ބަޖެޓް ދިފާއުކުރަން މެމްބަރުން ދޫކޮށްލީ ދާއިރާގެ ހައްގު

އަންނަ އަހަރުގެ ބަޖެޓަކީ 56,647,600,859 (ފަންސާސް ހަ ބިލިޔަން، ހަސަތޭކަ ސާޅީސް ހަތް މިލިޔަން، ހަ ލައްކަ، އަށްސަތޭކަ ފަންސާސް ނުވަ) ރުފިޔާއެވެ.

ބަޖެޓް ހުށަހަޅުއްވަމުން ފިނޭންސް މިނިސްޓަރު ޒަމީރު ވިދާޅުވީ ހަރަދުގެ ގޮތުގައި ހިނގާނީ 49.2 ބިލިޔަން ރުފިޔާއެވެ. އޭގެތެރޭގައި ހިމެނެނީ ރިކަރަންޓް ހަރަދުގެ ގޮތުގައި 35.9 ބިލިޔަން ރުފިޔާއާއި ކެޕިޓަލް ހަރަދުގެ ގޮތުގައި 13.3 ބިލިޔަން ރުފިޔާއެވެ.

އަންގާރަ ދުވަހު އަޅުގަނޑުވެސް ހުރީ ބަޖެޓް ބަހުސް އަޑުއަހާށެވެ. ބަޖެޓް ދިފާއުކުރަން މެމްބަރުން ދެއްކެވީ، ތަފްސީލް މުހިންމު ނޫންކަމުގެ ވާހަކައެވެ. ދެއްކެވި ވާހަކަ އަކީ ހަމަޖެހޭ ވާހަކައެއްތޯވެސް ބައްލަވާ ލެއްވުމެއް ނެތެވެ. ސަރުކާރުގެ މެމްބަރުން ޖަވާބުދެއްވަމުން ގެންދެވީ ބަޖެޓް ތަފްސީލް ނެތް ކަމަށް ބުނާ ވާހަކައަށެވެ. ވިދާޅުވަނީ ތަފްސީލް ނެތް ބަޖެޓެއް މާ ރަނގަޅު ކަމަށެވެ. ކުރިން ކުޑަ އަދަދުތަކެއް ހުރުމުން ކަންކަން ނުވާކަމަށް ވެސް ސަރުކާރުގެ މެމްބަރުން ވިދާޅުވިއެވެ. އެ މެމްބަރުން ވިދާޅުވަނީ ކުޑަ އަދަދެއް ހިމެނުމަށް ވުރެ އެއްވެސް މިންވަރަކަށް ތަފްސީލް ނެތުން މާ ރަނގަޅު ކަމަށެވެ. ބަޖެޓުގެ ތަފްސީލް ނެތުމަށް މެމްބަރުން ދައްކަވާ ހުއްޖަތަކީ އެއީއެވެ. އިތުބާރު ކުރައްވާށޭ، ކަންކަން ވާނެއޭ ބުނުން މާ ރަނގަޅުކަމަށް މި ބޭފުޅުން ވިދާޅުވިއެވެ. ހާމަކަން ބޮޑުކަމާއި ދެފުށް ފެންނަ ކަމުގެ ވާހަކަ ދައްކާ މި ޒަމާނުގައި މެމްބަރުންގެ މި ވާހަކަތައް ވަނީ ޖޯކަކަށެވެ. މަޖިލިސް މެމްބަރުން ތެދުވެވަޑައިގެން ރައީސް ގެންގުޅުއްވާ ފޮތެއްގައި ހުރިހާ މަޝްރޫޢެއް ހުރިކަމަށް ވިދާޅުވުމަކީ ބޮޑު ޖޯކެއް ނޫންތޯއެވެ؟ ބަޖެޓް ދިފާއުކުރަން މެމްބަރުން އެ ދޫކޮށްލެއްވެވީ ދާއިރާގެ ހައްގެވެ. ތިމާ ހޮވި މެމްބަރުންގެ ހައްގެވެ. އެކަމުން އެނގުނީ އެ މެމްބަރުންނަށް ވެސް އެ މެމްބަރުންގެ ދާއިރާގައި ހުރިކަމެއް ނޭނގޭކަމެވެ.

ސަރުކާރު މެމްބަރުން އަޑަށް ބާރު ލައްވާފައި ކިތަންމެ ވަރަކަށް މި ބަޖެޓް ދިފާއު ކުރެއްވިއަސް އެ ބޭފުޅުންނަށް ވެސް އެ ދެއްކެވޭ ވާހަކަ ހަމަ ނުޖެހޭކަން އެނގިވަޑައިގަންނަވާނެއެވެ. ބަޖެޓް މަޖިލީހަށް ފޮނުވާ ބޭނުމާއި މެދު ވިސްނާލަންޖެހެއެވެ. ބަޖެޓެއްގެ އެއް ބޭނުމަކީ އަހަރަކު އެއް ފަހަރު ސަރުކާރުގެ ޕާރފޯމެންސް ރައްޔިތުންގެ މަންދޫބުން މެދުވެރިކޮށް އަޅާކިޔުމުގެ ފުރުސަތު ހޯދާދިނުމެވެ. ގަބޫލުކުރަން ޖެހޭ ކަމަކީ ރައްޔިތުންގެ ފައިސާ ހޭދަކުރާ ގޮތް ރައްޔިތުންނަށް އެންގުމަކީ ބަޖެޓްގެ އެއް ބޭނުން ކަމެވެ. ހަމައެހެންމެ ރައްޔިތުންގެ ތިޖޫރީ އަށް މަޖިލިސް ފާރަވެރިވާ މިންވަރު އަހަރެއްގެ ތެރޭގައި އެނގެން ރައްޔިތުން ބޭނުމެވެ. އިދިކޮޅު މެމްބަރުން މަޖިލީހުގައި އެކަން ތަކުރާރުކޮށް ފާހަގަކުރެއްވި ނަމަވެސް މި މަޖިލީހުން މިސްރާބު ޖަހާފައި ހުރީ ބަޖެޓް އޮތް ގޮތަށް ފާސްކުރުމަށްކަން ގައިމެވެ.

މީގެ އިތުރުން އަންނަ އަހަރުގެ ބަޖެޓުގައި ޕަބްލިކް ސެކްޓަރ އިންވެސްޓްމަންޓު ޕްރޮގްރާމް، ޕީއެސްއައިޕީއަށް ހިނގާނެ ކަމަށް ލަފާކޮށްފައިވަނީ 12.4 ބިލިޔަން ރުފިޔާ ކަމަށް ފިނޭންސް މިނިސްޓަރު ވަނީ ވިދާޅުވެފައެވެ. އަދި އަންނަ އަހަރު އާމްދަނީ އާއި ހިލޭ އެހީގެ ގޮތުގައި 39.8 ބިލިއަން ރުފިޔާ ލިބޭނެ ކަމަށް ލަފާކޮށްފައިވާއިރު އަންނަ އަހަރަށް ހުށަހަޅަނީ 9.4 ބިލިއަން ރުފިޔާ ޑެފިސިޓް ބަޖެޓެކެވެ.