ރައީސް މުއިއްޒަށް ގައުމު ހިންގަން އުދަނގޫވެ، ބޮޑު ލަނޑެއް ދީފައިވަނީ އެމަނިކުފާނުގެ އަރިސް ބޭފުޅުން: މެންބަރު ސަމީރު
ރައީސް މުއިއްޒު ވެސް ކައިރީގައި ތިއްބެވި ބޭފުޅުންނަށް އިތުބާރު ނުކުރައްވާ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު
ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް ގައުމު ހިންގަން އުދަނގޫވެ، ބޮޑު ލަނޑެއް ދީފައިވަނީ އެމަނިކުފާނުގެ އަރިސް ބޭފުޅުން ކަމަށް ރައްޔިތުން މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު ސަމީރު ވިދާޅުވީ ރައީސް މުއިއްޒަށް އޮޅުވާލައި، ލަނޑެއް ދީފައިވަނީ އެމަނިކުފާނުގެ އަރިސް ބޭފުޅުން ކަމަށެވެ. މިިހާރު ގައުމުގައި ހިނގާ ކަންކަމުގެ ސަބަބުން ރައީސް މުއިއްޒަށް ވެސް ކައިރީގައި ތިއްބެވި ބޭފުޅުންނަށް އިތުބާރު ނުކުރާ މަންޒަރު ފެންނަ ކަމަށް މެންބަރު ސަމީރު ވިދާޅުވިއެވެ.
ރައީސް މުއިއްޒުގެ ވައުދުނާމާ ފޮތަށް އިޝާރާތް ކުރައްވައި މެންބަރު ސަމީރު ވިދާޅުވީ އެވައުދު ފޮތުގައިވާ ވައުދުތަކަކީ ރާއްޖޭގެ ވެރިކަން ކުރެއްވި ބޭފުޅެއްގެ ހިޔާލާ އެއްގޮތަށް ވެވަޑައިގެންނެވި ވައުދުތަކެއް ކަމަށެވެ. ނަމަވެސް ވެރިކަމުގެ ތަހުތުގައި އިށީންދެވަޑައިގަތުމުން ރައީސް މުއިއްޒަށް މިއީ ހަގީގަތް ނޫންކަން ހާމަވެ، ވައުދުތައް ނުފުއްދޭނެކަން ކަށަވަރުވި ކަމަށް މެންބަރު ސަމީރު ވިދާޅުވިއެވެ.
މީގެ އިތުރުން މެންބަަރު ސަމީރު ވިދާޅުވީ ރައީސް މުއިއްޒުގެ ސަރުކާރާއެކު ރާއްޖެއަށް އިގްތިސާދީ ކާރިސާއެއް ގެނެސްފައިވަނީ އެބޭފުޅުން އަމިއްލައަށް ކަމަށާއި، ހިންގަން ނޭނގުމުގެ ނަތީޖާ ކަމަށެވެ.
މެންބަރު ސަމީރު ވިދާޅުވީ އިންތިސާދީ ގޮތުން އެންމެ އުދަނގޫ ދަތިހާލަތެއް ކުރިމަތިވެގެން ދިޔައީ ކޮވިޑް-19އާއެކު ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ކަމަށެވެ. މެންބަރު ސަމީރު ވިދާޅުވީ މުޅި ގައުމު ބަދެވި، އިގްތިސާދީ މައިގަނޑު މަސައްކަތް ކަމަށްވާ ފަތުރުވެރިކަން ބަންދުވެގެން ދިޔައިރު، ވެސް ހަރުދަނާ އުސޫލެއްގެ ދަށުން ރައްޔިތުން ހާލުގައި ނުޖައްސައި، މެނޭޖްކުރި ކަމަށެވެ. އެއީ އެމްޑީޕީގެ އިގްތިސާދީ ހަރުދަނާ ސިޔާސަތުގެ ސަބަބުން ރާއްޖެއަށް ލިބުނު ވަރަށް ބޮޑު ކުރިއެރުމެއް ކަމަށް މެންބަރު ސަމީރު ވިދާޅުވިއެވެ.
ނަމަވެސް ރައީސް މުއިއްޒު ސަރުކާރާއެކު ގައުމުގެ ހާލަތު ބަދަލުވެ، ގައުމު ފަހަތަށްދާ ކަމަށް މެންބަރު ސަމީރު ވިދާޅުވިއެވެ.
