އާއްމު ރައްޔިތުންގެ ކުރިއެރުމާއި ތަނަވަސްކަމަށް އެއްވެސްކަމެއް ނުކުރެވި އެކިއެކި ޓެކްސްތައް އިންތިހާއަށް ބޮޑުވެފައިވާ ކަމަށް އޭނާ ވަނީ ވިދާޅުވެފަ
ރާއްޖެޓީވީގެ ފަށާއިރު ޕްރޮގްރާމްގައި ކުޅުދުއްފުށީގެ މޭޔަރ އާތިފް ބައިވެރިވަޑާއިގަންނަވަނީ
މިއަދާއި ހަމައަށް އައި އިރު ރަނގަަޅަށް ހިނގަ ހިނގާ އޮތް އާރްޓީއެލް ނިޒާމް އަލުން އަނެއްކާވެސް ފިރުކޭ މަންޒަރު ފެންނަމުންދާ ކަމަށް ކުޅުދުއްފުށި ސިޓީގެ މޭޔަރ މުހައްމަދު އާތިފް ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުންނެވެ.
ސަރުކާރުން ކުރިއަށް ގެންދާ ހުރިހާ މަޝްރޫޢު އެއް ކުޅުދުއްފުށީގައި ހުރީ ހުއްޓިފައި ކަމަށާއި އަދި އިގްތިސާދަށް ކުރަމުންދާ ނޭދެވޭ އަސަރު އާއްމުންނަށް ވެސް ކުރަމުންދާ ކަމަށާއި އިގްތިސާދީ ހީނަރުކަމުގެ އިހުސާސް އާއްމުންނަށް މިހާރު ވާން ފަށާފައިވާ ކަމަށް އޭނާ ވަނީ ވިދާޅުވެފައެވެ. މީގެ އިތުރުން ނިމިދިޔަ ސަރުކާރުން ގެނެސްދިން އެންމެ ރަނގަޅު އެއް ޕްރޮޖެކްޓަކީ އާރްޓީއެލް ނިޒާމް ކަމަށް އޭނާ ވިދާޅުވިއެވެ. އެހެންނަމަވެސް އާރްޓީއެލް ނިޒާމަށް ބޭނުންވާ މަރާމާތުގެ މަސައްކަތްތައް ހަމަނުޖެހުމުން އެ ނިޒާމަށް ލޮޅުން އައިސްފައިވާ ކަަމަށް އޭނާ ވިދާޅުވިއެވެ. އެގޮތުން ރޫޓްތައް ކެންސަލްވުމާއި، ހުއްޓުމުގެ މައްސަލަ ދިމާވާ ކަމަށް އޭނާ ވިދާޅުވިއެވެ. ހަމައެހެންމެ މަޝްރޫޢުތައް ހުއްޓިފައި ހުރުމަކީ ވެސް ބަލައިގަނެވޭކަމެއް ނޫންކަން ފާހަގަކުރައްވާ އާތިފް ވަނީ ކުޅުދުއްފުށީގެ މަޝްރޫޢުތައް ހުއްޓިފައިވާތީ ކަންބޮޑުވުން ފާޅުކުރައްވާފައެވެ.
ކުޅުދުއްފުށީ ކަރަންޓުގެ މައްސަލަ މޭޔަރު ފާހަގަކުރެއްވި އިރު، އެ ސިޓީގެ ކަރަންޓް ކެޕޭސިޓީ އިތުރުކޮށް އަލަށް އަޅަން ފެށި ޕަވަރ ހައުސްގެ މަސައްކަތް މި ސަރުކާރުން ވަނީ ހުއްޓާލާފައެވެ. އެކަމާއި މެދު އާއްމުން ވެސް ވަނީ ކަންބޮޑުވުން ފާޅުކޮށްފައެވެ. އަދި ވިޔަފާރިތައް ހުއްޓުމާއި، ވިޔަފާރި ހިންގަން ދަތިވުމަކީ ވެސް އެ ސިޓީ އަށް ދިމާވެފައިވާ މައްސަލަތަކެވެ. އާއްމު ރައްޔިތުންގެ ކުރިއެރުމާއި ތަނަވަސްކަމަށް އެއްވެސްކަމެއް ނުކުރެވި އެކިއެކި ޓެކްސްތައް އިންތިހާއަށް ބޮޑުވެފައިވާ ކަމަށް އޭނާ ވަނީ ވިދާޅުވެފައެވެ.
