ސުޕްރީމް ކޯޓުގައި ރައީސް މުއިއްޒުގެ ފޮޓޯފުޅު ހިއްޕުމަށް އެމަނިކުފާނު ގެންދަވަނީ މަސައްކަތް ކުރައްވަމުން: އިބްރާހިމް ރަޝީދު
30 ނޮވެމްބަރު 2024 | ހޮނިހިރު 05:28ރައްޔިތުން ބޭނުންވަނީ ފުރިހަމަ ޑިމޮކްރަސީ ކަމަށާއި، ތިން ބާރު ވަކިވެފައިވާ ނިޒާމެއް
19 ވަނަ ރައްޔިތުންގެ މަޖިލީހުގައި މާފަންނު މެދު ދާއިރާގެ ކުރީގެ މެންބަރު އިބްރާހިމް ރަޝީދު ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިހާރު މަސައްކަތް ކުރައްވަނީ ސުޕްރީމް ކޯޓުގައި އެމަނިކުފާނުގެ ފޮޓޯފުޅު ހިއްޕުމަށް ކަމަށް މާފަންނު މެދު ދާއިރާގެ ކުރީގެ މެމްބަރު އިބްރާހިމް ރަޝީދު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި އިބްރާހިމް ރަޝީދު ވިދާޅުވީ ދިވެހިރާއްޖޭގެ ގާނޫނު އަސާސީ އެކުލަވާލައި ފައިނަލްކޮށްފައިވަނީ ވަރަށް ގިނަ ރައްޔިތުންގެ ބައިވެރިވުމާއެކު ކަމަށެވެ. މިއަދު އެ ގާނޫނު އަސާސީގެ ބާރު ކަނޑުވާލައި، މިދަރަޖަށް ގައުމު ވައްޓާލާނެ ކަމަށް އުންމީދު ނުކުރާ ކަމަށް އޭނާ ވިދާޅުވިއެވެ. އަދި ވިދާޅުވީ މިއަދު ރާއްޖެ މިއޮތީ 2008 ވަނަ އަހަރަށް ވުރެ ފަހަތުގައި ކަމަށެވެ.
އިބްރާހިމް ރަޝީދު ވިދާޅުވީ ރައްޔިތުން ބޭނުންވަނީ ފުރިހަމަ ޑިމޮކްރަސީ ކަމަށާއި، ތިން ބާރު ވަކިވެފައިވާ ނިޒާމެއް ކަމަށެވެ. ނަމަވެސް މިއަދު ރައްޔިތުންގެ މަޖިލީހެއް ނެތް ކަމަށާއި، ރައްޔިތުން ތަމްސީލު ކުރާ ބަޔަކު މިހާރު އެ މަޖިލީހުގައި ނެތް ކަމަށެވެ. މިސަރުކާރުން މިނިވަން މުއައްސަސާތަކާއި ކޮމިޝަންތަކުގެ ބާރު ކަނޑުވާލައި، ގައުމު މިގެންދަނީ ރަސްކަމަކާ ދިމާލަށް ކަމަށާއި، އެފުރުސަތު ނުދޭނެ ކަމަށް އިބްރާހިމް ރަޝީދު ވިދާޅުވިއެވެ.
މީގެ އިތުރުން އިބްރާހިމް ރަޝީދު ވިދާޅުވީ މިހާރު އެންޓި ކޮރަޕްޝަން ކޮމިޝަން (އޭސީސީ)އަށް އައްޔަން ކުރާ ރައީސްއަކީ ރައީސް މުއިއްޒު އައްޔަން ކުރައްވާ ބޭފުޅަކަށް ހަމަޖައްސަވާފައިވާ ކަމަށާއި، މިހާރު މަސައްކަތް ކުރައްވަނީ ސުޕްރީމް ކޯޓުގައި ވެސް އެމަނިކުފާނުގެ ފޮޓޯފުޅު ހިތްޕުމަށް ކަމަށެވެ.
އިބްރާހިމް ރަޝީދު ވިދާޅުވީ މިސަރުކާރުން މަސައްކަތް ކުރަނީ ރިޔާސީ ނިޒާމު ފުޑުފުޑު ކޮށްލުމަށް ކަމަށެވެ. ދިވެހި ރައްޔިތުންނަށް ލިބުނު އެއްޗެއް ލިބިގެންދިޔައީ ވެސް ގާނޫނު އަސާސީން ކަމަށާއި، ގާނޫނު އަސާސީ ފުޑުފުޑުކޮށްލާއިރު، އެގާނޫނުގެ ދިފާއުގައި ރައްޔިތުން ނުކުންނާނެ ކަމަށެވެ. އަދި މިހާރު ގައުމުގައި ހިނގާ ކަންކަމަށް ބަލާއިރު، ދެން އަންނަ ދައުރުގައި ރައީސް މުއިއްޒު ނުހުންނަވާނެ ކަމަށް އޭނާ ވިދާޅުވިއެވެ.
