރެއާލް ދެ ވަނައިގައި އޮތީ މިހާތަަނަށް އެ ޓީމު ކުޅެފައިވާ 16 މެޗުން 36 ޕޮއިންޓާ އެކު އެވެ. އެއީ އެއް ވަަނައިގައި އޮތް ބާސެލޯނާ އަށް ވުރެ އެއް މެޗު މަދުންނެވެ. އެއް ވަނައިގައި ބާސެލޯނާ އޮތީ 17 މެޗުން 38 ޕޮއިންޓާ އެކު އެވެ. ދެ ޓީމުގެ ދެމެދުގައި އޮތް ފަރަގު މިހާރު މި ވަނީ ދެ ޕޮއިންޓަށް ކުޑަ ވެފަ އެވެ.