ސަރުކާރަށް އަހަރު ފުރިގެން ބޭއްވި ޖަލްސާގައި ރައީސް ޑރ މުޙައްމަދު މުޢިއްޒު ދެއްވި ތަގުރީރުގެ ބަހުރުވަޔާ ރާގުފުޅު ހުރި ގޮތުގެ ވާހަކަ ރަށުތެރޭގައި އެކި މީހުން ދައްކަނީ އެކި ގޮތަށެވެ. އެކަމަކު އެންމެން އެއްގޮތަކަށް ދައްކާ އެއްވާހަކަ އަކީ ރައީސުލްޖުމްހޫރިއްޔާގެ މަގާމުގައި ހުންނަވައިގެން މިހާ ހަރުކަށި މިހާ ގަދަފަދަ ގޮތަކަށް އެހެން މީހުންނަށް ގޮންޖައްސަވާ ވާހަކަފުޅު ދެއްކެވި ރައީސެއް އެމީހުންގެ ހަޔާތުގައި ވެސް ނުދެކޭ ވާހަކައެވެ. ގިނަ މީހުން ފާހަގަކުރާ ކަންތައްތަކުގެ ތެރެއިން އެއް ކަމަކީ ފްލެޓާ ގޯތީގެ މައްސަލައިގައި ދެއްކެވި ވާހަކަފުޅެވެ. ކޯފާވެ ހުންނަވައިގެން ވިދާޅުވީ ވައުދުވެފައި އޮތްގޮތަށް އެކަން ކުރައްވާނެ ކަމަށެވެ. އެކަމަކު އޮޅުވާލައިގެން ފްލެޓް ހޯދާފައިވާ ފަރާތްތަކަށް ފްލެޓް ނުލިބޭނެ ކަމަށެވެ. ވައުދު ވާއިރު އެގޮތަށް އެވާހަކަ ބުނަން ނުޖެހޭނެ ކަމަށެވެ. ނުބުންޏަސް އެނގެން ޖެހޭނެ ކަމަށެވެ.
ރައީސްގެ މިވާހަކަފުޅަށް ރައްދުދީ ވާހަކަ ދައްކާ ގިނަ މީހުން ބުނަނީ އެހެން ވިދާޅު ނުވެވޭނެ ކަމަށެވެ. ވެރިކަމުގެ ބޭނުމުގައި ވޯޓުގެ ބޭނުމުގައި، މާ އޯގާތެރި މީހެއްގެ ސިފައިގައި ހުންނަވައިގެން ކިރިޔާ އަޑު ބޭރުވާހާ މަޑުމައިތިރި އަޑަކުން ވައުދުތައް ވެވަޑައިގެންނެވުމަށްފަހު، ވެރިކަން ލިބުމުން ވައުދު ބަދަލު ކުރައްވާ ހަރުއަޑުން، ހަރުކަށިކަމާއެކު ގޮންޖައްސަވާ އެގޮތަށް އެވާހަކަ ނުދެއްކެވޭނެ ކަމަށެވެ. ސަބަބަކީ ކެމްޕެއިން ތެރޭގައި ރައްޔިތުންނާ މުޚާތަބުކުރައްވާ ދައްކަވާ ވާހަކަފުޅާ ވެވަޑައިގަންނަވާ ވައުދާ ހުށަހަޅުއްވާ މެނިފެސްޓޯއަކީ އިޖްތިމާއީ އަގުދެއް ކަމަށެވެ. ވެރިކަން ލިބިވަޑައިގަތުމުން އެ އަގުދާ ޚިލާފުވެވަޑައިގެން އަމިއްލަފުޅަށް އެ ބާތިލްކުރެއްވުމުން އެ ވައުދުތަކުގެ މައްޗަށް ވޯޓުދިން ރައްޔިތުން ދިން ވޯޓުން ލިބިވަޑައިގެންނެވި ވެރިކަމުގެ މޯރަލް އޮތޯރިޓީވެސް ގެއްލޭނެ ކަމަށެވެ. އަނެއް ވާހަކައަކީ ބޭނުންފުޅު ކަމެއް ބޭނުންފުޅު ގޮތަކަށް ކުރައްވާނެ ކަމަށް ހަރުކަށިކަމާއެކު ވިދާޅުވެ ގޮންޖެއްސެވި ގޮންޖެއްސެވުމެވެ. ގާނޫނުތައް ހަދައިގެން ގާނޫނުތަކަށް ބަދަލު ގެނެސްގެން ވިޔަސް ވެސް، އަދި އެނޫން ގޮތަކަށް ވިޔަސް ބޭނުންކަމެއް ކުރައްވާނެ ކަމަށް ވިދާޅުވުމަކީ ޚުދުމުހުތާރު ސިފައެކެވެ. އެމީހުން ބުނަނީ ރައީސް ޑރ މުޙައްމަދު މުއިއްޒަށް ވެރިކަން ދީ ބާރުތައް ދިނީ ގައުމު ހުދުމުހުތާރު ނިޒާމަކަށް ބަދަލުކުރަން ނޫންކަމަށެވެ. ރައްޔިތުންގެ މަޖިލީހުގެ ބޮޑު މެޖޯރިޓީއެއް އެމަނިކުފާނަށް ދިނީ ރައްޔިތުންނަށް ޚިދުމަތް ކުރަން ފަސޭހަ ވާނީ މަޖިލީހުގެ މެޖޯރިޓީވެސް ދީގެން ކަމަށް ވިދާޅުވުމުން ކަމަށެވެ. އެއީ އެ ހުރިހާ މެޖޯރިޓީ އަކާ ބާރެއް ދިނުމުން ބޭނުންފުޅު އެއްޗެއް ހައްދަވާ ބޭނުންފުޅުވާ ގޮތަކަށް ގާނޫނުތައް ބަދަލު ކުރައްވާ، ހުރިހާ ބާރެއް މުށުތެރެއަށް ލައްވާ މުޅި ނިޒާމު ގަޑުބަޑުކޮށް "ވަންމޭން ޝޯވް" އެއް ގޮތަށް މުޅި ނިޒާމު ބައްޓަންކުރައްވަން ދިން ބާރެއް ނޫން ކަމަށެވެ.
ރައީސުލްޖުމްހޫރިއްޔާގެ މަގާމުގައި ހުންނަވާ ބޭފުޅަކީ އެމްއެމްއޭގެ ގަވަރުނަރުކަމާއި، ފިނޭންސް މިނިސްޓަރު ކަމާއި ޑިފެންސް މިނިސްޓަރު ކަމާއި ޖުޑިޝަރީގެ އެންމެ މަތީވެރިޔާ ކަމަށް އޮތް އޮތުން ދިވެހިން ދޫކޮށްލީ އެގޮތް ކަމުނުދާތީއެވެ. ނޫ ގާނޫނު އަސާސީއަކުން ފެހި ގާނޫނު އަސާސީއަކަށް ދިވެހިން ބަދަލުވެ މަލްޓިޕާޓީ ޑިމޮކްރަސީއެއް ދިވެހިން ހޯދީ އެގޮތް ދިވެހިންނަށް ބޭނުންވާތީއެވެ. ވީ އިރު ރައްޔިތުން ދިން ބޮޑު ބާރުގެ ނާޖާއިޒު ފައިދާ ނަންގަވާ އަލުން ނޫ ގާނޫނު އަސާސީ އަށް ރުޖޫޢަ ވެވަޑައިގަންނަވަން މަސައްކަތް ނުކުރައްވާށެވެ. ސަރުކާރަށް އެއް އަހަރު ފުރުނު ދުވަހު ރައީސް ސްޓޭޖުގައި ހުންނަވައިގެން ތިޔަ ދެއްކެވީ ރައީސްގެ އަސްލު ސިފަނަމަ ތިޔަ ވިދާޅުވީ، ރައީސް އަސްލު ބޭނުންވާ ގޮތްނަމަ ތިއީ ދިވެހިން ބަލައިގަންނާނެ، ދޫކޮށްގެން ތިބޭނެ ގޮތެއް ނޫނެވެ.
