އިސްރާއީލުން ޣައްޒާ ސްޓްރިޕްގައި ޝަހީދު ކޮށްލި މީހުންގެ އަދަދު 44,580 އަށް ވުރެ އިތުރުވެއްޖެ
6 ޑިސެމްބަރު 2024 | ހުކުރު 06:05އިސްރާއީލުގެ ހަމަލާތަކުގައި ޝަހީދުވި މީހުންގެ ތެރޭގައި ގިނައީ ކުޑަކުދިންނާއި އަންހެނުން ކަމަށް ރެކޯޑް ކުރެވިފައިވާއިރު، މި ހަމަލާތަކުގައި ޒަޚަމްވި މީހުންގެ އަދަދު 105,739 ށް ވަނީ އަރާފައެވެ.
ދީރް އަލް ބަލާހްގެ އަލް އަޤްޞާ މާޓިއާސް ހޮސްޕިޓަލަށް އިޒްރޭލުން ދިން ހަމަލާއެއްގައި ޝަހީދުވި ފަލަސްތީނުގެ މީހެއްގެ ހަށިގަނޑު ގެންދަނީ (ފައިލް)
ޣައްޒާގެ ސިއްހީ އޮފިޝަލުން ހާމަ ކުރި ގޮތުގައި ވޭތުވެދިޔަ 24 ގަޑިއިރުގެ ތެރޭގައި އިސްރާއީލުގެ ބާރުތަކުން ޣައްޒާ ސްޓްރިޕްގައި 5 ގަތުލުއާންމު ހިންގައި، 48 އާންމު ރައްޔިތުން ޝަހީދުވެ، 201 މީހުން ޒަޚަމްވެއްޖެ އެވެ.
2023 ވަނަ އަހަރުގެ އޮކްޓޯބަރ 7 ވަނަ ދުވަހު ޣައްޒާ ސްޓްރިޕްގެ މައްޗަށް އިސްރާއީލުން ހިންގަން ފެށި އުދުވާނީ ހަމަލާތަކުގައި މަރުވެފައިވާ މީހުންގެ އަދަދު 44,580 އަށް ވަނީ އަރާފައިވެއެވެ. މީގެ ތެރެއިން ގިނައީ ކުޑަކުދިންނާއި އަންހެނުންނެވެ. މި ހަމަލާތަކުގައި 105,739 މީހުން ޒަޚަމްވެފައިވެއެވެ.
އަނެއްކޮޅުން އެތައް ހާސް މީހުން އަދިވެސް ވަނީ ސުންނާފަތިވެފައިވާ ޢިމާރާތްތަކުގެ ތެރޭގައި ވަޅުޖެހި ގެއްލިފައެވެ. ގިނަ އަދަދެއްގެ ބައެއްގެ ހަށިތައް މަގުތަކުގެ އެތަންމިތާގައި ވިއްސިވިހާލިވެފައިވާ ކަމަށް ވެސް ވަނީ ބެލެވިފައެވެ. އެމްބިއުލާންސްތަކާއި ސިވިލް ޑިފެންސްގެ ޓީމްތަކަށް އެ މީހުންނާ ހަމައަށް ދިއުމަށް ވަނީ ދަތިތަކާ ކުރިމަތިވެފައެވެ. އެއީ އިސްރާއީލުގެ ހަމަލާތައް މެދުނުކެނޑި ކުރިއަށްދާތީއާއި، ސުންނާފަތި ވެފައިވާ އިމާރާތްތަކުގެ އަދަދު ގިނަ ވުމާއި، އުޅަނދުތަކަށް ބޭނުންވާ ތެލާއި ވަސީލަތްތައް ނުލިބުމުގެ ސަބަބުން ކަމަށް ޣައްޒާގެ އޮފިޝަލުން ވަނީ ބުނެފައެވެ.
އިޒްރޭލުގެ އުދުވާނީ ހަމަލާތަކުގައި ޣައްޒާގައި މަރުވެފައިވާ މީހުންގެ ތަފާސްހިސާބުތައް ފުރިހަމައެއް ނޫން ކަމަށްވެސް އޮފިޝަލުން ވަނީ ހާމަކޮށްފައެވެ. އެއީ އިސްރާއީލުގެ ގަދަފަދަ ހަމަލާތަކުގެ ސަބަބުން، މުވާސަލާތީ އަދި އިންޓަނެޓް ޚިދުމަތްތައް ތަކުރާރުކޮށް މެދުކެނޑުމާއި، އޮފިޝަލުންނަށް ބޭނުންވާ ވަސީލަތްތައް ހަލާކުވެފައިވުމުގެ ސަބަބުން ތަފާސްހިސާބު ރެކޯޑުކުރުމަށް ދަތިތަކާ ކުރިމަތިވެފައިވާތީ ކަމަށް ވެސް އޮފިޝަލުން ވަނީ ބުނެފައެވެ.
