ޣައްޒާ އަށް ހަމަލާ ދިނުން ހުއްޓުމެއް ނެތް، ފަތަހް އާއި ހަމާސް ބައްދަލު ކޮށްފި

އާދިއްތަ ދުވަހާއި ހޯމަވިލޭރޭ ވެސް އިސްރާއީލުގެ ބާރުތަކުން ޣައްޒާއަށް ވަނީ ބޮން އަޅާފައެވެ. މިގޮތުން އުތުރުގައިވާ ޖަބާލިޔާ އަދި ދެކުނުގައިވާ އަބަސާން އަލް-ކަބީރާއަށް އިޒްރޭލުން ވަނީ ހަމަލާދީފައި ކަމަށް އަލް ޖަޒީރާ އިން ބުނެފައިވެއެވެ.

އަނެއްކޮޅުން ރަފަހް ބޯޑަރު ކްރޮސިންގ އަލުން ހުޅުވުމާ ބެހޭ ގޮތުން މިސުރުން ހުށަހަޅާފައިވާ ހުށަހެޅުމަކަށް މަޝްވަރާ ކުރުމަށް ފަލަސްތިނުގެ ވާދަވެރި މައި ދެ ސިޔާސީ ގްރޫޕް ކަމުގައިވާ ފަތަހް އާއި ހަމާސް އިން ކައިރޯގައި ބައްދަލު ކޮށްފައިވާ ކަމަށް ޚަބަރުތައް ބުނެއެވެ.

އަހަރަކަށް ވުރެ ދިގުލީ ހަމަލާތަކުގައި ޣައްޒާ ގާތްގަނޑަކަށް މުޅިންހެން ވަނީ ވީރާނާވެފައެވެ. ޣައްޒާގެ 87 އިން ސައްތަ ހައުސިންގ ޔުނިޓް ވަނީ ފުނޑުފުނޑުވެފައެވެ. 80 އިން ސައްތަ ކޮމާޝަލް ފެސިލިޓީސް ވަނީ ސުންނާފަތިވެފައެވެ. 68 އިން ސައްތަ ދަނޑުބިންތައް ވަނީ ހަލާކުކޮށްލާފައެވެ. ޣައްޒާގެ 36 ހޮސްޕިޓަލުގެ ތެރެއިން ކޮންމެވެސް މިންވަރަކަށް ޚިދުމަތް ދެނީ 17 ހޮސްޕިޓަލުގައެވެ. ޣައްޒާގެ 87 އިން ސައްތަ ސްކޫލް ވަނީ ހަލާކު ވެފައެވެ. އޭގެ އިތުރުން މަގުތަކުގެ 68 އިން ސައްތަ ވަނީ ހަލާކުވެފައެވެ.

ހުއްޓުމެއްނެތި ދެމުންދާ ހަމަލާތަކުގައި ޣައްޒާގެ މުޅި އިންފްރާސްޓްރަކްޗަރ ހަލާކު ވަމުންދާއިރު، ބައިނަލްއަގްވާމީ ގޮތުން ބޭނުންކުރުން މަނާ ކޮށްފައިވާ ހަތިޔާރު ޣައްޒާގައި ބޭނުން ކުރަމުންދާ ކަމަށް ޣައްޒާގެ އިސް މެޑިކަލް އޮފިޝަލަކު ތުހުމަތު ކޮށްފިއެވެ. އެ ހަތިޔާރުތަކުގެ ސަބަބުން އިންސާނުންގެ ހަށިތައް ވިރިގެން ދާ ކަމަށް އޮފިޝަލް ވަނީ ހާމަ ކޮށްފައެވެ. މީގެ ކުރިންވެސް މިފަދަ ތުހުމަތުތައް އިޒްރޭލަށް ވަނީ ކުރެވިފައެވެ.

އެހީގެ ގާފިލާ ތަކަށް ފުލުފުލުގައި ހަމަލާ ދެމުންދާތީ، އިޒްރޭލު ހުރަސްކޮށް ޣައްޒާ އަށް އެހީ ފޯރުކޮށްދޭ އަބޫ ސާލިމް މަގުން އެހީ ފޮނުވުން ހުއްޓާލާފައިވާ ކަމަށް ފަލަސްތީނު ރެފިއުޖީންނާ ބެހޭ އދ. ގެ އޭޖެންސީ (އަންރުވާ) އިން ވަނީ ހާމަ ކޮށްފައެވެ.

އިސްރާއީލުން ޣައްޒާގައި ހިންގަމުންދާ ނަސްލު ފޮހެލުމުގެ ހަނގުރާމައިގައި 7 އޮކްޓޯބަރު 2023 އިން ފެށިގެން މަދުވެގެން 44،429 ފަލަސްތީނުން މަރުވެފައިވާއިރު 105،250 މީހުން ޒަޚަމްވެފައިވެއެވެ.