ސޫރިޔާގެ ރައީސް ވެރިރަށުން ފިއްލަވައިފި ކަމަށް ރިޕޯޓުތައް ބުނެފި

ސޫރިޔާގެ ރައީސް ބައްޝާރު އަލް-އަސަދު މަތިންދާބޯޓެއްގައި، ވެރިރަށް ދިމިޝްގް ދޫކޮށް ވަޑައިގެންފި ކަމަށް ރޮއިޓަރސް ނިއުސް އޭޖެންސީއިން، ސޫރިޔާ ގެ ދެ އިސް އޮފިސަރުންނަށް ހަވާލާދީ އާދިއްތަ ދުވަހު ރިޕޯޓުކޮށްފިއެވެ.

ހަނގުރާމައިގެ މޮނިޓަރ އެސް.އޯ.އެޗް.އާރު އިން ވެސް ބުނެފައިވަނީ ދިމިސްގު އެއަރޕޯޓުން ފުރި ޕްރައިވެޓް މަތިންދާބޯޓެއްގައި އަސަދު ދަތުރުކުރެއްވި ކަމަށް ލަފާކުރެވޭ ކަމަށެވެ. އެ ބޯޓު ފުރުމާއެކު އެއަރޕޯޓުގައި ތިބި ސަރުކާރުގެ ސިފައިން އެއަރޕޯޓު ދޫކޮށް ދިޔަ ކަމަށް ވެސް އެ ފަރާތުން ބުނެފައިވެއެވެ.

މި ޚަބަރު އައިސްފައިވަނީ ސޫރިޔާ ސަރުކާރާ ދެކޮޅު މީހުން ހައްޔަރުކޮށް ބަންދު ކޮށްގެން ގެންގުޅޭ ސައިދްނާޔާ ޖަލުގައި ތިބި މީހުންގެ ތެރެއިން އެތައް ހާސް ބަޔަކު ރައީސް އަސަދު އާ ދެކޮޅު ހަނގުރާމަވެރިން ގޮސް ދޫކޮށްލައިފި ކަމަށް ބުނެފައިވަނިކޮށްނެވެ.

ސޫރިޔާގެ ރައީސް ބައްޝާރް އަލް-އަސަދުގެ ސަރުކާރާ ދެކޮޅަށް ހަނގުރާމަ ކުރަމުންދާ އިސް ގްރޫޕް ކަމުގައި ހަޔިއަތު ތަޙްރީރް އަލް-ޝާމް (އެޗްޓީއެސް)ގެ ހަނގުރާމަވެރިން، ޓެލެގްރާމްގައި އިޢުލާނުކޮށްފައިވަނީ ޖަލުގައި ތިބި މީހުން ދޫކޮށްލެވިފައިވާ ކަމަށާއި، މިއީ ސައިދްނާޔާ ޖަލުގެ "އަނިޔާވެރިކަމުގެ ޒަމާނުގެ ނިމުން" ކަމުގައެވެ. ސޯޝަލް މީޑިއާގައި ދައުރުވަމުންދާ ބައެއް ވީޑިއޯތަކުގައި ފެންނަނީ މީހުން ޖަލުން ނުކުމެގެން އަންނަ މަންޒަރެވެ.

ޖަލުގައި ބަންދުކުރެވިފައި ތިބި މީހުންނާއި ގެއްލިފައިވާ މީހުންގެ ޖަމްޢިއްޔާއިން ބުނެފައިވަނީ ދޫކޮށްލެވުނު މީހުން ދަނީ ދިމިޝްގް އާ ކައިރީގައިވާ އަވަށަކަށް ކަމަށެވެ.

"އަހަރެމެންގެ ބާރުތައް ވަނީ ވެރިރަށް ދިމިޝްގަށް ވަންނަން ފަށާފައި" ހަނގުރާމަވެރިން އެމީހުންގެ ޓެލެގްރާމް ޗެނަލްގައި ބުނެފައިވެއެވެ.

އެޗް.ޓީ.އެސް އިން އިސްވެ އޮވެ ސަރުކާރާ ދެކޮޅަށް ފަށާފައިވާ ހަމަލާތަކުގައި ދެ ހަފްތާއަށްވުރެ ކުރު މުއްދަތެއްގެ ތެރޭގައި ސޫރިޔާގެ މައި ބޮޑެތި ސިޓީތަކުގެ ބާރު އެމީހުން ވަނީ ހޯދައިފައެވެ.

ސޫރިޔާގެ ރައީސް ބަޝާރު އަލް-އަސަދު މިހާރު ހުންނެވި ތަނެއް ސާފު ނުވާ ކަމަށް މީޑިއާ ރިޕޯޓުތައް ބުނެއެވެ. އޭނާގެ އޮފީހުން ބުނެފައިވަނީ އޭނާ އަދިވެސް ވެރި ރަށުގައި މަސައްކަތް ކުރައްވަމުންދާ ކަމަށެވެ. ނަމަވެސް އޭނާ ފެނިފައި ނުވާ ކަމަށް ރިޕޯޓުތަކުގައި ވެއެވެ.

އަނެއްކޮޅުން ވެރި ރަށުގެ ވަށައިގެންވާ ސަރަހައްދުތަކުގައި ތިބި ސަރުކާރު ސިފައިން ފިލައިފި ކަމަށް ދެކެވޭ ވާހަކަތައް ސޫރިޔާގެ ޑިފެންސް މިނިސްޓްރީން ވަނީ ދޮގު ކޮށްފައެވެ.

"ދިމިޝްގް ވަށައިގެންވާ ސަރަޙައްދުތަކުގައި ތިބި ސަރުކާރުގެ ހަތިޔާރުއެޅި ބާރުތައް އެތަންތަނުން ފައިބައިގެން ގޮސްފައިވާ ކަމަށް ބުނާ ޚަބަރުތަކުގައި އެއްވެސް ޙަޤީޤަތެއް ނެތް" ކަމަށް އެ މިނިސްޓްރީން ބުނެފައިވެއެވެ.

ހަނގުރާމައިގެ މޮނިޓަރަކާއި ހަނގުރާމަވެރިން ބުނެފައިވަނީ ސަރުކާރުގެ ބާރުތައް އިތުރަށް ފަހަތަށް ޖެހެމުންދާ ކަމަށާއި، އިދިކޮޅު ހަނގުރާމަވެރިން ތިބީ ދިމިޝގް އާ ވިއްސަކަށް ކިލޯމީޓަރު ހިސާބުގައި ކަމަށެވެ.

ބީބީސީ އިން ބުނާ ގޮތުގައި ވެރިކަން ކުރާ ސިޓީގައި ހިނގަމުންދާ ހަނގުރާމައިގެ ރިޕޯޓުތަކެއް ލިބިފައިވާ ކަމަށެވެ. އެ ސިޓީ ހނގުރާމަވެރިންގެ ބާރުތަކުން ވަށައިލައިފައިވާ ކަމަށް ބުނެވެއެވެ. 

ދިމިޝްގް ގެ ރަށްވެއްސަކު ސީ.އެން.އެން އަށް ކިޔައިދިން ގޮތުގައި ސަރުކާރާ ދެކޮޅު ބާރުތައް ބަރްޒެހް ސަރަޙައްދުގައި ތިބި ކަމަށާއި އަދި އެތާނގައި ހަމަނުޖެހުން ހިނގަމުންދާ ކަމަށެވެ. 

"ކަރަންޓު ކަނޑާލެވިފައިވޭ، އަދި އިންޓަރނެޓް ވަރަށް ބޮޑަށް ދަށްވެފައިވޭ، މީހުން ތިބީ އެމީހުންގެ ގެތަކުގައި" ކަމަށް އެ މީހާ ބުނި ކަމަށް ސީއެންއެން އިން ވަނީ ބުނެފައެވެ. 

ރޮއިޓަރސްއިން ބުނެފައިވަނީ އެ ފަރާތުން ދެ މީހަކާ ވާހަކަދައްކައިފައިވާ ކަމަށާއި، އެ މީހުން ބުނެފައިވަނީ ގަދަ އަޑުތަކާއެކު ބަޑިޖަހާ އަޑު އިވެމުންދާ ކަމަށެވެ. ނަމަވެސް މި އަޑުތައް އަންނަނީ ކޮން ދިމާލަކުންކަން ސާފު ނުވާ ކަމަށެވެ.