ބައިތު ލަހިޔާގައި އާންމުންގެ ތެރެއަށް އިޒްރޭލުން ބޮން އަޅައިފި

ހޯމަ ދުވަހު ޣައްޒާ ސްޓްރިޕްގެ އުތުރުގައިވާ ބައިތު ލަހިޔާގައި އާންމުން ތިބި ތަނަކަށް އިޒްރޭލުން ބޮން އަޅާ ބަޔަކު ޝަހީދުކޮށްލައިފިއެވެ.

މަންޒަރު ދުށް މީހުންނާ ހަވާލާދީ ވަފާ ނިއުސް އިން ރިޕޯޓުކުރި ގޮތުގައި، ސްޓްރިޕްގެ އުތުރުގައިވާ ބައިތު ލަހިޔާގައި އާންމު މީހެއްގެ ގެއަކަށް ބޮން އެޅުމުގެ ސަބަބުން މަދުވެގެން ދެ މީހުން މަރުވެ އަދި އިތުރު މީހުން ޒަޚަމްވެފައިވެއެވެ.

ޔަހޫދީ ބާރުތަކުން 7 އޮކްޓޯބަރު 2023 އިން ފެށިގެން ޣައްޒާ ސްޓްރިޕް ގައި ކުރަމުންދާ އަނިޔާވެރި ހަނގުރާމައިގެ ސަބަބުން 43،846 އާންމު ރައްޔިތުން މަރުވެފައިވެއެވެ. މީގެ ތެރެއިން ގިނައީ އަންހެނުންނާއި ކުޑަކުދިންނެވެ. އަދި 103،740 މީހުންނަށް އަނިޔާވެފައިވެއެވެ.