ކުށުގެ ތުހުމަތުގައިވާ ކުޑަކުދިންގެ ޒާތީ މައުލޫމާތު އާއްމުކުރާތީ ސަރުކާރުން ކަންބޮޑުވުން ފާޅުކޮށްފިއެވެ.
މިނިސްޓްރީ އޮފް ސޯޝަލް، ފެމިލީ ޑިވޮލޮޕްމަންޓްއިން އާއްމު ކުރި ބަޔާނެއްގައި ވަނީ އެކަން އެގޮތަށް ނުކުރުމަށް އިލްތިމާސްކޮށްފައެވެ. އެގޮތުން އަނިޔާއާއި ކުށުގެ ޝިކާރައަކަށްވާ ކުޑަކުދިންގެ ހައްގުތައް ހިމާޔަތް ކުރަން ޖެހޭކަން އެ ބަޔާނުގައި ވަނީ ފާހަގަކޮށްފައެވެ. މީގެ އިތުރުން ކުށުގެ ތުހުމަތުގައިވާ ކުޑަކުދިންގެ ޒާތީ މައުލޫމާތާއި އެކުދިންގެ ތަސްވީރު ހާމަ ކުރުމަކީ އެ ކުދިންގެ ކަރާމާތް ގެއްލޭ ކަމެއް ކަމަށް ފާހަގަކޮށްފައިވެއެވެ. އެހެންކަމުން އެކުދިންގެ މައުލޫމާތު ދެނެގަނެވޭނެ އެއްވެސް މައުލޫމާތެއް އާންމު ނުކުރުމަށް އެ އދިާރާއިން ވަނީ އިލްތިމާސް ކޮށްފައެވެ.
މީގެ އިތުރުން އެ މިނިސްޓްރީން ނެރުނު ބަޔާނުގައި ބުނެފައި ވަނީ ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުގައި ވެސް ކުޑަކުއްޖެއްގެ ޒާތީ މައުލޫމާތާ ފޮޓޯ މީޑިއާގައި ނުވަތަ އެނޫން ވެސް ވަސީލަތެއްގައި ޝާއިއުކުރުމަކީ މަނާކަމެއް ކަަމަށެވެ. އެހެންނަމަވެސް، ސޯޝަލް މީޑިއާގައި ދައުރުކުރަމުންދާ ބައެއް ފޮޓޯ އާއި ވީޑިއޯތަކުގެ ސަބަބުން، އެކުދިންގެ މައުލޫމާތު އާންމުންނަށް އެނގެން އޮންނަ ކަމަށް އެ ވުޒާރާއިން ވަނީ ބުނެފައެވެ. އަދި އެކަމުގެ ސަބަބުން އެ ކުދިންނަށް ނަފްސާނީ އިތުރު ގެއްލުންތަކެއް ލިބޭ ކަމަށާއި ކުޑަކުދިންގެ ކަރާމާތަށް އުނިކަން ލިބޭ ކަމަށް ވަނީ ބުނެފައެވެ.
އެކުދިންގެ ކަރާމާތަށް އުނިކަމެއް ލިބިދާނެ ފަދަ އެއްވެސް ކަމެއް ވިޔަ ނުދިނުމަށް އެ ފަދަ އަމަލުތައް ނުހިންގަން އެ ވުޒާރާއިން އެދިފައިވެއެވެ. ކުޑަ ކުއްޖަކަށް އެއްވެސް ބާވަތެއްގެ އަނިޔާއެއް ލިބޭކަން އެނގޭނަމަ ލަސްނުކޮށް އެމިނިސްޓްރީގެ ހެލްޕްލައިން، 1412 އަށް ގުޅައިގެން ރިޕޯޓްކުރެވޭނެއެވެ.
