މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ގުރޫޕު ސްޓޭޖުގެ ފަހު މެޗުގައި ބ.ކެންދޫއާ ދެކޮޅަށް ކުޅުނު މެޗުން މޮޅުވެ، ޅ.ނައިފަރުން މުބާރާތުގެ ދެ ވަނަ ބުރުން ޖާގަ ހޯދައިފި އެވެ.
ގުރޫޕު ޑީ ގައި އަންގާރަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު ނައިފަރުން ކާމިޔާބު ކުރީ 2-1 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ކެންދޫ އިންނެވެ. ނަމަވެސް ނައިފަރުން ވަނީ ފަހަތުން އަރައި ދެ ލަނޑު ޖަހައިގެން މެޗުން މޮޅުވެފަ އެވެ.
މެޗު ފަށައިގެން ދެ ވަނަ މިނެޓުގައި ކެންދޫ އިން ވަނީ ނައިފަރު ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު ޖަހައި ކެންދޫ އަށް ކުރި ހޯދައިދިނީ މަލްސޫން ޔާމީން އެވެ. އޭނާ ފޮނުވާލި ބޯޅަ މަތަކުރުމަށް ނައިފަރުގެ ކީޕަރު މަސައްކަތް ކުރ ވަގުތު، ބޯޅަ ގޯލަށް ވަނީ އޭނާގެ އަތް ދަށުންނެވެ.
ނަމަވެސް މެޗުގެ 19 ވަނަ މިނެޓުގައި ނައިފަރުން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެއީ އިމްރާން މުޙައްމަދު ޖެހި ލަނޑުންނެވެ. އޭގެ ފަހުން މެޗުގެ ދެ ވަނަ ހާފުގައި އިމްރާން ވަނީ ދެ ވަނަ ލަނޑެއް ވެސް ޖަހައި، މެޗުން ނައިފަރު މޮޅު ކޮށްދީފަ އެވެ. މެޗުގައި ނައިފަރުގެ އިތުރުން ކެންދޫ އަށް ވެސް ވަނީ އިތުރު ލަނޑު ޖަހަން ފުރުސަތު ލިބިފަ އެވެ.
މޮޅާއެކު ނައިފަރުން ދެ ވަނަ ބުރުގެ ޖާގަ ހޯދީ މި ގުރޫޕުގެ ދެ ވަނަ ޓީމުގެ ގޮތުގަ އެވެ. ތިން މެޗުން ނައިފަރަށް ލިބެނީ ހަ ޕޮއިންޓެވެ. އެއް ވަނައިގައި އޮތް ރ.އަލިފުއްޓަށް ހަ ޕޮއިންޓު ލިބެނީ ދެ މެޗު ކުޅެގްނެނެވެ. ގުރޫޕު ސްޓޭޖުގެ ފަހު މެޗުގައި އަލިފުށި ނިކުންނާނީ މާފުއްޓާ ދެކޮޅަށެވެ.
