ޕީޕީއެމް މެމްބަރުން އުޅުއްވާ ގޮތުން ލަދުން ބޯހަލާކު!
15 އޮކްޓޯބަރު 2017 | އާދީއްތަ 17:47ދިވެހި ވަފުދު ކައިރިއަށް ފޮޓޯ ނަގަން ބަޔަކު ނާދޭ!
މެމްބަރު ރިފާޢު އައިޕީޔޫ ސަމިޓްގައި
ރަޝިޔާގެ ސެއިންޓް ޕީޓަރސްބަރގްގައި ކުރިއަށްދާ އިންޓަރޕާލަމެންޓްރީ ޔޫނިއަންގެ 137ވަނަ ބައްދަލުވުމުގައި ބައިވެރިވުމަށް ދިޔަ ޕީޕީއެމްގެ މަޖިލިސް މެމްބަރުން އުޅުއްވާ ގޮތް ފެނިފައި ގަތީ ކުޑަ ލަދެއް ނޫނެވެ. ރަޝިޔާގެ ރައީސް ވްލަޑިމިއަރ ޕުޓިންއާއި ބައްދަލުކުރެވިގެން މަސީހު އުޅުއްވާތީ ސަރުކާރުގެ އިސްވެރިންނާއި ޕީޕީއެމް އެކްޓިވިސްޓުން މިއަދު އޮތީ އެކަމާއި އުފާފާޅުކުރުމެވެ. އެކަމަކު މިވާ ގޮތް އެނގިލައްވާތޯއެވެ؟
މަސީހު ޕުޓިންއާއި ބައްދަލުކުރެއްވީކީ ނޫނެވެ. ފްލޯރގައި ތިއްބެވި ބޭފުޅުންނާއި ސަލާން ކުރައްވަމުން ޕުޓިން ވަޑައިގެންނެވި ވަގުތު މަސީހުވެސް ދޭތެރެއަކުން ހުސްތަންކޮޅެއް ހޯދާލައިގެން ފިތި ބާރުވެގެން ހުރެ ފޮޓޯއެއް ނެންގެވީއެވެ.
މަސީހު ވަރަށް ފިތިބާރުވެގެން ޕުޓިންއާއިއެކު ފޮޓޯއެއް ނަންގަވަނީ
މަސީހަކީ ކޮން ބޭފުޅެއްކަން ޕުޓިންއަށް އެނގިވަޑައިގަތަސް އެވެސް ވާނީ ނަސީބަކަށެވެ. އައިޕީޔޫގެ ބައްދަލުވުމުގައި ރަސްމީ ބައްދަލުވުންތައް ދާ ގޮތް ބައްލަވާށެވެ.
އައިޕީޔޫގެ ރައީސް ޗައުދަރީ ރަޝިޔާގެ ރައީސް ވްލަޑިމިއަރ ޕުޓިންއާއި ބައްދަލުކުރައްވަނީ
މިފޮޓޯއާއި މަސީހު ޕުޓިންއާއި 'ބައްދަލުކުރެއްވި'ކަމަށް ބުނާ ފޮޓޯއާއި ހުރި ތަފާތު ބައްލަވާށެވެ. ދެން އަތް ޖަހާށެވެ.
މެމްބަރު ނިހާނާއި މެމްބަރު ރިފާއު ހެސްކިޔާފަ ޓްވީޓްކުރައްވަމުންދާއިރު، ހާމަވާ އެހެން ހަޤީގަތެއް އެބައޮތެވެ. ޤައުމުތަކާއި މާގުޅުން އޮތްކަމަށް ދައްކަން އެކި ޤައުމުތަކުގެ މަޖިލިސް މެމްބަރުންނާއި ސަލާންކުރައްވާ މަންޒަރު ފޮޓޯ ނަންގަވަމުންދާއިރު، ދިވެހި ވަފުދު ޖެހެނީ ކޮންމެ ޤައުމެއްގެ މޭޒު ކައިރިއަށް ދާށެވެ. މަސީހު އަރިހަށް ވަޑައިގަންނަވާނެ ބޭފުޅަކު ވީހެނެއް ފޮޓީތައް ބަލާފައި ހިއެއް ނުވެއެވެ.
ހުރިހާ ބޭފުޅުންނަށްވުރެ ބޮޑަށް އަޅުގަނޑަށް އަޅައިގަތީ މެމްބަރު ރިފާޢުގެ ޓްވީޓްތަކެވެ. ރައީސް ޔާމިނަށް ސަނާކިޔަން އެމަނިކުފާނުގެ ނަންފުޅު ކުރިއަށް 'ހިޒް އެކްސަލަންސީ' ލިޔުއްވަމުން ގޮސް، ޕުޓިންގެ ނަންފުޅުގެ ކުރިއަށްވެސް 'ހިޒް އެކްސަލަންސީ' ނުލައި ލިޔުއްވޭކަމަކަށް ނުވިއެވެ. ސެލްފީއާއި ފޮޓޯ ނަންގަވަމުން ގޮސް ޓޯރީޑް ޕެލަސްގައި ހުންނަ ރިޔާސަތު މޭޒު ކައިރިއަށް ގޮސް ނިހާން ލައްވައި ނެންގެވި ފޮޓޯތައް ފެނިފައި ދިވެހިން ލަދުގަންނާނެއެވެ. ކުޑަކުއްޖަކު އަލަށް ތަނަކަށް ދެވުނީމަ އުޅޭ ފާޑަށް މާފަންނު ދެކުނު ދާއިރާގެ މެމްބަރު އުޅުއްވީ ބޮޑަށް ބެލެވޭ ގޮތުގައި ރިޔާސަތު އުސްކޮށްހުރިކަން ދައްކައިދިނުމަށެވެ. ރިފާޢުގެ އިސްކޮޅާއި، ރަޝިޔާގެ ސްޓޭޓް ޑޫމާގެ މެމްބަރެއްގެ އިސްކޮޅު އަމިއްލައަށް ބައްލަވާފައި ވަޑައިގަންނަވާށެވެ. އަޅުގަނޑު ދެން އިތުރަށް އެއަށް ކިޔާނެ އެއްޗެއް ނެތެވެ.
ރިފާޢު ޓްވީޓްކުރައްވާއިރު މޮޅު ވާހަކަ ލިޔުއްވަން ކޮޕީ ޕޭސްޓްވެސް ކުރައްވަނީއެވެ. އެގޮތުން އައިޕީޔޫގެ ޒުވާން މެމްބަރުންގެ ބައްދަލުވުމާއި ގުޅޭގޮތުން އައިޕީޔޫގެ ޕްރޮޖެކްޓް އޮފިސަރު ޖޮނަތަން ލޭންގް ކުރެއްވި ޓްވީޓްގައިވާ ޓެކްސްޓްކޮޅު، ރިފާޢު އެބައްދަލުވުމާއި ގުޅޭގޮތުން އޭގެ ގަޑިއެއްހާއިރުފަހުން ކުރެއްވި ޓްވީޓްގައިވަނީ ބޭނުންކުރައްވާފައެވެ.
ރިފާޢުގެ ފާހަގަކޮށްލެވުނު އަނެއް ޓްވީޓަކީ އަޅާފައިވާ ދަތިކުރުމުގެ ފިޔަވަޅުތަކަށް ބެލުމެއް ނެތި ކޮންމެ މެމްބަރަކަށްވެސް އައިޕީޔޫގެ ސަމިޓްގައި ބައިވެރިވުމުގެ ފުރުސަތު ދެއްވުމުން ޕުޓިންއަކީ ރޯލް މޮޑެލްއެއްކަމަށް ސިފަކުރެއްވި ޓްވީޓެވެ. އިންސާނީ ހައްޤުތުތަކަށް އަރައިގަތުމަށް މަޝްހޫރު ޕުޓިންގެ މިއަމަލުގެ ވާހަކަ ރިފާޢު ދެއްކެވިއިރު، ރިފާޢުގެ އަމިއްލަ ޕާޓީގެ ވެރިޔާ ކަންތައްކުރައްވާ އެއަށްވުރެ ގޯހޭ ރިފާޢުގެ ހިތްޕުޅަށް އަރައިވަޑައިނުގަނޭބާއެވެ.
ކޮންމެއަކަސް އިހަކަށް ދުވަހު އިނގިރޭސިވިލާތުގެ މެންޗެސްޓަރއަށާއި ސްވިޓްޒަލެންޑްގެ ޖެނީވާއަށް ދިޔަ ޕީޕީއެމްގެ މެމްބަރުންގެ ޓީމާއި މިހާރު ރަޝިޔާގެ ސެއިންޓް ޕީޓަރސްބަރގްގައި މިހާރު އުޅުއްވާ ޓީމް އެއުޅުއްވާ ގޮތުން ދިވެހިން ލަދުގަންނަން ޖެހެއެވެ.
