ގުރައިދޫ އާއި ކުރެންދޫ ވެސް ދެ ވަނަ ބުރަށް

މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ގުރޫޕު ސީގެ ފަހު މެޗުގައި ކ.ގުރައިދޫއާ ދެކޮޅަށް ކުޅުނު މެޗުން ޅ.ކުރެންދޫ މޮޅުވެއްޖެ އެވެ.

ގަލޮޅު ރަސްމީ ދަނޑުގައި އަންގާރަ ދުވަހުގެ ހަވީރު ކުޅުނު މެޗު ކުރެންދޫ އިން ކާމިޔާބު ކުރީ 1-0 އިންނެވެ. މެޗުގައި ކުރެންދޫ އިން ލަނޑު ޖެހީ ދެ ވަނަ ހާފުގަ އެވެ. ކުރެންދޫއާ ދެކޮޅަށް ނިކުތްއިރު ވެސް، ގުރައިދޫ އަށް ދެ ވަނަ ބުރުން އޮތީ ޖާގަ ލިބިފަ އެވެ.

މެޗުގައި ދެ ޓީމަށް ވެސް ވަނީ ލަނޑު ޖަހާނެ ފުރުސަތުތަކެއް ލިބިފަ އެވެ. މެޗުގައި ގުރައިދޫ އިން ލަނޑު ޖެހުމަށް މަސައްކަތް ކުރި ނަމަވެސް، އެކަން ކާމިޔާބުވާ ގޮތެެއް ނުވި އެވެ. މެޗުގެ 67 ވަނަ މިނެޓުގައި ކުރެންދޫ އަށް ލަނޑު ޖަހައި ލީޑު ނަގައިދިނީ އެ ޓީމުގެ ބިދޭސީ ކުޅުންތެރިޔާ ޖޯޑީ ބާޓް އެވެ. ކުރެންދޫ އިން ލީޑު ނެގި ފަހުން ވެސް ގުރައިދޫން އިން ވަނީ ނަތީޖާ ހަމަހަމަ ކުރުމަށް ވަރަށް ބޮޑަށް މަސައްކަތް ކޮށްފަ އެވެ.

މެޗުން މޮޅުވެ ކުރެންދޫ އިން މުބާރާތުގެ ދެ ވަނަ ބުރުގެ ދެ ވަނަ ބުރުގެ ޖާގަ ހޯދިއިރު، ގުރައިދޫ އަށް ވެސް ވަނީ ދެ ވަނަ ބުރުގެ ޖާގަ ލިބިފަ އެވެ. ގުރޫޕު ސްޓޭޖުގައި ކުޅުނު ތިން މެޗުން ދެ ޓީމަށް ވެސް ލިބެނީ ހަތަރު ޕޮއިންޓެވެ. ގުރައިދޫ އަށް ދެ ވަނަ ލިބޭއިރު ކުރެންދޫ އަށް ލިބެނީ ތިން ވަނަ އެވެ. ހަތަރު ވަނައިގައި އޮތީ ތިން ޕޮއިންޓާ އެކު ކ.ހުރާ އެވެ. މި ގުރޫޕުގެ އެއް ވަަނައިގައި ދެ ވަނަ ބުރުން ޖާގަ ހޯދީ އައްޑޫ ސިޓީ އެވެ.