އިސްރާއީލުން ބޮން އަޅާ ނުސީރާތުގައި މަދުވެގެން 20 ފަލަސްތީނުން މީހުން ޝަހީދު ކޮށްލައިފި
2023 ވަނަ އަހަރުގެ އޮކްޓޯބަރު މަހުން ފެށިގެން ޣައްޒާއަށް އިސްރާއީލުން ދެމުންދާ އަނިޔާވެރި ހަމަލާތަކުގެ ސަބަބުން މިހާތަނަށް މަދުވެގެން 44,612 ފަލަސްތީނު މީހުން ޝަހީދުވެފައިވާ ކަމަށް ރެކޯޑްކުރެވިފައިވެއެވެ.
އިޒްރޭލުން ބޮން އެޅުމުގެ ސަބަބުން ރޯވެފައިވާ އިމާރަތެއްގެ އަލިފާން ނިއްވުމަށް އާންމުން މަސައްކަތް ކުރަނީ
ހުކުރު ދުވަހުގެ ރޭ ޣައްޒާގެ މެދުތެރޭގައި އޮންނަ ނުސީރާތު ރެފިއުޖީ ކޭމްޕްގެ ގެއަކަށް އިސްރާއީލުން ބޮން އަޅާ 6 ކުޑަކުދިން ހިމެނޭ ގޮތަށް މަދުވެގެން 20 ފަލަސްތީނުން މީހުން ޝަހީދުވެއްޖެ ކަމަށް ވަފާ ނިއުސް އޭޖެންސީން ބުނެފިއެވެ.
ވަފާގެ ނޫސްވެރިޔާ ހާމަ ކުރި ގޮތުގައި އިސްރާއީލުގެ ހަނގުރާމަމަތީ މަތިންދާބޯޓުތަކުން ބޮން އެޅުމުގެ ސަބަބުން 6 ކުޑަކުދިންގެ އިތުރުން 5 އަންހެނުންވެސް ޝަހީދުވިއެވެ. ކައިރީގައި ހުރި ގެތަކުން އިތުރު ބަޔަކަށް އަނިޔާވި ކަމަށް ވެސް ބުނެފައިވެއެވެ.
މަރުވި މީހުންގެ ހަށިތައް ދީރުލް ބަލާހުގެ އަލް-އަޤްސާ ޝަހީދުންގެ ހޮސްޕިޓަލަށް ވަނީ ގެންގޮސްފައެވެ.
އެހެން ހާދިސާއެއްގައި، ނުސީރާތުގައި ގެދޮރު ގެއްލިފައިވާ އާއިލާތައް ދިރިއުޅޭ ޓެންޓުތަކަށް އިސްރާއީލުން އާޓިލަރީން ހަމަލާދިނުމުގެ ސަބަބުން ކުޑަ އަންހެން ކުއްޖަކު މަރުވެފައިވެއެވެ.
އަދި ހަމައެއާއެކު، އިސްރާއީލުގެ ބާރުތަކުން ޣައްޒާއަށް ހަމަލާދިނުން ކުރިއަށް ގެންދިޔައިރު، ހުކުރު ދުވަހުގެ ފަތިހުން ފެށިގެން ޣައްޒާގައި މަރުވި މީހުންގެ އަދަދު 63 އަށް އަރާފައިވާ ކަމަށް ސިއްޙީ މަސްދަރުތަކުން ބުނެފިއެވެ..
2023 ވަނަ އަހަރުގެ އޮކްޓޯބަރު މަހުން ފެށިގެން ޣައްޒާއަށް އިސްރާއީލުން ދެމުންދާ އަނިޔާވެރި ހަމަލާތަކުގެ ސަބަބުން މިހާތަނަށް މަދުވެގެން 44,612 ފަލަސްތީނު މީހުން ޝަހީދުވެފައިވާ ކަމަށް ރެކޯޑްކުރެވިފައިވެއެވެ. އަދި 105,834 އަށްވުރެ ގިނަ މީހުން ޒަޚަމްވެފައިވެއެވެ.
އިސްރާއީލުގެ ހަމަލާތަކުގެ ސަބަބުން އެމަރޖެންސީ އަދި ސިވިލް ޑިފެންސް ޓީމުތަކަށް ވާސިލު ވެވޭނެ ގޮތެއް ނެތި އެތައް ހާސް މީހުންގެ ހަށިތައް ފުނޑުވެފައިވާ އިމާރާތްތަކުގެ ދަށުގައި ވާ ކަމަށް ބެލެވެއެވެ.
އދ. ގެ ސެކިއުރިޓީ ކައުންސިލުން ވަގުތުން ހަނގުރާމަ ހުއްޓާލުމަށް ގޮވާލައި، އަދި ބައިނަލްއަޤްވާމީ ކޯޓުން ޣައްޒާގައި ނަސްލު ނައްތާލުމަށް ހިންގާ ހަނގުރާމަ ވަގުތުން ހުއްޓާލުމަށާއި ނާޒުކު އިންސާނީ ޙާލަތު ރަނގަޅުކުރުމަށް ފިޔަވަޅު އެޅުމަށް އަންގާފައިވީ ނަމަވެސް، އިސްރާއީލުން އެ ކަންކަމަށް އެއްވެސް ފަރުވާލެއް ނުބަހައްޓާ ނަސްލު ނައްތާލުމުގެ ހަމަލާތައް މެދުކެނޑުމެއް ނެތި ކުރިއަށް ގެންދަމުންދާތާ އަހަރަކަށް ވުރެ ގިނަ ދުވަސް މިހާރު ވަނީ ފާއިތުވެފައެވެ.
