އިޓާލިއަން ލީގުގައި ޕާމާއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން އިންޓަ މިލާން އިން ލީގު ތާވަލްގެ ތިން ވަނަ އަށް ޖެހިލައިފި އެވެ.

އިންޓަގެ އަމިއްލަ ދަނޑުގައި ހުކުރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 3-1 އިންނެވެ. މެޗުގެ ފުރަތަމަ ހާފުގައި އިންޓަ އިން ވަނީ އެއް ލަނޑު ޖަހައި ލީޑު ނަގައިފަ އެވެ. އަނެއް ދެ ލަނޑު އެ ޓީމުން ފަހު ހާފުގައި ޖެހިއިރު، މި ހާފުގައި ޕާމާ އިން ވެސް ވަނީ ލަނޑެއް ޖަހައިފަ އެވެ.

މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން ފަސް މިނެޓަށް ވެފައި ވަނިކޮށް އިންޓަ އަށް ލީޑު ނަގައިދިނީ ފެޑެރިކޯ ޑިމާކޯ އެވެ. އޭގެ ފަހުން ދެ ވަނަ ހާފު ފަށައިގެން އަށް ވަނަ މިނެޓުގައި ނިކޮލޯ ބަރެއްލާ ވަނީ އިންޓަގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. މެޗުގައި އިންޓަގެ ތިން ވަނަ ލަނޑު، 66 ވަނަ މިނެޓުގައި ޖެހީ މާކަސް ތުރަމް އެވެ. އޭގެ ފަހުން މެޗުގައި ޕާމާގެ ހަމައެކަނި ލަނޑަކީ އިންޓަގެ މަތެއޯ ޑާމިއަން އަތުން 81 ވަނަ މިނެޓުގައި ބައި ކޮޅަށް ވަތް ލަނޑެކެވެ.

މޮޅާއެކު އިންޓަ ތިން ވަނައިގައި އޮތީ މިހާތަނަށް އެ ޓީމު ކުޅެފައިވާ 14 މެޗުން 31 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އޮތް ނަޕޯލީ އަށް ލިބެނީ 32 ޕޮއިންޓެވެ. ދެ ޓީމަށް ވުރެ ވެސް އެއް މަދު އިތުރަށް ކުޅެގެން އެއް ވަަނައިގައި އެޓަލަންޓާ އަށް ލިބެނީ 34 ޕޮއިންޓެވެ.