އޭސީސީ އާއި އީސީގެ ރައީސް އައްޔަންކުރުމުގެ ބާރު ރައީސަށް ލިބޭ ބިލް ތަސްދީގު ކުރައްވައިފި
ހޯމަ ދުވަހުގެ ޖަލްސާގައި ނެގި ވޯޓުގައި އޭސީސީގެ ބިލަށް ރުހުންދޭން ފެންނަކަމަށް ވޯޓު ދެއްވީ 69 މެންބަރުން
އޭސީސީ އާއި އީސީގެ ރައީސް އައްޔަންކުރުމުގެ ބާރު ރައީސަށް ލިބޭ ބިލު ތަސްތީގުކުރައްވައިފި
އެންޓި-ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން، (އީސީ) ގެ ރައީސާއި ނައިބު ރައީސް، ރައީސުލްޖުމްހޫރިއްޔާ އައްޔަން ކުރައްވާގޮތަށް ބަދަލުކުރަން ޤާނޫނުތަކަށް ބަދަލު ގެންނަން މަޖިލީހުން ފާސްކޮށްފައިވާ ބިލު ރައީސް ޑރ.މުހައްމަދު މުއިއްޒު ތަސްދީގުކުރައްވައިފިއެވެ.
އެ ބިލު ތަސްދީގުކުރައްވާފައި ވަނީ އަންގާރަ ދުވަހުއެވެ. އެ ބިލު ފާސްކޮށްފައި ވަނީ ހޯމަ ދުވަހުއެވެ. ހޯމަ ދުވަހުގެ ޖަލްސާގައި ނެގި ވޯޓުގައި އޭސީސީގެ ބިލަށް ރުހުންދޭން ފެންނަމަކަމަށް ވޯޓު ދެއްވީ 69 މެންބަރުންނެވެ. އެ ވޯޓުގައި ނުފެންނަކަމަށް 10 މެންބަރަކު ވޯޓުދެއްވިއެވެ. ހަމައެހެންމެ އީސީގެ ބިލަށް ރުހުން ދިނުމަށް ވޯޓު ދެއްވީ 69 މެންބަރުންނެވެ. އެ ވޯޓުގައި ދެކޮޅަށް 10 މެންބަރަކު ވޯޓުދެއްވިއެވެ.
ހޯމަ ދުވަހު ފާސްކޮށްފައިވާ އިސްލާހުގައި ވާގޮތުން ޤާނޫނުގައި މިހާރު އޮތްގޮތް ކަމަށްވާ އޭސީސީ އަދި އީސީގެ ރައީސާއި ނައިބު ރައީސް އެ ކޮމިޝަންތަކުގެ މެންބަރުންގެ މެދުގައި ނަގާ ވޯޓަކުން އައްޔަން ކުރާ ގޮތައް އޮންނަ އޮތުން ބަދަލުކޮށް، ކޮމިޝަނުގެ ރައީސާއި ނައިބު ރައީސް އައްޔަން ކުރައްވާނީ އެ ކޮމިޝަނުގެ މެންބަރުންގެ ތެރެއިން ރައީސުލްޖުމްހޫރިއްޔާ ކަމަށް ވަނީ ހުށަހަޅާފައެވެ. އަދި ރައީސާއި ނައިބު ރައީސް ކަމަށް ކަނޑައަޅާ ފަރާތްތަކުގެ ނަންތައް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ހުށަހަޅަންވާނެ ކަމަށް ވެސް މިގެންނަ ބަދަލުގައި ވެއެވެ. ރައީސުލްޖުމްހޫރިއްޔާ މަޖިލީހަށް ހުށަހަޅުއްވާ ނަން ދިރާސާކޮށް މަޖިލީހުން ފާސްކުރަން ޖެހޭނެ ކަމަށްވެސް ޤާނޫނަށް ހުށަހަޅުއްވާފައިވާ އިސްލާހުގައި ވަނީ ބަޔާންކޮށްފައެވެ.
ރައްޔިތުންގެ މަޖިލީހުގެ ސުޕަރ މެޖޯރިޓީ ސަރުކާރު ހިންގާ ޕީއެންސީ އަށް އޮތުމާއެކު، އަދި އެ ޕާޓީގެ ރައީސްގެ ގޮތުގައި ހުންނެވި ޑރ. މުހައްމަދު މުއިއްޒު ރައީސުލް ޖުމްހޫރިއްޔާ ކަމުގެ މަގާމުގައިވެސް ހުންނެވުމާއެކު، މި ބަދަލުގެ ބޭނުމަކީ މުއިއްޒު ބޭނުންފުޅުވާ ފަރާތްތަކެއް މިނިވަން މުސްތަގިއްލު މުއައްސަސާތަކުގެ ގޮތުގައި ހިންގުމަށް ގާނޫނު ލާޒިމު ކުރާ މި ދެ މުއައްސަސާގެ އެންމެ އިސް ވެރިންގެ ގޮތުގައި އައްޔަން ކުރުމަށް މަގު ފަހިކުރުން ކަމަށް ސިޔާސީ ތަޖުރިބާކާރުން ދެކެއެވެ. އޭސީސީ އާއި އިލެކްޝަންސް ކޮމިޝަނުގެ ޤާނޫނުގައިވާ ގޮތުން އެ ކޮމިޝަންތަކުގެ ރައީސުން އިސްތިއުފާ ދޭން ބޭނުންވެއްޖެނަމަ އެކަން ހާމަކޮށް ސިޓީ ހުށަހަޅަންޖެހޭނީ ކޮމިޝަނަށެވެ. އަދި ނައިބު ރައީސް އިސްތިއުފާދޭން ބޭނުންވާނަމަ ސިޓީ ހުށަހަޅާންޖެހޭނީ ކޮމިޝަނުގެ ރައީސަށެވެ. ނަމަވެސް މިހާރު ހުށަހަޅާފައިވާ އިސްލާހުގައިވާގޮތުން ދެ ކޮމިޝަނުގެވެސް ރައީސާއި ނައިބު ރައީސް އިސްތިއުފާދޭ ނަމަ އެކަން ހާމަކޮށް ސިޓީ ހުށަހަޅަންޖެހޭނީ ރައީސުލްޖުމްހޫރިއްޔާއަށެވެ.
ރައްޔިތުންގެ މަޖިލީހުން ފާސްކުރި ބިލުތަކުގައިވާގޮތުން އޭސީސީ އާއި އިލެކްޝަންސް ކޮމިޝަންގެ ޤާނޫނަށް ގެންނަ ބަދަލާއެކު، މިނިވަން މުސްތަގިއްލު ކޮމިޝަން ތަކުގެ ގޮތުގައި ހިނގަމުން އަންނަ މި ދެ މުއައްސަސާ އަށް ސިޔާސީ ނުފޫޒު ފޯރުވުމުގެ ފުރުސަތު ފަހިވެގެންދާނެ ކަމަށް ތަޖުރިބާކާރުން ބުނެއެވެ.
ސަރުކާރުގެ ފަރާތުން އެންޓި-ކޮރަޕްޝަން ކޮމިޝަންގެ ޤާނޫނަށް އިސްލާހު ގެނައުމުގެ ބިލު މަޖިލީހަށް ހުށަހެޅުއްވީ ފެލިދޫ ދާއިރާގެ މެންބަރު އާދަމް ޒާހިރުއެވެ. އަދި އިލެކްޝަންސް ކޮމިޝަންގެ ޤާނޫނަށް އިސްލާހު ގެނައުމުގެ ބިލު ހުށަހެޅުއްވީ ކެލާ ދާއިރާގެ މެންބަރު އަބްދުﷲ ޝަރީފެވެ.
