ރައްޔިތުންގެ ކަންބޮޑުވުންތަކާއި ޝަކުވާތައް ސަރުކާރަށް ހުށަހެޅުމަށްޓަކައި 24 ގަޑިއިރު ޚިދުމަތް ދޭ ގޮތަށް އަނެއްކާވެސް "ރައީސަށް އާދޭސް ދަންނަވާ" ޕޯޓަލްއެއް!
17 ނޮވެމްބަރު 2026 | އަންގާރަ 08:40ރައްޔިތުންގެ ޝަކުވާތައް ސަރުކާރަށް ހުށަހެޅުމަށް ރައީސުލްޖުމްހޫރިއްޔާ ވެވަޑައިގެންނެވި ވައުދުފުޅާ އެއްގޮތަށް "ސިޓިޒަންސް ވޮއިސް" ޕޯޓަލް މިހާރު ވަނީ އިފްތިތާހުކޮށްފައި. މި ޕޯޓަލްގެ އިތުރުން 1470 ހޮޓްލައިން މެދުވެރިކޮށް ވެސް ޝަކުވާ ހުށަހެޅޭނެ އިންތިޒާމު ހަމަޖެހިފައިވާއިރު، ކުރިއަށް އޮތް ތަނުގައި މި ޚިދުމަތަށް ޚާއްސަ މޯބައިލް އެޕްލިކޭޝަނެއް ތައާރަފުކުރުމަށް ވަނީ ނިންމާފައި


ރަސްމާލެ މަޝްރޫއުއާ ގުޅޭ ގޮތުން ރައީސް މުއިއްޒު ވާހަކަފުޅު ދައްކަވަނީ | ރައީސް އޮފީސް
ރައްޔިތުންގެ ކަންބޮޑުވުންތަކާއި ޝަކުވާތައް ސަރުކާރަށް ހުށަހެޅުމަށްޓަކައި 24 ގަޑިއިރު ޚިދުމަތް ދޭ ގޮތަށް، ރައީސުލްޖުމްހޫރިއްޔާގެ އޮފީހުގައި ގާއިމުކުރެއްވި "ސިޓިޒަންސް ކޮމްޕްލެއިންޓްސް ބިއުރޯ" ގެ ދަށުން "ސިޓިޒަންސް ވޮއިސް" ގެ ނަމުގައި ޚާއްސަ ޕޯޓަލެއް އަންގާރަ ދުވަހު އިފްތިތާހުކުރައްވައިފި އެވެ.
މި ޕޯޓަލަކީ، މި އަހަރުގެ ފުރަތަމަ ދައުރުގެ ފުރަތަމަ ޖަލްސާގައި ރިޔާސީ ބަޔާން އިއްވަވަމުން ރައީސް ޑރ. މުހައްމަދު މުއިއްޒު ވެވަޑައިގެންނެވި ވައުދުފުޅާ އެއްގޮތަށް އިފްތިތާހުކުރެއްވި ޚިދުމަތެކެވެ. އެގޮތުން ރައީސުލްޖުމްހޫރިއްޔާގެ ވައުދުފުޅަކީ ރައްޔިތުންގެ ޝަކުވާތައް ބަލައިގަންނާނެ ބިއުރޯއެއް އުފައްދަވައި، ރައްޔިތުންގެ އަޑު ގާތުން ބެއްލެވޭނެ ނިޒާމެއް ގާއިމުކުރެއްވުމެވެ.
ސިޓިޒަންސް ވޮއިސް ޕޯޓަލްގެ ޚިދުމަތް މިވަގުތު ވެބްސައިޓް މެދުވެރިކޮށް ލިބޭނެ އިންތިޒާމު ހަމަޖައްސާފައިވީ ނަމަވެސް، ކައިރި މުސްތަގުބަލެއްގައި މި ޚިދުމަތަށް ޚާއްސަކުރެވޭ ފޯނު އެޕްލިކޭޝަނެއް ވެސް އިފްތިތާހުކުރާނެ ކަމަށް ރައީސް އޮފީހުން މައުލޫމާތުދެ އެވެ. މީގެ ސަބަބުން ރައްޔިތުންނަށް ކޮންމެ ތަނެއްގައި ހުރެގެން ވެސް ފަސޭހަކަމާއެކު ޝަކުވާތައް ހުށަހެޅުމުގެ ފުރުސަތު ފަހިވެގެންދާނެކަމަށް އެ އޮފީހުން ބުނެ އެވެ.
މި ޕޯޓަލްގެ އިތުރުން، ސިޓިޒަންސް ކޮމްޕްލެއިންޓްސް ބިއުރޯގެ ކޯލް ސެންޓަރުގެ ޚިދުމަތް މިހާރު ވެސް ލިބޭނެ ކަމަށާއި، އެގޮތުން ހޮޓްލައިން ނަންބަރު 1470 އަށް ގުޅައިގެން ރައްޔިތުންގެ ޝަކުވާތަކާއި ކަންބޮޑުވުންތައް ހިއްސާކުރުމުގެ ފުރުސަތު ހުޅުވާލެވިފައިވާކަމަށް ރައީސް އޮފީހުން މައުލޫމާތުދެ އެވެ.
ރައީސް އޮފީހުން މީގެ ކުރިން ވަނީ "ރައްޔިތުންގެ އަޑު" ޕޯޓަލެއްގެ އިތުރުން، ރައްޔިތުން ސީދާ ރައީސް އަރިހަށް ވަޑައިގެން ޝަކުވާ ހުށަހަޅާ ގޮތަށް "ރައްޔިތުންގެ އަޑު" ގެ ނަމުގައި ވެސް ހަރަކާތެއް ފަށާފަ އެވެ.











