ެލެސްޓަރ ބަލިކޮށް، ޗެލްސީ ތިން ވަނަ އަށް

އިނގިރޭސި ޕްރިމިއަރ ލީގުގައި ލެސްޓާރ ސިޓީއާ ދެކޮޅަށް ކުޅުނު މެޗުން މޮޅުވެ، ޗެލްސީން ލީގު ތާވަލްގެ ތިން ވަނަ އަށް ޖެހިލައިފި އެވެ.

ލެސްޓާރ ގެ އަމިއްލަ ދަނޑުގައި ކުޅުނު މެޗު ޗެލްސީން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި ޗެލްސީން ލަނޑު ޖަހައި ލީޑު ނެގިއިރު، ދެ ވަނަ ހާފުގައި ޗެލްސީން ދެ ވަނަ ލަނޑެއް ވެސް ޖެހި އެވެ. ނަަމަވެސް އޭގެ ފަހުން ލެސްޓާރ އިން ވެސް ވަނީ ލަނޑެއް ޖަހައިފަ އެވެ.

މެޗު ފަށައިގެން 15 ވަނަ މިނެޓުގައި ޗެލްސީ އަށް ލީޑު ނަގައިދިނީ ނިކޮލަސް ޖެކްސަން އެވެ. އޭނާާ އެ ލަނޑު ޖަހަން ފުރުސަތު ތަނަވަސްކޮށްދިނީ އާޖެންޓީނާގެ އެންޒޯ ފެނާންޑޭޒް އެވެ. މެޗުގައި ދެ ވަނަ ލަނޑެއް ޖެހުމަށް ޗެލްސީން ކުރި މަސައްކަތް ކާމިޔާބު ކުރެވުނީ 75 ވަނަ މިނެޓުގަ އެވެ. އެ ލަނޑު އެ ޓީމަށް ޖަހައިދިނީ އެންޒޯ ފެނާންޑޭޒް އެވެ. މެޗުގައި ލެސްޓާރ ގެ ހަމައެކަނި ލަނޑަކީ މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އެ ޓީމަށް ލިބުނު ޕެނަލްޓީ ކާމިޔާބުކޮށްގެން ޖޯޑަން އަޔޫ ޖެހި ލަނޑެކެވެ.

މޮޅާއެކު ޗެލްސީ ތިން ވަނައިގައި އޮތީ މިހާތަނަށް އެ ޓީމު ކުޅުނު 12 މެޗުން 22 ޕޮއިންޓާ އެކު އެވެ. ލީގުގައި ކުޅުނު 12 މެޗުގެ ތެރެއިން ޗެލްސީ ވަނީ ހަ މެޗުން މޮޅުވެފަ އެވެ. ހަތަރު މެޗު އެއްވަރުވެފައިވާއިރު، ދެ މެޗުން ވަނީ ބަލިވެފަ އެވެ. ޗެލްސީގެ ކޯޗުކަމާ މި ސީޒަނާ ދިމާކޮށް ހަވާލުވީ އެންޒޯ މަރެސްކާގެ އިރުޝާދުގެ ދަށުން އެ ޓީމުން އަންނަނީ ރަނގަޅު ނަތީޖާތަކެއް ނެރެމުންނެވެ.