ފަސް ލަނޑުގެ މޮޅާއެކު އެތުލެޓިކޯ ދެ ވަނަ އަށް

ސްޕެނިޝް ލީގުގައި ރެއާލް ވަޔަޑޮލިޑާ ދެކޮޅަށް ކުޅުނު މެޗުން ހޯދި ބޮޑު މޮޅާއެކު، އެތުލެޓިކޯ މެޑްރިޑުން ލީގު ތާވަލްގެ ދެ ވަނަ މަގާމަށް ޖެހިލައިފި އެވެ.

ވަޔަޑޮލިޑުގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު އެތުލެޓިކޯ އިން ކާމިޔާބު ކުރީ 5-0 އިންނެވެ. މެޗުގެ ފުރަތަމަ ހާފުގައި އެތުލެޓިކޯ އިން ތިން ލަނޑު ޖެހިއިރު، ދެ ވަނަ ހާފުގައި ވަނީ ދެ ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ 26 ވަނަ މިނެޓުގައި އެތުލެޓިކޯ އަށް ލީޑު ނަގައިދިނީ ކްލެމެންޓް ލެންގްލެޓް އެވެ. އޭގެ ފަހުން މެޗުގެ 35 ވަނަ މިނެޓުގައި އާޖެންޓީނާގެ ހޫލިއަން އަލްވަރޭޒް ވަނީ އެތުލެޓިކޯގެ ދެ ވަނަ ލަނޑު ޖަހައިފަ އެވެ. އޭގެ ދެ މިނެޓު ފަހުން އެތުލެޓިކޯގެ ތިން ވަނަ ލަނޑު ޖެހީ އާޖެންޓީނާގެ ރޮޑްރީގޯ ޑި ޕޯލް އެވެ.

މެޗުގެ ދެ ވަނަ ހާފު ފަށައިގެން ހަތް ވަނަ މިނެޓުގައި އެތުލެޓިކޯގެ ހަތަރު ވަނަ ލަނޑު ޖެހީ އެންޓޮއިން ގްރީޒްމަން އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ އަލްވަރޭޒް އެވެ. މެޗުގައި އެތުލެޓިކޯގެ ފަހު ލަނޑު އެލެގްޒެންޑާ ސޯލޮތު ޖެހީ މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގަ އެވެ.

މޮޅާއެކު އެތުލެޓިކޯ ދެ ވަނައިގައި އޮތީ މިހާތަނަށް އެ ޓީމު ކުޅުނު 15 މެޗުން 32 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން އެއް ވަނައިގައި ބާސެލޯނާ އަށް ލިބެނީ 34 ޕޮއިންޓެވެ. ދެ ޓީމަށް ވުރެ ދެ މެޗު މަދުން ކުޅެގެން، ތިން ވަނައިގައި އެންމެ ފަހުގެ ޗެމްޕިއަން ރެއާލް މެޑްރިޑަށް ލިބެނީ 30 ޕޮއިންޓެވެ.