ކުޅުދުއްފުށީގެ ވިޔަފާރި ބަނދަރަކީ މިހާރަށްވުރެ ސްކޯޕް ބޮޑުކޮށް ތަރައްޤީ ކުރެވެން ޖެހޭ ބަނދަރެއް: މޭޔަރު އާތިފް

ހދ. ކުޅުދުއްފުށީގެ ވިޔަފާރި ބަނދަރަކީ މިހާރަށްވުރެ ސްކޯޕް ބޮޑުކޮށް ތަރައްޤީ ކުރެވެން ޖެހޭ ބަނދަރެއް ކަމަށް ކުޅުދުއްފުށީ ސިޓީގެ މޭޔަރު މުޙައްމަދު އާތިފް ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަވަމުން އާތިފް ވިދާޅުވީ ބޮޑެތި ބޯޓު ފަހަރުތައް އެ ބަނދަރަށް ގާތް ކުރެވޭނެ ގޮތް ހެދުމަށް ސަރުކާރުން އެމްޓީސީސީއާ ޕްރޮޖެކްޓެއް ހަވާލުކޮށްފައިވާ ކަމަށާއި މި ޕްރޮޖެކްޓްގެ ދަށުން ބަނދަރުގެ އިތުރު ވަސީލަތްތައް ވެސް ތަރައްޤީ ކުރުމަށް ހަމަޖެހިފައިވާ ކަމަށެވެ.

މި މަޝްރޫއު ނިމުމުން މިހާރަށްވުރެ ބޮޑަށް ރައްޔިތުންނަށް އެ ބަނދަރުގެ ފައިދާ ލިބިގެންދާނެ ކަމަށާއި އެ ސިޓީއަކީ އެ ސަރަހައްދުގެ މައި ވިޔަފާރި ސިޓީ ކަމަށް ވެސް މޭޔަރު އާތިފް ވިދާޅުވިއެވެ.

މީގެއިތުރުން މި މަޝްރޫއުގެ ސަބަބުން އެ ސަރަހައްދުގެ އެކި ރަށްތަކުގެ ރައްޔިތުންނަށް ވެސް ފައިދާ ވެގެންދާނެ ކަމަށް މޭޔަރު ވިދާޅުވިއެވެ.

ކުޅުދުއްފުށީ ރީޖަނަލް ޕޯޓާއި ތިނަދޫ ރީޖަނަލް ޕޯޓު ތަރައްގީ ކުރުމުގެ ދެވަނަ ފިޔަވަހީގެ މަސައްކަތްކުރުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީއާ ހަވާލުކޮށްފައިވަނީ މިއަހަރުގެ ޖެނުއަރީ މަހުގައެވެ.

ކުޅުދުއްފުށި ރީޖަނަލް ޕޯޓުގެ ރި-ޑިވެލޮޕްމަންޓް މަޝްރޫއުގެ ދަށުން، ފަޅު ފުންކުރުމާއި އައު މަގަތު ފާލަމެއް ހެދުމުގެ އިތުރުން ރިވެޓްމަންޓް ޖެހުމާއި ނެރުބައްތި ޖެހުން ހިމެނެއެވެ. މީގެއިތުރުން، އޮފީސް އިމާރާތެއް އެޅުމާއި ވޯރކްޝޮޕް އިމާރާތެއް އެޅުމާއި އެންވަރަންމެންޓަލް އިމްޕެކްޓް އެސަސްމެންޓެއް ހެދުން ހިމެނޭކަމަށް އެމްޕީއެލުން ބުނެއެވެ.

ތިނަދޫ ރީޖަނަލް ޕޯޓު ތަރައްގީ ކުރުމުގެ މަޝްރޫއުގެ ދެވަނަ ފިޔަވަހީގެ ދަށުން ޕޯޓް އޮފީހުން އިމާރާތެއް އެޅުމާއި، ގާޑް ހައުސް އިމާރާތަކާއި ވެއަރ ހައުސް އަދި ވޯރކްޝޮޕް އިމާރާތެއްގެ އިތުރުން ނެރުބައްތި ހަރުކުރުމާއި ފެންޑަރ ހަރުކުރުން ހިމެނެއެވެ. އެމްޕީއެލުން ބުނީ ކުޅުދުއްފުށީ ރީޖަނަލް ޕޯޓުގެ މަސައްކަތް ހަވާލުކޮށްފައިވަނީ 138.9 މިލިއަން ރުފިޔާއަށް ކަމަށެވެ. މަސައްކަތް ނިންމުމަށް ހަވާލު ކޮށްފައިވަނީ 495 ދުވަހުގެތެރޭގައެވެ.

އަދި ތިނަދޫ ރީޖަނަލް ޕޯޓުގެ މަސައްކަތް ހަވާލުކޮށްފައިވަނީ 17.8 މިލިއަން ރުފިޔާއަށެވެ. މަސަައްކަތް ނިންމުމަށް ހަމަޖެހިފައިވަނީ 330 ދުވަހުންނެވެ.