ފަހު މެޗުގައި ފުވައްމުލަކުން ފަރެސްމާތޮޑާ ވެސް ބަލިކޮށްފި

މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ގުރޫޕު އޭގެ ފަހު މެޗުގައި ފަރެސްމާތޮޑާއާ ދެކޮޅަށް ކުޅުނު މެޗުން ވެސް މޮޅުވެ، ފުވައްމުލައް ސިޓީން އެ ޓީމުގެ މޮޅުވުމުގެ ރެކޯޑު ދަމަހައްޓައިފި އެވެ.

ބުދަ ދުވަހުގެ ރޭ ގަލޮޅު ރަސްމީ ދަނޑުގައި ފަރެސްމާތޮޑާއާ ދެކޮޅަށް ނިކުތްއިރު ވެސް ފުވައްމުލަކަށް ވަނީ މުބާރާތުގެ ދެ ވަނަ ބުރުގެ ޖާގަ ކަށަވަރުވެފަ އެވެ. މުބާރާތުގައި ރަނގަޅު ކުޅުމެއް ދައްކަމުން އަންނަ ފުވައްމުލަކުން ފަރެސްމާތޮޑާގެ މައްޗަށް ކުރި ހޯދީ 5-0 ގެ ތަފާތު ބޮޑު ނަތީޖާ އަކުންނެވެ.

ފަރެސްމާތޮޑާއާ ދެކޮޅަށް ކުޅުނު މެޗުގައި ފުވައްމުލަކުގެ ލަނޑުތައް ޖެހީ އެ ޓީމަށް ކުޅެމުން އަންނަ ބިދޭސީ ކުޅުންތެރިޔާ ކޯފީ އޮވޫސާ އެވެ. މީގެ ކުރިން ވެސް ރާއްޖޭގައި ކުޅެފައިވާ ކޯފީ އަންނަނީ މުބާރާތުގައި މޮޅު ކުޅުމެއް ދައްކަމުންނެވެ. މި މެޗުގައި އޭނާ ވަނީ ތިން ލަނޑު ޖަހައި ހެޓްރިކް ވެސް ހަމަކޮށްފަ އެވެ. މެޗުގައި ފުވައްމުލަކުގެ މުޙައްމަދު އިޔާޝް އަޙުމަދު ވެސް ވަނީ ލަނޑެއް ޖަހައިފަ އެވެ. މެޗުގައި ފުވައްމުލަކުގެ އަނެއް ލަނޑަކީ ފަރެސްމާތޮޑާ ކުޅުންތެރިޔެއްގެ ބައި ކޮޅަށް ވަތް ލަނޑެވެ.

މޮޅާއެކު ފުވައްމުލައް އޮތީ ގުރޫޕު އޭގެ އެއް ވަނައިގަ އެވެ. އެއީ ގްރޫޕް ސްޓޭޖުގައި ކުޅުނު ހަތަރު މެޗުން ވެސް މޮޅުވެ، 12 ޕޮއިންޓާ އެކު އެވެ. ދެ ވަނައިގައި ހއ.ދިއްދޫ އަށް ލިބެނީ ތިން ޕޮއިންޓެވެ. ތިން ވަނައިގައި އޮތް ދ.މީދޫ އަށް ވެސް ލިބެނީ ތިން ޕޮއިންޓެވެ. ހަތަރު ވަނައިގައި ދ.ކުޑަހުވަދޫ އޮތްއިރު، މި ގުރޫޕުގެ ފުލުގައި އޮތީ ފަރެސްމާތޮޑާ އެވެ.