ސްޕެނިޝް ލީގުގައި ލެގަނޭސްއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ރެއާލް މެޑްރިޑުން ދެ ވަނަ އަށް ޖެހިލައިފި އެވެ.

ލެގަނޭސްގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗު ރެއާލް އިން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ރެއާލް އިން އެއް ލަނޑު ޖެހިއިރު، ފަހު ހާފުގައި އެ ޓީމުން ވަނީ ދެ ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ 43 ވަނަ މިނެޓުގައި ރެއާލަށް ލީޑު ނަގައިދިނީ ފްރާންސްގެ ކެޕްޓަން ކީލިއަން އެމްބާޕޭ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ބްރެޒިލްގެ ވިނީޝިއުސް ޖޫނިއާ އެވެ. މެޗުގެ 66 ވަނަ މިނެޓުގައި ފެޑެރިކޯ ވަލްވާޑޭ ވަނީ ރެއާލްގެ ދެ ވަނަ ލަނޑު ޖަހައި ލީޑު ފުޅާ ކޮށްދީފަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ އާޑާ ގުލާ އެވެ. މެޗުގެ ފުރިހަމަ ވަގުތު ހަމަވާން ފަސް މިނެޓަށް ވެފައި ވަނިކޮށް ރެއާލްގެ ތިން ވަނަ ލަނޑު ޖެހީ ޖޫޑް ބެލިންހަމް އެވެ.

މޮޅާއެކު ރެއާލް އިން ވަނީ އެއް ވަަނައިގައި އޮތް ވާދަވެރި ބާސެލޯނާއާ ދެމެދު އޮތް ފަރަގު ހަަތަރު ޕޮއިންޓަށް ކުޑަ ކޮށްފަ އެވެ. ބާސެލޯނާ އަށް ވުރެ އެއް މެޗު މަދުންް ކުޅެފައިވާ ރެއާލަށް ދެ ވަނައިގައި ލިބެނީ 30 ޕޮއިންޓެވެ. މިހާތަނަށް ރެއާލް އިން 13 މެޗު ކުޅެފައިވާއިރު، ބާސެލޯނާ އިން ވަނީ 14 މެޗު ކުޅެފަ އެވެ. އެއް ވަނައިގައި ބާސެލޯނާ އޮތީ 34 ޕޮއިންޓާ އެކު އެވެ.