އިނގިރޭސި ޕްރިމިއާ ލީގަށް އޭނާގެ ޝައުޤުވެރިކަން އޮތް ނަމަވެސް، ބަޔާން މިއުނިކުގައި ހުންނާނެ ކަމަށް، ޖަރުމަނުގެ ލެރޯއީ ސާނޭ ބުނެފި އެވެ.
އޭނާ މިހެން ބުނީ ބަޔާންގައި އޭނާގެ ކުރިމަގާ ގުޅޭ ގޮތުން ކުރި ސުވާލަކަށް ޖަވާބު ދެމުންނެވެ. އެގޮތުން އަންނަ ޖަނަވަރީ ޓްރާންސްފާގައި ސާނޭ ހޯދުމަށް، ޕްރިމިއާ ލީގުގެ ކުލަބުތަކުން ޝައުޤުވެރިވާ ކަމަށް މީޑިއާ ތަކުގައި ވަނީ ރިޕޯޓުކޮށްފަ އެވެ. އޭގެ ތެރޭގައި އާސެނަލްގެ އިތުރުން، މެންޗެސްޓަރ ޔުނައިޓެޑު ހިމެނޭ ކަމަށް ރިޕޯޓުތަކުގައި ބުނެފައިވެ އެވެ.
އެކަމާ ގުޅޭ ގޮތުން ސާނޭ ބުނީ ޕްރިމިއާ ލީގަށް އޭނާގެ ޝައުޤުވެރިކަން އޮންނަ ކަމަށާއި، އެ ލީގުގެ މެޗުތައް އޭނާ ބަލަމުން އަންނަ ކަމަށެވެ. އެހެން ނަމަވެސް، ޖަނަވަރީ ޓްރާންސްފައި އެއްވެސް ކުލަބަކަށް ބަދަލު ނުވާނެ ކަމަށާއި، އެއްވެސް ކުލަބަކާ އެކު އެއްބަސްވުމެއްގައި ސޮއި ނުކުރާނެ ކަމަށް ސާނޭ ވަނީ ބުނެފަ އެވެ.
މީގެ އިތުރުން ސާނޭ ބުނީ އޭނާގެ ފުރިހަމަ ފޯކަސް އޮތީ ބަޔާނަށް ކަމަށާއި، ބަޔާންގައި އޭނާ ހުރީ ހިތްހަމަ ޖެހިގެން، އުފަލުން ކަމަށެވެ. އަދި ޚާއްސަކޮށް އެއްބަސްވުމާ ގުޅޭ ވާހަކަތައް ބަޔާނާ އެކު ދެކެވެމުން އަންނަ ކަމަށާއި، އެކަމުގެ މަޝްވަރާތައް ކުރިއަށް ދަނީ ރަނގަޅަށް ކަމަށް ވެސް ސާނޭ ވަނީ ބުނެފަ އެވެ. އޭނާ ފާހަގަ ކުރި ގޮތުގައި އުންމީދަކީ ބަޔާނާއެކު ވީހާ ވެސް ގިނަ ކާމިޔާބީ ކުރިއަށް އޮތް ތަނުގައި ހޯދުމެވެ.
ބަޔާނާ އެކު ސާނޭ ސޮއި ކޮށްފައިވާ އެއްބަސްވުމުގެ މުއްދަތު މިހާރު ކުރިއަށްދާ ސީޒަންގެ ނިޔަލަށް ހަމަވާނެ އެވެ. ނަމަވެސް ބަޔާނުން އަންނަނީ އޭނާގެ އެއްބަސްވުން އައު ކުރުމުގެ މަޝްވަރާތައް ކުރިއަށް ގެންދަމުން ކަމަށް މީޑިއާ ތަކުގައި ވަނީ ބުނެފަ އެވެ. އެގޮތުން ބަޔާނުން ބޭނުން ވަނީ ސާނޭ އެ ކުލަބުގައި ބަހައްޓަން ކަމަށާއި، ބަޔާނުން ހުށަހަޅާ އައު އެއްބަސްވުމުގައި ސާނޭ ސޮއި ކުރުމުގެ ފުރުސަތު ބޮޑު ކަމަށް ވެސް މީޑިއާ ތަކުގައި ވަނީ ބުނެފަ އެވެ.
މެންޗެސްޓަރ ސިޓީ ދޫކޮށްލުމަށްފަހު ސާނޭ ބަޔާނަށް ބަދަލުވީ 2020 ވަނަ އަހަރު އެވެ. އޭގެ ފަހުން އޭނާ ވަނީ މިހާތަނަށް އެ ކުލަބަށް ކުޅެދިން 186 މެޗުގައި 51 ލަނޑު ޖަހައިފަ އެވެ. ބަޔާނާ އެކު ސާނޭ ވަނީ ހަތް ތައްޓެއް ކާމިޔާބު ކޮށްފަ އެވެ. އޭގެ ތެރޭގައި ޖަރުމަނު ލީގު ތިން ފަހަރު، ޖަރުމަނު ސުޕަ ކަޕް ދެ ފަހަރު، ޔުއެފާ ސުޕަ ކަޕް އެއް ފަހަރު އަދި ފީފާ ކުލަބު ވޯލްޑް ކަޕް އެއް ފަހަރު ކާމިޔާބު ކުރުން ހިމެނެ އެވެ.
