ގުރޫޕުގެ ތިން ވަނައިގައި މާފުށި ދެ ވަނަ ބުރަށް
މާފުށިން ދެ ވަނަ ބުރުގެ ޖާގަ ހޯދީ މި ގުރޫޕުގެ ތިން ވަނަ ޓީމުގެ ގޮތުގަ އެވެ. އެއީ ގުރޫޕުގައި ކުޅުނު ތިން މެޗުން ހަތަރު ޕޮއިންޓާ އެކު އެވެ.
މާފުއްޓާއި އަލިފުށި ކުޅުނު މެޗުގެ ތެރެއިން
މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ގުރޫޕު ސްޓޭޖުގެ ފަހު މެޗުގައި ރ.އަލިފުއްޓާ ދެކޮޅަށް ކުޅުނު މެޗުން މޮޅުވެ، ކ.މާފުށިން މުބާރާތުގެ ދެ ވަނަ ބުރުގެ ޖާގަ ހޯދައިފި އެވެ.
ގުރޫޕު ޑީ ގައި ބުދަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު މާފުށިން ކާމިޔާބު ކުރީ 1-0 އިންނެވެ. އެ މެޗާ ކުރިމަތިލީއިރު ވެސް އަލިފުއްޓަށް ވަނީ މުބާރާތުގެ ދެ ވަނަ ބުރުގެ ޖާގަ ކަށަވަރުވެފަ އެވެ. އޭގެ އިތުރުން ޅ.ނައިފަރަށް ވެސް ވަނީ މި ގުރޫޕުން ދެ ވަނަ ބުރުގެ ޖާގަ ލިބިފަ އެވެ.
މެޗުގައި މާފުށިން ލަނޑު ޖެހީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން ދެ ވަނަ މިނެޓުގައި މާފުއްޓަށް ލަނޑު ޖަހައި ލީޑު ނަގައިދިނީ އިސްމާއީލް ނަޒީހު އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ އިބްރާހިމް އަތީޤު އެވެ. މާފުށިން އެ ލަނޑު ޖެހީ އަލިފުށީގެ ގޯލު ކީޕަރަށް ހެދުނު ގޯހެއްގައި ލިބުނު ބޯޅައަކުންނެވެ. މެޗުގައި އަލިފުށިން ވަނީ ލަނޑު ޖަހައި ނަތީޖާ ހަމަހަމަ ކުރާނެ ފުރުސަތުތަކެއް ތަނަަވަސްކޮށްފަ އެވެ. ނަމަވެސް އެ ޓީމަށް އެ ފުރުސަތުގެ ބޭނުން ކުރެވޭ ގޮތެއް ނުވި އެވެ.
މި ނަތީޖާ އާއެކު މާފުށިން ދެ ވަނަ ބުރުގެ ޖާގަ ހޯދީ މި ގުރޫޕުގެ ތިން ވަނަ ޓީމުގެ ގޮތުގަ އެވެ. އެއީ ގުރޫޕުގައި ކުޅުނު ތިން މެޗުން ހަތަރު ޕޮއިންޓާ އެކު އެވެ. އެއް ވަނަ އަލިފުއްޓަށް ލިބެނީ ތިން މެޗުން ހަ ޕޮއިންޓާ އެކު އެވެ. ދެ ވަނައިގައި އޮތް ނައިފަރަށް ވެސް ތިން މެޗުން ލިބެނީ ހަ ޕޮއިންޓެވެ.
