ޔުއެފާ ޗެމްޕިއަންސް ލީގުގައި އާރްބީ ލައިޕްޒިގާ ދެކޮޅަށް ކުޅުނު މެޗުން މޮޅުވެ އިންޓަ މިލާން އެއް ވަނަ އަށް ޖެހިލިއިރު، ބަޔާން މިއުނިކުން ޕެރިސް ސެއިންޓް ޖާމަން (ޕީއެސްޖީ)ގެ މައްޗަށް ކުރި ހޯދައިފި އެވެ.

އިންޓަގެ އަމިއްލަ ދަނޑުގައި ލައިޕްޒިގާ ދެކޮޅަށް ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. މެޗުގައި އިންޓަގެ ހަމައެކަނި ލަނޑަކީ ފުރަތަމަ ހާފުގައި ޖެހި ލަނޑެކެވެ. އެއީ މެޗުގެ 27 ވަނަ މިނެޓުގައި ލައިޕްޒިގްގެ ކަސްޓެލޯ ލުކޭބޭ އަތުން ބައި ކޮޅަށް ވަތް ލަނޑެކެވެ.

ބަޔާންގެ އަމިއްލަ ދަނޑުގައި އެ ޓީމުން ޕީއެސްޖީ ބަލި ކުރީ 1-0 އިންނެވެ. މެޗުގައި ބަޔާނުން ލަނޑު ޖެހީ ވެސް ފުރަތަމަ ހާފުގަ އެވެ. މެޗުގެ ފުރަތަމަ ހާފުގެ 38 ވަނަ މިނެޓުގައި ބަޔާނަށް ލީޑު ނަގައިދިނީ ކިމް މިން ޖޭއި އެވެ. މެޗުގައި ޕީއެސްޖީ އަށް އެންމެ ބޮޑު ގެއްލުމެއް ދެއްކީ ދެ ވަނަ ހާފުގައި، އެ ޓީމުގެ އޮސްމާން ޑެމްބެލޭ އަށް ދެ ވަނަ ރީނދޫ ކާޑާ އެކު ރަތް ކާޑު ދެއްކުމުންނެވެ.

މޮޅާއެކު އިންޓަ އެއް ވަަނައިގައި އޮތީ މިހާތަނަށް ކުޅުނު ފަސް މެޗުން 13 ޕޮއިންޓު ހޯދައިގެންނެވެ. ނަމަވެސް ޗެމްޕިއަންސް ލީގުގައި ބުދަ ދުވަހުގެ ރޭ ލިވަޕޫލް ކުޅޭ މެޗުން މޮޅުވެ، އެ ޓީމަށް އަލުން އެއް ވަަނަ އަށް ޖެހިލުމުގެ ފުރުސަތު އޮންނާނެ އެވެ. ޕީއެސްޖީގެ މައްޗަށް ކުރި ހޯދި ބަޔާނުން ވަނީ ފަސް މެޗުން ނުވަ ޕޮއިންޓާ އެކު 11 ވަނަ އަށް ޖެހިލައިފަ އެވެ.