ރައީސުލް ޖުމްޙޫރިއްޔާ އަބްދުﷲ ޔާމިން އަބްދުލް ގައްޔޫމަކީ ފިނިފެންމަލެއް ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
ޕީޕީއެމް އިން ރުމާލު ދޭއް ޖަގަހައިގަ ހުކުރު ދުވަހު ބޭއްވި ޖަލްސާގައި ރައީސް ޔާމިނަކީ ފިނިފެންމަލެއް ކަމަށް ތަކުރާރުކޮށް ވިދާޅުވިއިރު ފިނިފެން މަލެއް ކަމަށް ސިފަ ކުރައްވަނީ ކިހިނެތް ކަމެއް ތަފްސީލުކޮށް ވިދާޅެއްނުވެ އެވެ. ނަމަވެސް އާންމުކޮށް ފިނިފެންމަލެއް މިސާލު މީހުން ޖަހަނީ އަންހެންކުދިންނަށެވެ.
ރައީސް ޔާމިނަކީ ފިނިފެން މަލެއް ކަމަށް ސިފަ ކުރެއްވުމުގެ އިތުރަށް މިނިސްޓަރު ވިދާޅުވީ އެ ފިނިފެން މަލެއް ގަހުގައި އިންނައިރު އޭގެ އަރާމުކަން ލިބިގަންނަން ވެސް އެނގެން ޖެހޭނެ ކަމަށެވެ.
"ފިނިފެން މަލެއް ގަހުގައި އިން ވަގުތު އޭގެ ހަގީގީ އަރާމުކަން ލިބިގަންނަން އެނގެން ޖެހޭނެ. އެ މާ މޯޅިވެ ނެތިގެން ދިޔައީމަ އެއް ނޫނޭ އެކަން ކުރަން ޖެހޭނީ. އިންސާނުންގެ ސިކުނޑިއާ ކުޅޭނެ އެކި ސައިޒުގެ އިބިލީސް. އަޅުގަނޑު ދަންނަވަން މި އުޅޭ އެއްޗަކީ އެ ފިނިފެން މަލަކީ ރައީސް ޔާމިން،" މިނިސްޓަރު ސައީދު ވިދާޅުވި އެވެ.
މިނިސްޓަރު ސައީދު ވިދާޅުވީ ދުނިޔޭގެ ތާރީހު ދައްކާފައިވާ ގޮތުން 2018 ގައި ވެސް ވެރިކަމަށް ވަޑައިގަންނަވާނީ ރައީސް ޔާމިންކަން ޔަގީންވެ ކަށަވަރުވާ ކަމަށެވެ. މީގެ އިތުރުން ރައީސް ޔާމިނަކީ ބަތަލެއް ކަމަށް ފާހަގަ ކުރައްވައި ސައީދު ވިދާޅުވީ ރައީސް ޔާމީނުގެ ތަހްޒީބީ ސިޔާސަތައް ތާއީދު ކުރައްވައި ޒުވާންނުން ދޭ ހިތްވަރަށް ފަހްރުވެރިވާ ކަމަށެވެ.
ރައީސް ޔާމިންގެ ތަރައްގީގެ މަޝްރޫއުތަކާ ގުޅޭ ގޮތުން ވާހަކަ ދައްކަވަމުން މިނިސްޓަރު ވިދާޅުވީ އައިޖީއެމްއެޗްގެ އާ އިމާރާތަކީ މިނިވަން ކަން ދިފާއު ކުރުމަށް ޖެހޭ ތަނބެއް ކަމަށެވެ. އަދި ނުކުރެވޭނެ ކަމެއް މީގެ ކުރިން ބައެއް މީހުން މިހާރު އެދަނީ ކުރަމުން ކަމަށް ފާހަގަ ކުރައްވައި ބުރިޗްގެ މަޝްރޫއު އާއި އެއާޕޯޓުގެ މަޝްރޫއުގެ ވާހަކަ ފާހަގަ ކުރެއްވި އެވެ.
މާލޭގެ އިރުމަތީ ފަރާތުގައި ބޮޑު މިސްކިތެއް އަލަށް އެޅިގެންދާނެ ކަމަށާއި އެ ބިނާ ވެގެންދާނީ "ރާއްޖޭގެ އިސްލާމް ދީން" ގެ ދިފާއުގައި ހުރިހާ ދުރުމިނަކަށް ދަތުރުކުރަން ވެރިއަކަށް ކެރޭނެ ކަން އަންގައިދޭނެ ބިނާއަކަށް ކަމަށް ވެސް މިނިސްޓަރު ވިދާޅުވި އެވެ.
މުހައްމަދު ތަކުރުފާނަކީ ވެސް ރައީސް ޔާމިން ކަމަށާއި ރާއްޖެ މިނިވަން ކުރުމަށް މުހައްމަދު ތަކުރުފާނު ކުރެއްވި ފަދަ މަސައްކަތެއް މިއަދު ކުރައްވަނީ ރައީސް ޔާމިން ކަމަށް ވެސް އޭނާ ވިދާޅުވި އެވެ.