ގޯލްޑް ކަޕް: ކުޑަހުވަދޫ ބަލިކޮށް ފުވައްމުލައް މޮޅަކުން މުބާރާތް ފަށައިފި

ނައިންޓީ ޕްލްސް ގޯލްޑް ކަޕްގެ ގުރޫޕު އޭގައި ކުޑަހުވަދޫއާ ދެކޮޅަށް ކުޅުނު މެޗުން މޮޅުވެ، ފުވައްމުލައް މޮޅަަކުން މުބާރާތް ފަށައިފި އެވެ.

ބުދަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު ފުވައްމުލަކުން ކާމިޔާބު ކުރީ 3-1 އިންނެވެ. މެޗުގައި ފުވައްމުލަކުން ލަނޑު ޖަހައި ލީޑު ހޯދާފައި ވަނިކޮށް، ކުޑަހުވަދޫ އިން ނަތީޖާ ހަމަހަމަ ވެސް ކުރި އެވެ. ނަމަވެސް އިތުރު ދެ ލަނޑު ޖަހައިގެން ފުވައްމުލައް ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގައި ފުވައްމުލަކަށް ލީޑު ނަގައިދިނީ އެ ޓީމުގެ ބިދޭސީ ކުޅުންތެރިޔާ ކޯފީ އޮވޫސޫ އެވެ. ނަމަވެސް ދެ ވަނަ ހާފުގައި ކުޑަހުވަދޫ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ އަޙުމަދު މުއާދު އެވެ. މެޗުގައި ކުޑަހުވަދޫ އަށް އެންމެ ބޮޑު ގެއްލުމެއް ދެއްކީ އެ ޓީމުގެ ދެ ކުޅުންތެރިޔަކށް ރަތް ކާޑު ދެއްކުމުންނެވެ. އެ ޓީމުގެ އަޙުމަދު ރިލްވާން އަށް ރަތް ފުރަތަމަ ރަތް ކާޑު ދެއްކިއިރު، ދެން ރަތް ކާޑު ދެއްކީ މުޙައްމަދު ސާއިފް އަށެވެ.

އޭގެ ފަހުން މެޗުގައި ފުވައްމުލަކުން ވަނީ ދެ ލަނޑު ޖަހައިފަ އެވެ. ދެ ވަނަ ފަހަރަށް މެޗުގައި އެ ޓީމަށް ލީޑު ނަގައިދިނީ އަލީ ޝަމާލް ޢަބްދުﷲ އެވެ. އެއީ މެޗުގެ ފުރިހަމަ ވަގުތު ހަމަވާން މިނެޓަކަށްވެފައި ވަނިކޮށް އޭނާ ޖެހި ލަނޑެކެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ފުވައްމުލަކުގެ ތިން ވަނަ ލަނޑު ޖެހީ މޫސާ އަޒީމް ޙަސަން އެވެ.

ކުޑަހުވަދޫ އާއި ފުވައްމުލަކުގެ އިތުރުން ދެން މި ގުރޫޕުގައި އޮތީ ގދ.ފަރެސްމާތޮޑާ، ދ.މީދޫ އަދި ހއ.ދިއްދޫ އެވެ. މުބާރާތުގައި ބުރާސްފަތި ދުވަހުގެ ހަވީރު ބައްދަލު ކުރާނީ ފަރެސްމާތޮޑާ އާއި މީދޫ އެވެ.