ރައީސް މުއިއްޒަކީ އެއްކަމަކަށް އެތައް ހޭދައެއް ކުރައްވާ ބޭފުޅެއް، އެއީ ކޮރަޕްޝަން: ވަހީދު
17 ނޮވެމްބަރު 2024 | އާދީއްތަ 13:43ރައީސް މުއިއްޒު ހައުސިން މިނިސްޓަރަކަށް ހުންވައިގެން ކުރިއަށް ގެންދިޔަ ތަރައްގީގެ ގިނަ މަޝްރޫއުތައް އެތައް ފަހަރަކު ކުރިއަށް ގެންދަންޖެހިފައިވޭ
ރާއްޖެޓީވީން ގެނެސްދޭ ގިލަންވެރިކަމުގެ އެއްއަހަރު ޕްރޮގްރާމްގައި ދަ ޑިމޮކްރެޓްސްގެ ލާމަރުކަޒީ ކޮމިޓީގެ ޗެއަރ މުހައްމަދު ވަހީދު ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒަކީ އެއްކަމަކަށް އެއްތައް ހޭދައެއް ކުރައްވާ ބޭފުޅެއް ކަމަށާއި، އެއީ ކޮރަޕްޝަން ކަމަށް ދަ ޑިމޮކްރެޓްސްގެ ލާމަރުކަޒީ ކޮމިޓީގެ ޗެއަރ މުހައްމަދު ވަހީދު (ވައްޑެ) ވިދާޅުވެއްޖެއެވެ.
ރައީސް މުއިއްޒުގެ ސަރުކާރަށް އެއްއަހަރު ފުރުމާއި ގުޅިގެން ރާއްޖެޓީވީން ގެނެސްދޭ ގިލަންވެރިކަމުގެ އެއްއަހަރު ޕްރޮގްރާމްގައި ވަހީދު ވިދާޅުވީ ކުރީގެ ރައީސް އަބްދުﷲ ޔާމީންގެ ވެރިކަމުގައި މިއަދުގެ ރައީސް ޑރ.މުއިއްޒު ހައުސިން މިނިސްޓަރަކަށް ހުންވައިގެން ކުރިއަށް ގެންދިޔަ ތަރައްގީގެ ގިނަ މަޝްރޫއުތައް އެތައް ފަހަރަކު ކުރިއަށް ގެންދަންޖެހުނު ކަމަށެވެ. އަދި ބައެއް މަޝްރޫއުތައް ކުރިއަށް ގެންދިޔަ ގޮތުން އާއްމު ރައްޔިތުންނަށް އަނިޔާވެ، އެތަންތަން އަލުން ބަލުން ބަދަލުކުރަން ޖެހުނު ކަމަށް ވަހީދު ވިދާޅުވިއެވެ.
މިސަރުކާރުގެ ކޮރަޕްޝަނަށް އިޝާރާތް ކުރައްވައި ވަހީދު ވިދާޅުވީ ކޮރަޕްޝަންއަކީ ހަމައެކަނި ތިޖޫރީން ފައިސާ ވަގަށް ނެގުން ނޫން ކަމަށާއި، އެއްކަމަކަށް އެތައް ފަހަރަކު ހަރަދު ކުރަންޖެހި، ރައްޔިތުންގެ ފައިސާއަށް އިހުމާލުވެ، ރައްޔިތުންގެ ފައިސާ އެންމެ ރަނގަޅު ފައިދާ ގޮތުގައި ނޫން ގޮތްގޮތަށް ހޭދަކުރުމަކީ ކޮރަޕްޝަން ކަމަށެވެ. އަދި މިސަރުކާރުން ފެނިގެންދަނީ އެމަންޒަރު ކަމަށް އޭނާ ވިދާޅުވިއެވެ.
ވަހީދު ވިދާޅުވީ ކޮރަޕްޝަންއަކީ ވަރަށް ފުޅާއެއްޗެއް ކަމަށާއި، ވައްކަމަކީ ވަރަށް ފުޅާ އެއްޗެއް ކަމަށެވެ. އަދި ސަރުކާރުގެ އިހުމާލުން ރައްޔިތުންގެ ފައިސާއާއި، ރައްޔިތުންގެ މާލިއްޔަތަށް ލިބޭ ކޮންމެ ގެއްލުމަކީ ކޮރަޕްޝަން ކަމަށެވެ.
