ގޯލްޑް ކަޕް: އޭދަފުށިން ފަސް ލަނޑުގެ މޮޅެއް ހޯދިއިރު، އައްޑޫ އާއި ކުރެންދޫ އެއްވަރު

މިހާރު ކުރިއަށްދާ ނައިންޓީ ޕްލްސް ގޯލްޑް ކަޕްގައި ތުޅާދޫއާ ދެކޮޅަށް ކުޅުނު މެޗުން އޭދަފުށި ފަސް ލަނޑުގެ މޮޅެއް ހޯދިއިރު، އައްޑޫ ސިޓީ އާއި ކުރެންދޫ ބައްދަލު ކުރި މެޗު އެއްވަރުވެގެން ނިމިއްޖެ އެވެ.

ގުރޫޕު ބީގައި ހުކުރު ދުވަހުގެ ހަވީރު ގަލޮޅު ރަސްމީ ދަނޑުގައި ތުޅާދޫއާ ދެކޮޅަށް ކުޅުނު މެޗު އޭދަފުށިން ކާމިޔާބު ކުރީ 5-1ންނެވެ. މެޗުގައި އޭދަފުއްޓަށް ލީޑު ނަގައިދިނީ މުޙައްމަދު އަޖުފާން އެވެ. އޭގެ ފަހުން އެ ޓީމުގެ ދެ ވަނަ ލަނޑު ޖެހީ އަޙުމަދު ޖައުޝަން ޢަބްދުﷲ އެވެ. ފުރަތަމަ ހާފު ނިމުމުގެ ކުރިން އޭދަފުއްޓަށް ތިން ވަނަ ލަނޑެއް ޖަހައިދިނީ އަލީ ނަސީމު އެވެ.

ދެވަނަ ހާފު ފަށައިގެން ކުރީ ކޮޅު އަލީ ނަސީމް ވަނީ އޭދަފުށީގެ ހަތަރު ވަނަ ލަނޑު ޖަހައިފަ އެވެ. އޭގެ ފަހުން މެޗުގައި ތުޅާދޫގެ ހަމައެކަނި ލަނޑު ޖެހީ އަޙުމަދު ޙުސެއިން އެވެ. މެޗުގައި އޭދަފުށީގެ ފަސް ވަނަ ލަނޑު ވެސް ޖެހީ އަލީ ނަސީމް އެވެ. އެއާއެކު އޭނާ ވަނީ މެޗުގައި ތިން ލަނޑު ހަމަކޮށް، ހެޓްރިކް ހަދައިފަ އެވެ.

މުބާރާތުގެ ގުރޫޕު ސީގައި ހުކުރު ދުވަހުގެ ރޭ އައްޑޫ އާއި ކުރެންދޫ ބައްދަލު ކުރި މެޗު ނިމުނީ 1-1ން އެއްވަރުވެގެންނެވެ. މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ ވެސް އައްޑޫ އިންނެވެ. ނަމަވެސް ކުރެންދޫ އިން ވަނީ ފަހަތުން އަރައި ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ.

މެޗުގެ ދެ ވަނަ ހާފުގައި އައްޑޫ އަށް ލީޑު ނަގައިދިނީ ހާޒިމް ފައުޒީ އެވެ. އެއީ ކުރެންދޫގެ އޭރިޔާ ތެރެއިން ގޯލު ކުރި މައްޗަށް ހުރަސްވި ބޯޅައެއް ގޯލަށް ވައްދާލައިގެން އޭނާ ޖެހި ލަނޑެކެވެ. މެޗުގައި ކުރެންދޫ އިން ނަތީޖާ ހަމަހަމަ ކުރުމަށް ކުރި މަސައްކަތް އެ ޓީމަށް ކާމިޔާބު ކުރެވުނީ 84 ވަނަ މިނެޓުގަ އެވެ. އެ ޓީމަށް ނަތީޖާ ހަމަހަމަ ކޮށްދިނީ ބިދޭސީ ކުޅުންތެރިޔާ ޖޯޑީ ބާޓު އެވެ.