މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ގުރޫޕު ސްޓޭޖުގެ ފަހު މެޗުގައި ދ.ކުޑަހުވަދޫގެ މައްޗަށް ކުރި ހޯދައި، ދ.މީދޫ އިން މުބާރާތުގެ ދެ ވަނަ ބުރުން ޖާގަ ހޯދައިފި އެވެ.
ހޮނިހިރު ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު މީދޫ އިން ކާމިޔާބު ކުރީ 2-1 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް މީދޫ އިންނެވެ. މެޗުގައި ދެ ޓީމުން ވސް ލަނޑުތައް ޖެހީ ދެ ވަނަ ހާފުގަ އެވެ.
އެގޮތުން މެޗުގެ ދެ ވަނަ ހާފުގައި މީދޫ އަށް ލީޑު ނަގައިދިނީ މުޒުދާން ޙަސަން އެވެ. އެއީ އެ ޓީމަށް ލިބުނު ޕެނަލްޓީއެއް ކާމިޔާބު ކޮށްގެން އޭނާ ޖެހި ލަނޑެކެވެ. އޭގެ ފަހުން މީދޫ އިން ވަނީ ދެ ވަނަ ލަނޑެއް ވެސް ޖަހައި ލީޑު ފުޅާ ކޮށްފަ އެވެ. އެއީ މެޗުގެ 82 ވަނަ މިނެޓުގައި އިބްރާހީމް އިމްރާން ޖެހި ލަނޑެވެ. މެޗުގައި ކުޑަހުވަދޫގެ ހަމައެކަނި ލަނޑު އެ ޓީމުން ޖެހީ މެޗުގެ 90 ވަނަ މިނެޓުގަ އެވެ. އެއީ މުޙައްމަދު ޔާމީން ޖަހައިދިން ލަނޑެކެވެ.
މޮޅާއެކު މީދޫ ދެ ވަނަ ބުރުގެ ޖާގަ ހޯދީ ގުރޫޕު އޭގެ ތިން ވަނަ ޓީމުގެ ގޮތުގަ އެވެ. މި ގުރޫޕުގައި ކުޅުނު ހަތަރު މެޗުން މީދޫ އަށް ލިބެނީ ހަތް ޕޮއިންޓެވެ. މީދޫ އަތުން ބަލިވި ކުޑަހުވަދޫ ހަތަރު ވަނައިގައި އޮތީ ތިން ޕޮއިންޓާ އެކު އެވެ. މި ގުރޫޕުގެ އެއް ވަނައިގައި ފުވައްމުލައް ސިޓީ ވަނީ ދެ ވަނަ ބުރުން ޖާގަ ހޯދައިފަ އެވެ.
