އިޒްރޭލުން ހަމަލާތައް ވަރުގަދަކޮށް، އުތުރު ޣައްޒާގެ ގެތަކަށް ހަމަލާދީ ސުންނާފަތިކޮށްލައިފި

ބުރާސްފަތި ދުވަހުގެ ފަތިހު އިޒްރޭލުން އުތުރު ޣައްޒާގައި މީހުން ދިރިއުޅޭ މަދުވެގެން 5 ގެއަކަށް ބޮންއަޅާ ސުންނާފަތިކޮށްލައިފިކަމަށް ޣައްޒާގެ ސިއްހީ ވުޒާރާއިން ބުނެފިއެވެ.

ޣައްޒާގެ ސިއްހީ ވުޒާރާއިން މައުލޫމާތު ދޭ ގޮތުގައި، އިޒްރޭލު ސިފައިން އުތުރު ޣައްޒާއަށް ވަދެގަނެ، އެ ސަރަހައްދުގެ އެތަން މިތަނަށް ހަމަލާދީ، އިމާރާތްތައް ވަނީ ބިމާ ހަމަކޮށްލާފައެވެ. އަދި ސުންނާފަތިވި އިމާރާތްތަކުގެ ދަށުގައި އެތަށް ބަޔަކު ތާށިވެފައިވާ ކަމަށާއި، ވީނުވީއެއް ނޭނގި އެތަށް ބަޔަކު ވަނީ ގެއްލިފައެވެ. އަދި މީހުން ސަލާމަތްކުރުމުގެ މަސައްކަތްވެސް ކުރިއަށްދާކަމަށް އެ ވުޒާރާއިން ވަނީ ބުނެފައެވެ.

ހަމަލާއާ ގުޅިގެން ހަމާސްގެ މީޑިއާއިން ބުނެފައިވަނީ މި ހަމަލާތަކުގައި 57 މީހުން މަރުވެފައިވާކަމަށެވެ. ނަމަވެސް މަރުވި މީހުންގެ ރަސްމީ އަދަދެއް ސިއްހީ ވުޒާރާއިން ހާމަކޮށްފައެއް ނުވެއެވެ.

ހަމަލާއާ ގުޅިގެން މިހާތަނަށް އިޒްރޭލުން އެެއްވެސް އެއްޗެއް ބުނެފައިނުވި ނަމަވެސް، އިޒްރޭލު ސިފައިން ބުނަމުން އަންނަނީ ހަނގުރާމާގައި މަރުވާ މީހުންގެ އަދަދު ހަމާސް އިން އަބަދުވެސް އިތުރަށް ދައްކަމުން އަންނަ ކަމަށެވެ.

އިޒްރޭލުން އުތުރު ޣައްޒާގެ ގެތަކަށް ހަމަލާދީފައި މިވަނީ ބުދަ ދުވަހު އިޒްރޭލުން ޣައްޒާއަށް ހަމަލާދީ މަދުވެގެން 48 މީހުން މަރާލާފައިވާ ކަމަށް ޣައްޒާގެ ސިއްހީ ވުޒާރާއިން ބުނެފައިވަނިކޮށެވެ. ޣައްޒާގެ ސިއްހީ އިދާރާތަކުން ބުނާ ގޮތުގައި، މި ހާދިސާތަކުގެ ތެރޭގައި ހިމެނެނީ ޣައްޒާގެ މެދުތެރޭގައި ހުރި އިމާރާތްތަކަކަށާއި ގެދޮރު ގެއްލިފައިވާ މީހުން ހިމާޔަތްކުރުމަށް ބޭނުންކުރާ ސްކޫލަކަށް ދިން ހަމަލާތަކާއި، އުތުރު ޣައްޒާގައި ހުރި ހޮސްޕިޓަލަކަށް ދިން ހަމަލާއަކާއި، އަދި ދެކުނު ޣައްޒާގައި ހުރި އިންސާނީ އެހީ ފޯރުކޮށްދިނުމަށް ކަނޑައަޅާފައިވާ އަލް-މަވާސީ ސަރަހައްދަށާއި ރަފާހަށް ދިން ވައިގެ ހަމަލާތަކެވެ.

މީގެއިތުރުން، ޣައްޒާގެ އެއްވެސް ތަނެއް ރައްކާތެރި ނޫން ކަމަށް، ފަލަސްތީނުގެ އިދާރާތަކުންނާއި އދ. އިން ތަކުރާރުކޮށް އަންނަނީ ބުނަމުންނެވެ.

އިޒްރޭލުގެ އަނިޔާވެރި ހަމަލާތަކާއި ގުޅިގެން، ބައިތްލަހިޔާ ގައި ހުރި ކަމާލް އަދުވާން ހޮސްޕިޓަލުގެ ޑިރެކްޓަރު ހުސާމް އަބޫ ސަފިއްޔާ ވިދާޅުވީ، "އެ ހޮސްޕިޓަލުގެ އިންޓެންސިވް ކެއަރ ޔުނިޓުގައި ހުރި ބަލިމީހަކު ސަލާމަތްކުރަން މަސައްކަތްކުރަމުންދަނިކޮށް، އެއްވެސް އިންޒާރެއް ދިނުމަކާ ނުލައި އަންގާރަ ދުވަހު ހޮސްޕިޓަލުގެ ހުރިހާ ބައިތަކަކަށް އިޒްރޭލުން ހަމަލާ ދިން،" ކަމަށެވެ. މި ހޮސްޕިޓަލަކީ ހިޞާރުކޮށްފައިވާ އުތުރު ސަރަހައްދުގައި ކޮންމެވެސް ވަރަކަށް މަސައްކަތްކުރަމުންދާ ތިން މެޑިކަލް ފެސިލިޓީގެ ތެރެއިން އެއް ތަނެވެ.

"މެޑިކަލް އަދި ސަރޖިކަލް 45 ސްޓާފު މެންބަރުން ހައްޔަރުކުރުމަށްފަހު، އަދި އެ މީހުންގެ ބަދަލުގައި އެހެން ޓީމެއް ވެއްދުމަށް ހުއްދައެއް ނުދޭ. އެހެންކަމުން، ވަސީލަތްތައް ހުރިނަމަ ސަލާމަތްކުރެވިދާނެ އެތައް ބަޔަކު އަހަރެމެންނާ ވަކިވެގެން ކޮންމެ ދުވަހަކު އެބަދޭ. ހިތާމައާއެކު ދަންނަވަންޖެހެނީ، ކާނާއާއި ފެން ވެއްދުމަށް ވެސް ހުއްދައެއް ނުދޭ، އަދި ޣައްޒާގެ އުތުރަށް އެންބިއުލާންސްއެއް ވެސް ވަދެވޭ ގޮތެއް ނުވޭ،" ހުސާމް އަބޫ ސަފިއްޔާ އިތުރަށް ވިދާޅުވިއެވެ.

އިޒްރޭލުން ޣައްޒާގައި ހިންގަމުންދާ ނަސްލު ނައްތާލުމުގެ ހަނގުރާމައިގައި 7 އޮކްޓޯބަރު 2023 އިން ފެށިގެން މަދުވެގެން 43,985 ފަލަސްތީނު މީހުން މިހާތަނަށް ވަނީ ޝަހީދުވެފައެވެ. އޭގެ އިތުރުން 104,092 މީހުން ޒަޚަމްވެފައިވެއެވެ.