ގުރޫޕުގެ ދެ ވަނައިގައި ދިއްދޫ ދެ ވަނަ ބުރަށް

މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ގުރޫޕު އޭގެ ދެ ވަނަ ޓީމުގެ ގޮތުގައި ހއ.ދިއްދޫ މުބާރާތުން ދެ ވަނަ ބުރުގެ ޖާގަ ހޯދައިފި އެވެ.

ގުރޫޕު ސްޓޭޖުގެ ފަހު މެޗުަގައި ހޮނިހިރު ދުވަހުގެ ރޭ ގދ.ފަރެސްމާތޮޑާއާ ދެކޮޅަަށް ކުޅުނު މެޗު ދިއްދޫ އިން ކާމިޔާބު ކުރީ 4-2 އިންނެވެ. މެޗުގައި ފަރެސްމާތޮޑާ އިން ލަނޑު ޖަހައި ކުރި ހޯދާފައި ވަނިކޮށް، ދިއްދޫ އިން ވަނީ ފަހަތުން އަރައި މެޗުން މޮޅުވެފަ އެވެ.

މެޗު ފަށައިގެން ފަސް ވަނަ މިނެޓުގައި ފަރެސްމާތޮޑާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ މުޙައްމަދު ޢަބްދުއް ލަތީފް އެވެ. އޭނާ އެ ލަނޑު ޖެހީ ފަރެސްމާތޮޑާ އަށް ލިބުނު ޕެނަލްޓީއެއް ކާމިޔާބު ކޮށްގެންނެވެ. މެޗުގެ ފުރަތަމަ ހާފު ނިމުމުގެ ކުރިން ދެ ވަނަ ލަނޑެއް ޖަހައި ފަރެސްމާތޮޑާ އަށް ލީޑު ފުޅާ ކޮށްދިނީ ޝައިސުﷲ އަޝްރަފް އެވެ.

މެޗުގައި ދިއްދޫ އިން އެ ޓީމުގެ ލަނޑުތައް ޖެހީ ފަހު ވަގުތުގަ އެވެ. ދިއްދޫގެ ފުރަތަމަ ލަނޑު ހައިސަމް ރަޝީދު ޖެހިއިރު، ދިއްދޫ އަށް ނަތީޖާ ހަމަހަމަ ކޮށްދިން ލަނޑު ޖެހީ ވެސް ހައިސަމް އެވެ. މެޗުގައި ދިއްދޫ އަށް ލީޑު ލިބުނީ އާދަމް ނަސީމް ޖެހި ލަނޑުންނެވެ. އަދި މެޗުގައި ދިއްދޫގެ ހަތަރު ވަނަ ލަނޑު ޖެހީ ހައިސަމް އެވެ. ދިއްދޫ އަށް ލިބުނު ޕެނަލްޓީ ކާމިޔާބުކޮށް ހައިސަމް ވަނީ މެޗުގައި ހެޓްރިކް ހަމަކޮށްފަ އެވެ.

ދިއްދޫ އަށް މި ގުރޫޕުގެ ދެ ވަނަ ލިބެނީ އެ ޓީމު ކުޅުނު ހަތަރު މެޗުން ހަތް ޕޮއިންޓު ހޯދައިގެންނެވެ. ދިއްދޫ އަތުން ބަލިވި ފަރެސްމާތޮޑާ އޮތީ އެއްވެސް ޕޮއިންޓެއް ނުލިބި މި ގުރޫޕުގެ ފުލުގަ އެވެ.