އަމޯރިމް އާއެކު ޔުނައިޓެޑުގެ ފަރިތަކުރުންތައް ފަށައިފި

ދާދި ފަހުން މެންޗެސްޓަރ ޔުނައިޓެޑުގެ ކޯޗުކަމާ ހަވާލުވި ޕޯޗުގަލްގެ ރުބެން އަމޯރިމްގެ އިރުޝާދުގެ ދަށުން އެ ކުލަބުގެ ފަރިތަކުރުންތައް ފަށައިފި އެވެ.

ޔުނައިޓެޑުގެ ކޯޗުކަމަށް އަމޯރިމް ހަމަޖެއްސީ އޭނާގެ ކުރިން އެ މަގާމުގައި ހުރި ނެދަލެންޑްސްގެ އެރިކް ޓެން ހާގް މަގާމުން ވަކި ކުރުމަށްފަހު އެވެ. ކޯޗުކަމުގެ މަގާމުން ޓެން ހާގް ވަކިކޮށްފައި ވަނީ އޭނާގެ އިރުޝާދުގެ ދަށުން މި ސީޒަންގައި، ޚާއްސަކޮށް ޕްރިމިއާ ލީގުގައި ޔުނައިޓެޑުގެ ނަތީޖާތައް ދަށްވެފައިވާތީ އެވެ. މި ސީޒަނަކީ ޔުނައިޓެޑުގެ ތާރީޚުގައި ވެސް ޕްރިމިއާ ލީގުގައި އެ ޓީމަށް އެންމެ ދަށް ނަތީޖާއާ ކުރިމަތިލާން ޖެހުނު ސީޒަނެވެ.

ޔުނައިޓެޑާ އެކު އަމޯރިމް ސޮއި ކޮށްފައި ވަނީ ތިން އަހަރު ދުވަހުގެ އެއްބަސްވުމެއްގަ އެވެ. އެހެންކަމުން 2027 ވަނަ އަހަރުގެ ޖޫން މަހުގެ ނިޔަލަށް އޭނާ އެ ކުލަބަށް އިރުޝާދު ދޭނެ އެވެ. ޔުނައިޓެޑުގެ ކޯޗަކަށް އަމޯރިމް ހަމަޖެއްސި ފަހުން، ރަސްމީކޮށް އޭނާ އެ ކުލަބާ ހަވާލުވީ މި ހިނގާ ނޮވެމްބަރު މަހުގެ 11 ވަނަ ދުވަހު އެވެ. އޭގެ ފަހުން ހޯމަ ދުވަހު އަމޯރިމް ވަނީ ޔުނައިޓެޑުގެ ފުރަތަމަ ފަރިތަކުރުން ކުރިއަށް ގެންގޮސްފަ އެވެ. އެ ފަރިތަކުރުމުގައި ޔުނައިޓެޑުގެ ގިނަ ކުޅުންތެރިން ވަނީ ބައިވެރި ވެސް ވެފަ އެވެ. އަމޯރިމްގެ އިރުޝާދުގެ ދަށުން ޔުނައިޓެޑު ކުޅޭނެ ފުރަތަމަ މެޗަކީ މި މަހުގެ 24 ވަނަ ދުވަހު އިނގިރޭސި ޕްރިމިއާ ލީގުގައި އިޕްސްވިޗް ޓައުންގެ ދަނޑުގައި އެ ޓީމާ ދެކޮޅަށް ކުޅޭ މެޗެވެ.

މީގެ ކުރިމް ބެންފީކާ އަދި ޕޯޗުގަލް ޤައުމީ ޓީމަށް ވެސް ކުޅެފައިވާ އަމޯރިމް ކޯޗިންގެ ކެރިއަރު ފެށީ 2018 ވަނަ އަހަރު އެވެ. އޭގެ ފަހުން ޔުނައިޓެޑު ވެގެން ދާނީ އަމޯރިން އިރުޝާދު ދޭނެ ހަތަރު ވަނަ ކުލަބަށެވެ. އޭނާ އެންމެ ފަހުން ހުރީ ޕޯޗުގަލްގެ ސްޕޯޓިންގެ ކޯޗުކަމުގަ އެވެ. އޭނާގެ އިރުޝާދުގެ ދަށުން ސްޕޯޓިން ވަނީ 231 މެޗު ކުޅެފަ އެވެ. އޭގެ ތެރެއިން އެ ޓީމު މޮޅުވެފައި ވަނީ 164 މެޗުންނެވެ. 34 މެޗު އެއްވަރުވެފައިވާއިރު، 33 މެޗުން ވަނީ ބަލިވެފަ އެވެ. އޭނާގެ އިރުޝާދުގެ ދަށުން ސްޕޯޓިން ވަނީ ފަސް ތައްޓެއް ވެސް ކާމިޔާބު ކޮށްފަ އެވެ.